ಬೆಂಗಳೂರು ಗ್ರಾಮಾಂತರ: ಡಾ.ಸಿ.ಎನ್‌. ಮಂಜುನಾಥ್‌ಗಿಂತ ಅವರ ಪತ್ನಿಯೇ ಸಿರಿವಂತೆ

ಹೌದು, ಗುರುವಾರ ಸಲ್ಲಿಸಿರುವ ನಾಮಪತ್ರದಲ್ಲಿ ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡರ ಅಳಿಯ ಮಂಜುನಾಥ್ ಕುಟುಂಬದ ಒಟ್ಟು ಆಸ್ತಿ ₹98.38 ಕೋಟಿ ಎಂದು ಘೋಷಿಸಿಕೊಂಡಿದ್ದಾರೆ. ಅವರ ಬಳಿ ₹6.98 ಕೋಟಿ ಚರಾಸ್ತಿ ಮತ್ತು ₹36.65 ಕೋಟಿ ಸ್ಥಿರಾಸ್ತಿ ಸೇರಿ ಒಟ್ಟು ₹43,64 ಕೋಟಿ ಆಸ್ತಿ ಇದ್ದರೂ, ಸ್ವಂತ ಮನೆ ಇಲ್ಲ. ಪತ್ನಿ ಅನುಸೂಯ ಬಳಿ ₹17.36 ಕೋಟಿ ಚರಾಸ್ತಿ ಮತ್ತು ₹35.30 ಕೋಟಿ ಸ್ಥಿರಾಸ್ತಿ ಸೇರಿ ₹52.93 ಕೋಟಿ ಮೌಲ್ಯದ ಆಸ್ತಿ ಇದೆ.

ಇವರ ಅವಿಭಕ್ತ ಕುಟುಂಬದ ಆಸ್ತಿ ಮೌಲ್ಯ ₹2.07 ಕೋಟಿ. ಮಂಜುನಾಥ್ ಅವರು ₹3.74 ಕೋಟಿ ಹಾಗೂ ಅನುಸೂಯ ಅವರು ₹11.02 ಕೋಟಿ ಸಾಲ ಹೊಂದಿದ್ದು, ಕುಟುಂಬದ ಮೇಲೆ ಒಟ್ಟು ₹14.81 ಕೋಟಿ ಸಾಲದ ಹೊರೆ ಇದೆ.

ತಾಯಿಗೆ ಸಾಲ: ಅನುಸೂಯ ಅವರು ತಾಯಿ ಚನ್ನಮ್ಮ ಅವರಿಗೆ ₹19.20 ಲಕ್ಷ ಸಾಲ ನೀಡಿದ್ದರೆ, ಮಂಜುನಾಥ್ ಅವರು ಪತ್ನಿಗೆ ₹2.24 ಕೋಟಿ ಹಾಗೂ ಎಚ್‌.ಡಿ. ಕುಮಾರಸ್ವಾಮಿ ಅವರ ಪತ್ನಿ ಅನಿತಾ ಕುಮಾರಸ್ವಾಮಿ ಅವರಿಗೆ ₹7.5 ಲಕ್ಷ ಸಾಲ ಕೊಟ್ಟಿದ್ದಾರೆ. ಗೃಹಣಿಯಾಗಿರುವ ಅನುಸೂಯ ಅವರು, ಕೆಲ ಸಂಸ್ಥೆಗಳಲ್ಲಿ ಪಾಲುದಾರರಾಗಿದ್ದಾರೆ.

ವೈದ್ಯಕೀಯ ಕ್ಷೇತ್ರಕ್ಕೆ ಸಂಬಂಧಿಸಿದ ₹1 ಲಕ್ಷ ಮೌಲ್ಯದ 100 ಪುಸ್ತಕಗಳು ಹಾಗೂ ₹25 ಸಾವಿರ ಮೌಲ್ಯದ ಕನ್ನಡ ಮತ್ತು ಇತರ ಪುಸ್ತಕಗಳು ಮಂಜುನಾಥ ಬಳಿ ಇವೆ.

ಮಂಜುನಾಥ್ ಅವರು ಬಿಡದಿಯ ಕೇತಗಾನಹಳ್ಳಿ, ಸ್ವಗ್ರಾಮ ಚೋಳೇನಹಳ್ಳಿಯಲ್ಲಿ ಪಿತ್ರಾರ್ಜಿತ ಕೃಷಿ ಭೂಮಿ, ಕೆಂಗೇರಿ ಬಳಿಯ ಹಾಲದೇವನಹಳ್ಳಿ ಬಳಿ ಒಂದು ನಿವೇಶನ, ಉತ್ತರಹಳ್ಳಿಯ ಗುಬ್ಬಲಾಳ ಬಳಿ 3 ಎಕರೆ ಪರಿವರ್ತಿತ ಭೂಮಿ, ಕಿಕ್ಕೇರಿಯ ಅಂಚೆ ಬೀರನಹಳ್ಳಿಯಲ್ಲಿ ಒಂದು ರೈಸ್ ಮಿಲ್ ಹೊಂದಿರುವುದಾಗಿ ಅವರು ತಮ್ಮ ಪ್ರಮಾಣಪತ್ರದಲ್ಲಿ ಘೋಷಿಸಿಕೊಂಡಿದ್ದಾರೆ.