ಚಿಕ್ಕಮಗಳೂರು | ಅಯ್ಯನಕೆರೆಯಲ್ಲಿ ಬೋಟಿಂಗ್: ಪ್ರವಾಸಿಗರ ದಂಡು

ಇಲ್ಲಿನ ಪ್ರಸಿದ್ಧ ಶಕುನ ರಂಗನಾಥಸ್ವಾಮಿ ಜಾತ್ರಾ ಮಹೋತ್ಸವದ ಅಂಗವಾಗಿ ಜಿಲ್ಲಾಡಳಿತ, ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ, ಪ್ರವಾಸೋದ್ಯಮ ಇಲಾಖೆ, ಜನರಲ್ ತಿಮ್ಮಯ್ಯ ಸಾಹಸ ಅಕಾಡೆಮಿ ಬೆಂಗಳೂರು ಹಾಗೂ ದೇವಾಲಯ ವ್ಯವಸ್ಥಾಪನಾ ಮತ್ತು ಅಭಿವೃದ್ಧಿ ಸಮಿತಿ ಸಂಯುಕ್ತಾಶ್ರಯದಲ್ಲಿ ಆರು ದಿನಗಳವರೆಗೆ ಪ್ರವಾಸಿಗರು, ಸಾರ್ವಜನಿಕರಿಗಾಗಿ ಜಲ ಸಾಹಸ ಕ್ರೀಡೆಗಳನ್ನು ಆಯೋಜಿಸಲಾಗಿದೆ. ಮನರಂಜನೆಗಾಗಿ ಪಾಲ್ಗೊಳ್ಳಲು ವಿವಿಧ ಕಡೆಗಳಿಂದ ನಿತ್ಯ ಸಾವಿರಕ್ಕೂ ಅಧಿಕ ಮಂದಿ ಇಲ್ಲಿಗೆ ಭೇಟಿ ನೀಡುತ್ತಿದ್ದಾರೆ.

ವಿಶಾಲವಾದ ಅಯ್ಯನಕೆರೆಯಲ್ಲಿ ಸ್ಪೀಡ್ ಬೋಟ್‌, ಕಯಾಕಿಂಗ್‌, ರಾಫ್ಟಿಂಗ್‌, ಜೆಟ್‌ಸ್ಕಿ ಹಾಗೂ ಬನಾನ ಬೋಟ್‌ ಒಳಗೊಂಡ ವಿವಿಧ ಬಗೆಯ ಜಲ ಸಾಹಸ ಕ್ರೀಡೆಗಳು ಬೆಳಿಗ್ಗೆ 10ಗಂಟೆಯಿಂದ ಆರಂಭವಾಗಿ ಸಂಜೆ 5ರ ವರೆಗೆ ನಡೆಯಲಿದೆ.

ಜನರಲ್ ತಿಮ್ಮಯ್ಯ ಸಾಹಸ ಅಕಾಡೆಮಿಯ ಪರಿಣಿತ ಈಜು ತರಬೇತುದಾರರು, ಸ್ವಯಂ ಸೇವಕ ಸಿಬ್ಬಂದಿ ಇಲ್ಲಿ ಕಾರ್ಯ ನಿರ್ವಹಣೆ ಮಾಡಲಿದ್ದಾರೆ. ಬರುವ ಪ್ರವಾಸಿಗರಿಗೆ ನೀರಿಗೆ ಇಳಿಯುವ ಮುನ್ನಾ ಸುರಕ್ಷತಾ ಕವಚ ತೊಡಿಸಿ ಸಲಹೆ, ಸೂಚನೆಗಳನ್ನು ನೀಡಲಿದ್ದಾರೆ. ಜಾತ್ರಾ ಮಹೋತ್ಸವಕ್ಕೆ ಚಿಕ್ಕಮಗಳೂರು ಸುತ್ತಮುತ್ತಲಿನ ವಿವಿಧ ಜಿಲ್ಲೆಗಳಿಂದ ಬರುವ ಸಾವಿರಾರು ಭಕ್ತರು, ಪ್ರವಾಸಿಗರು, ಮಹಿಳೆಯರು, ಮಕ್ಕಳು ಒಳಗೊಂಡಂತೆ ಕುಟುಂಬ ಸಮೇತ ಅಯ್ಯನಕೆರೆಗೆ ಭೇಟಿ ನೀಡಿ ಇಲ್ಲಿನ ರಮ್ಯತಾಣವನ್ನು ಆನಂದಿಸಿ ಜಲಸಾಹಸ ಕ್ರೀಡೆಗಳಲ್ಲಿ ಭಾಗವಹಿಸಿ ಮೈಮನವನ್ನು ತಣಿಸಿಕೊಳ್ಳುತ್ತಿದ್ದಾರೆ.

ಇದೇ 15ರಿಂದ ಜಲಸಾಹಸ ವಿವಿಧ ಕ್ರೀಡೆಗಳು ಆರಂಭವಾಗಿವೆ. ಜೆಟ್‌ಸ್ಕಿ ₹150, ಬನಾನ ಬೋಟ್‌ ₹100, ರಾಫ್ಟಿಂಗ್, ಕಯಾಕಿಂಗ್‌ ಹಾಗೂ ಸ್ಪೀಡ್‌ ಬೋಟ್‌ ರೈಟ್‌ಗೆ ಒಬ್ಬರಿಗೆ ₹50 ಶುಲ್ಕ ನಿಗದಿಪಡಿಸಲಾಗಿದೆ. ಈವರೆಗೆ 2 ಸಾವಿರಕ್ಕೂ ಅಧಿಕ ಮಂದಿ ಕ್ರೀಡೆಗಳಲ್ಲಿ ಪಾಲ್ಗೊಂಡಿದ್ದಾರೆ ಎಂದು ಸ್ವಯಂ ಸೇವಕ ನಿರ್ವಾಹಕ ಎಚ್‌.ಎಸ್‌. ಶಿವಕುಮಾರ್ ತಿಳಿಸಿದರು.

‘ಪ್ರವಾಸಿಗರಿಗೆ ಅನುಕೂಲವಾಗುವಂತೆ ಜಿಲ್ಲಾಡಳಿತ ಕಡಿಮೆ ಶುಲ್ಕ ನಿಗದಿಪಡಿಸಿದೆ. ಈಗಾಗಲೇ ಐದು ದಿನಗಳು ಕಳೆದಿದ್ದು, ಪ್ರವಾಸಿಗರ ಸಂಖ್ಯೆ ಅಧಿಕವಾಗುತ್ತಿದೆ. ಭಾನುವಾರದವರೆಗೂ ವಿಸ್ತರಣೆ ಮಾಡುವಂತೆ ಬೇಡಿಕೆ ಹೆಚ್ಚುತ್ತಿದೆ’ ಎಂದು ಅವರು ಹೇಳಿದರು.

‘ಕುಟುಂಬ ಸಮೇತರಾಗಿ ಜಾತ್ರಾ ಮಹೋತ್ಸವಕ್ಕೆ ಬಂದಿದ್ದೇವೆ. ಮಕ್ಕಳು, ಮನೆಮಂದಿಯೆಲ್ಲ ಅಯ್ಯನಕೆರೆಯ ಜಲಸಾಹಸ ಕ್ರೀಡೆಗಳಲ್ಲಿ ಪಾಲ್ಗೊಂಡಿರುವುದು ಖುಷಿ ತಂದಿದೆ. ದೇವಾಲಯದ ಜತೆಗೆ ಉತ್ತಮ ಪರಿಸರ ಇದೆ. ಆನಂದವಾಗಿ ಕಾಲ ಕಳೆಯಲು ಉತ್ತಮ ಜಾಗ’ ಎಂದು ಪ್ರವಾಸಿಗರೊಬ್ಬರು ಅನುಭವ ಹಂಚಿಕೊಂಡರು.