ಹರಪನಹಳ್ಳಿ | ಗಿರವಿ ಚಿನ್ನಾಭರಣ, ಮುಂಗಡ ಹಣ ಸಮೇತ ವ್ಯಾಪಾರಿ ಪರಾರಿ

ನಾಗರಾಜ್ ತಲೆಮರೆಸಿಕೊಂಡವ. ಆಂಜನೇಯ ಬಡಾವಣೆಯ ಅನ್ನಪೂರ್ಣಮ್ಮ ಸೇರಿ 56 ಜನರು ಹಣ, ಬಂಗಾರ ಕಳೆದುಕೊಂಡಿದ್ದಾರೆ.

ಪಟ್ಟಣದ ಗೊರವಿನ ತೋಟದಲ್ಲಿ ಬಂಗಾರದ ಅಂಗಡಿ ಇಟ್ಟುಕೊಂಡಿದ್ದ ನಾಗರಾಜ್ ಬಳಿ ಅನ್ನಪೂರ್ಣಮ್ಮ ಅವರು ಮೂರು ವರ್ಷಗಳ ಹಿಂದೆ 510 ಗ್ರಾಂ ತೂಕದ ಚಿನ್ನಾಭರಣ ಅಡವಿಟ್ಟು ₹15 ಲಕ್ಷ ಸಾಲ ಪಡೆದಿದ್ದರು.‌ ಕೆಲ ತಿಂಗಳ‌ ಬಳಿಕ ಸಾಲದ ಬಡ್ಡಿ ಹಣ ಮತ್ತು ಅಸಲು ₹3 ಲಕ್ಷ ವಾಪಾಸ್ ಕಟ್ಟಿದ್ದರು. ಅದೇ ರೀತಿ 56 ಜನರಿಗೆ ಆಭರಣ ತಯಾರಿಸಿಕೊಡುವುದಾಗಿ ನಂಬಿಸಿ ₹1,34,53,000 ನಗದು ಹಾಗೂ ಗಿರವಿ ಇಟ್ಟುಕೊಂಡಿದ್ದ ₹59, 08,326 ಮೌಲ್ಯದ 1858.69 ಗ್ರಾಂ ತೂಕದ ಚಿನ್ನಾಭರಣ ತೆಗೆದುಕೊಂಡು ಹೋಗಿ ವಂಚಿಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ‌.

ಸ್ಥಳೀಯ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.