ಬಳ್ಳಾರಿ ಎಪಿಎಂಸಿ: 3ನೇ ದಿನವೂ ಬಂದ್

ಬಳ್ಳಾರಿ: ಬಳ್ಳಾರಿಯ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಯಲ್ಲಿ (ಎಪಿಎಂಸಿ) ಶೇಂಗಾ ವಹಿವಾಟು ಮೂರು ದಿನಗಳಿಂದ ಸ್ಥಗಿತಗೊಳ್ಳಲು ವರ್ತಕರು ಮತ್ತು ದಲ್ಲಾಳಿಗಳ ನಡುವಿನ ಬಹುದಿನಗಳ ಸಂಘರ್ಷವೇ ಕಾರಣ. ಇದರ ನೇರ ಪರಿಣಾಮ ಎಪಿಎಂಸಿ, ರೈತರು, ಹಮಾಲಿಗಳು, ಕೂಲಿಗಳ ಮೇಲೆ ಆಗಿದೆ.

ವರ್ತಕರೊಬ್ಬರು ₹3 ಕೋಟಿ ಮೌಲ್ಯದ ಶೇಂಗಾವನ್ನು ದಲ್ಲಾಳಿಗಳ ಮೂಲಕ ಖರೀದಿಸಿ, ಹಣ ಪಾವತಿಸದೇ ಮಾರ್ಚ್ 18ರಿಂದ ತಲೆ ಮರೆಸಿ ಕೊಂಡಿದ್ದಾರೆ. ಇದು ದಲ್ಲಾಳಿಗಳ ಆಕ್ರೋಶಕ್ಕೆ ಕಾರಣವಾಗಿದೆ.

‘ಬಳ್ಳಾರಿ ಎಪಿಎಂಸಿಗೆ ಕರ್ನಾಟಕದಿಂದ ಅಲ್ಲದೇ ಆಂಧ್ರ ಪ್ರದೇಶದ ಅನಂತಪುರ ಮತ್ತು ಕರ್ನೂಲು ಜಿಲ್ಲೆಗಳಿಂದ ಶೇಂಗಾ ಬರುತ್ತದೆ. ವ್ಯಾಪಾರ ನಡೆದ ದಿನವೇ ವರ್ತಕರು ದಲ್ಲಾಳಿಗಳಿಗೆ ಮತ್ತು ದಲ್ಲಾಳಿಗಳು ರೈತರಿಗೆ ಹಣ ಪಾವತಿಸಬೇಕು. ಈ ಪ್ರಕ್ರಿಯೆ ಹಲವು ದಿನಗಳಿಂದ ನಡೆದಿದ್ದರೂ ದಲ್ಲಾಳಿಗಳಿಗೆ ವರ್ತಕರಿಂದ ಸಕಾಲಕ್ಕೆ ಹಣ ಪಾವತಿಯಾಗುತ್ತಿಲ್ಲ ಎಂಬ ಆರೋಪವಿದೆ. ಈ ಮುಸುಕಿನ ಗುದ್ದಾಟ ಈಗ ತಾರಕಕ್ಕೇರಿದೆ’ ಎಂದು ಮೂಲಗಳು ತಿಳಿಸಿವೆ.  

‘ಮೂರು ತಿಂಗಳಲ್ಲಿ ವರ್ತಕರಿಂದ ದಲ್ಲಾಳಿಗಳಿಗೆ ₹8 ಕೋಟಿ ಬಾಕಿ ಬರಬೇಕಿದೆ. ಚುನಾವಣಾ ನೀತಿ ಸಂಹಿತೆ ನೆಪ ಹೇಳಿ ಹಣ ಪಾವತಿ ಮತ್ತಷ್ಟು ವಿಳಂಬ ಮಾಡಲಾಗುತ್ತಿದೆ. ಹೀಗೆಯೇ ಮುಂದುವರಿದರೆ ರೈತರಿಗೆ ಏನು ಹೇಳುವುದು? ಒಮ್ಮೆ ರೈತರು ನಂಬಿಕೆ ಕಳೆದುಕೊಂಡರೆ, ಅವರನ್ನು ಪುನಃ ಎಪಿಎಂಸಿಗೆ ಕರೆತರುವುದು ಕಷ್ಟ. ಅದಕ್ಕೆ ವಹಿವಾಟು ನಿಲ್ಲಿಸಿದ್ದೇವೆ’ ಎಂದು ದಲ್ಲಾಳಿಗಳ ಸಂಘದ ಮುಖಂಡ ಗುರುಸ್ವಾಮಿ ಹೇಳಿದರು. 

‘ಇದು ಸಣ್ಣ ವಿಚಾರ. ಇದನ್ನೇ ಮುಂದಿಟ್ಟುಕೊಂಡು ಮಾರುಕಟ್ಟೆಯನ್ನೇ ಸ್ಥಗಿತಗೊಳಿಸಿದ್ದು ಸರಿಯಲ್ಲ. ಮಾತುಕತೆ ಮೂಲಕ ವಿಚಾರ ಬಗೆಹರಿಸಿಕೊಳ್ಳ ಬಹುದಿತ್ತು. ಹೀಗೆ ಏಕಾಏಕಿ ವಹಿವಾಟು ಬಂದ್‌ ಮಾಡಿದರೆ, ಮಾರುಕಟ್ಟೆಯ ಮೇಲಿನ ನಂಬಿಕೆ ಹಾಳಾಗುತ್ತದೆ’ ಎಂಬುದು ವರ್ತಕ ಸಂಘದ ಮುಖಂಡ ಪಾಲಣ್ಣ ಅವರ ಕಳವಳ.

‘ಶೇಂಗಾ ಕ್ವಿಂಟಲ್‌ಗೆ ₹8 ಸಾವಿರದ ವರೆಗೆ ಮಾರಾಟವಾಗುತ್ತಿದೆ. ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಈ ಸಲ ಮಾರುಕಟ್ಟೆಗೆ ಬಂದ ಶೇಂಗಾ ಪ್ರಮಾಣ ಕಡಿಮೆ. ನಿತ್ಯ 22 ಸಾವಿರ ಚೀಲದವರೆಗೆ ಶೇಂಗಾ ಆವಕ ಆಗುತ್ತಿದೆ’ ಎಂದು ಎಪಿಎಂಸಿ ಕಾರ್ಯದರ್ಶಿ ನಂಜುಂಡಸ್ವಾಮಿ ತಿಳಿಸಿದರು.