ಹೊರಗುತ್ತಿಗೆ ನೌಕರರಿಗೆ ಎರಡು ತಿಂಗಳ ವೇತನ ಜಮಾ

ಜಿಲ್ಲೆಯ ಪ್ರಾಥಮಿಕ ಆರೋಗ್ಯ ಕೇಂದ್ರ, ಸಮುದಾಯ, ಆರೋಗ್ಯ ಮತ್ತು ಕ್ಷೇಮ ಕೇಂದ್ರ, ಅಂಬ್ಯುಲೆನ್ಸ್‌ ನೌಕರರು ವೇತನವಿಲ್ಲದೇ ಸಾಲ ಸೋಲ ಮಾಡಿ ಮಕ್ಕಳ ಶಾಲಾ–ಕಾಲೇಜು, ಬಾಡಿಗೆ ಕಟ್ಟಲು ಪರದಾಡುತ್ತಿದ್ದರು. ಸಮಸ್ಯೆ ಕುರಿತು ವರದಿ ಮಾಡಿದ ನಂತರ ಎಚ್ಚೆತ್ತುಕೊಂಡ ದೀಕ್ಷಾ ಏಜೆನ್ಸಿ ವೇತನ ನೌಕರರಿಗೆ ಜಮಾ ಮಾಡಿದ್ದು, ನೌಕರರಿಗೆ ತಾತ್ಕಾಲಿಕ ಸಮಾಧಾನ ಮೂಡಿಸಿದೆ. ಆದರೆ, ಕೆಲವರಿಗೆ ಬಾಕಿ ಉಳಿಸಿಕೊಂಡಿರುವುದು ಅನುಮಾನ ಮೂಡಿಸಿದೆ ಎಂದು ನೌಕರರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಈ ಬಗ್ಗೆ ದೀಕ್ಷಾ ಏಜೆನ್ಸಿಯ ವೆಂಕಟೇಶ ಅವರು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿ, ‘ಕಳೆದ ಐದು ತಿಂಗಳಿಂದ ಆರೋಗ್ಯ ಇಲಾಖೆಯಲ್ಲಿ ಟೆಂಡರ್‌ ಸಮಸ್ಯೆಯಾಗಿ ವೇತನ ಜಮಾ ಆಗಿಲ್ಲ. ಈಗ ಎರಡು ತಿಂಗಳ ವೇತನ ಜಮಾ ಮಾಡಿದ್ದು, ಇನ್ನೊಂದು ವಾರದಲ್ಲಿ ಉಳಿದ ಮೂರು ತಿಂಗಳ ವೇತನ ಜಮಾ ಮಾಡಲಾಗುವುದು’ ಎಂದು ಮಾಹಿತಿ ನೀಡಿದರು.

ವೇತನ ಹೆಚ್ಚಿಸಿ:

‘ಹಲವಾರು ವರ್ಷಗಳಿಂದ ಆರೋಗ್ಯ ಇಲಾಖೆಯ ಹೊರಗುತ್ತಿಗೆಯಲ್ಲಿ ಸ್ಟಾಫ್‌ ನರ್ಸ್‌, ಪ್ರಯೋಗಾಲಯ ಸಿಬ್ಬಂದಿಯಾಗಿ ಕಾರ್ಯನಿರ್ವಹಿಸುತ್ತಿದ್ದು, ಡಿ ಗ್ರೂಪ್‌ ನೌಕರರಿಗೆ ನಮಗೂ ಒಂದೇ ರೀತಿಯ ವೇತನ ನೀಡಲಾಗುತ್ತಿದೆ. ಈ ಇದನ್ನು ಸರಿ ಮಾಡಬೇಕು. ಆಯಾ ಹುದ್ದೆಗಳಿಗೆ ತಕ್ಕಂತೆ ವೇತನ ಹೆಚ್ಚಿಸಿ ಆಯಾ ತಿಂಗಳೇ ವೇತನ ನೀಡಬೇಕು. ಪಿಎಫ್‌ ಸೇರಿದಂತೆ ನೌಕರರಿಗೆ ಎಲ್ಲ ಸೌಲಭ್ಯ ಕಲ್ಪಿಸಬೇಕು‘ ಎಂದು ಹೊರಗುತ್ತಿಗೆ ಸಿಬ್ಬಂದಿ ಆಗ್ರಹಿಸಿದ್ದಾರೆ.