ಬಿಎಂಟಿಸಿ ಚಾಲಕರಿಗೆ ವೇತನ ವ್ಯತ್ಯಯ: ಪ್ರತಿಭಟನೆ

ಭಾರತ ಸರ್ಕಾರದ ಫೇಮ್‌–2 ಯೋಜನೆಯಡಿ ಮೊದಲ ಹಂತದಲ್ಲಿ 2023ರ ಡಿಸೆಂಬರ್‌ನಲ್ಲಿ ಎಲೆಕ್ಟ್ರಿಕ್‌ ಹವಾನಿಯಂತ್ರಿತ ಬಸ್‌ಗಳು ಶಾಂತಿನಗರ ಘಟಕದಿಂದ ಆರಂಭವಾಗಿದ್ದವು. ಎಂ/ಎಸ್‌. ಟಿಎಂಎಲ್‌ ಸ್ಮಾರ್ಟ್‌ ಸಿಟಿ ಮೊಬಿಲಿಟಿ ಸಲ್ಯೂಶನ್ಸ್‌ ಲಿಮಿಟೆಡ್‌ ಕಂಪನಿಯವರು ಈ ಬಸ್‌ಗಳನ್ನು ನಿರ್ವಹಿಸುತ್ತಿದ್ದರು. ಬಸ್ ನಿರ್ವಹಣೆ ಮತ್ತು ಚಾಲಕನ ವೇತನವನ್ನು ಆ ಸಂಸ್ಥೆಯವರು ನೀಡಬೇಕು. ಆದರೆ, ಸಮಯಕ್ಕೆ ಸರಿಯಾಗಿ ವೇತನ ನೀಡದೇ ಇದ್ದ ಕಾರಣ ಚಾಲಕರು ಪ್ರತಿಭಟನೆ ನಡೆಸಿದರು.

ಇದರಿಂದ ಮಂಗಳವಾರ ಬೆಳಿಗ್ಗೆ 7ರಿಂದ 11ರವರೆಗೆ 113 ಟ್ರಿಪ್‌ಗಳು ವ್ಯತ್ಯಯಗೊಂಡವು. ಬಿಎಂಟಿಸಿ ವತಿಯಿಂದ ಈ ಮಾರ್ಗಗಳಲ್ಲಿ ಹೆಚ್ಚುವರಿ ಬಸ್‌ಗಳನ್ನು ಕಾರ್ಯಾಚರಣೆಗೆ ವ್ಯವಸ್ಥೆ ಮಾಡುವ ಮೂಲಕ ಪ್ರಯಾಣಿಕರಿಗೆ ತೊಂದರೆಯಾಗದಂತೆ ನೋಡಿಕೊಳ್ಳಲಾಯಿತು.

‘ಟಿಎಂಎಲ್‌ ಸ್ಮಾರ್ಟ್‌ ಸಿಟಿ ಮೊಬಿಲಿಟಿ ಸಲ್ಯೂಶನ್ಸ್‌ ಲಿಮಿಟೆಡ್‌’ ಕಂಪನಿಗೆ ನೋಟಿಸ್‌ ನೀಡಲಾಗಿದೆ. ಮುಂದೆ ಈ ರೀತಿ ಸಮಸ್ಯೆಯಾಗದಂತೆ ನೋಡಿಕೊಳ್ಳಲು ತಿಳಿಸಲಾಗಿದೆ ಎಂದು ಬಿಎಂಟಿಸಿ ಅಧಿಕಾರಿಗಳು ತಿಳಿಸಿದ್ದಾರೆ.