‘ಬೆಂಕಿಯ ಬಲೆ’ಯಿಂದ ಹಾಡುಗಳ ಬಿಡುಗಡೆ

7

‘ಬೆಂಕಿಯ ಬಲೆ’ಯಿಂದ ಹಾಡುಗಳ ಬಿಡುಗಡೆ

Published:
Updated:
Deccan Herald

‘ಬೆಂಕಿಯ ಬಲೆ’ ಎಂಬುದು ಕನ್ನಡಿಗರ ಪಾಲಿಗೆ ಪರಿಚಿತ ಹೆಸರು. 90ರ ದಶಕದಲ್ಲಿ ಸಿನಿಮಾ ಪ್ರಿಯರ ಮನಸ್ಸು ಗೆದ್ದ ಸಿನಿಮಾ ಇದು. ಅದೇ ಹೆಸರನ್ನು ಇಟ್ಟುಕೊಂಡು ಮತ್ತೊಂದು ಸಿನಿಮಾ ಮಾಡಿದ್ದಾರೆ ನಿರ್ಮಾಪಕ, ನಿರ್ದೇಶಕ ಹಾಗೂ ನಟ ಶಿವಾಜಿ. ಈ ಚಿತ್ರದ ಹಾಡುಗಳ ಬಿಡುಗಡೆ ಕಾರ್ಯಕ್ರಮವನ್ನು ಶಿವಾಜಿ ಬೆಂಗಳೂರಿನಲ್ಲಿ ಆಯೋಜಿಸಿದ್ದರು.

‘ನನ್ನ ಜೀವನದಲ್ಲಿ ನಡೆದ ಘಟನೆಯನ್ನು ಸಿನಿಮಾ ರೂಪದಲ್ಲಿ ವಿವರಿಸಬೇಕು ಎಂಬ ಆಲೋಚನೆ ಬಂತು. ಅದರ ಬಗ್ಗೆ ನನ್ನ ಕುಟುಂಬದ ಸದಸ್ಯರ ಜೊತೆ ಚರ್ಚಿಸಿದೆ’ ಎನ್ನುತ್ತ ಮಾತು ಆರಂಭಿಸಿದರು ಶಿವಾಜಿ. ಇದರ ಬಗ್ಗೆ ಪುಸ್ತಕ ಬರೆಯುವ ಆಲೋಚನೆಯೂ ಬಂದಿತ್ತಂತೆ. ಆದರೆ ಪುಸ್ತಕ ಬರೆದರೆ ಹೆಚ್ಚು ಜನ ಓದುವುದಿಲ್ಲ ಎಂದು, ಸಿನಿಮಾ ರೂಪದಲ್ಲಿ ಕಥೆ ಹೇಳುವ ಮನಸ್ಸು ಮಾಡಿದರಂತೆ.

‘ಈ ಚಿತ್ರಕ್ಕೆ ಸ್ಕ್ರಿಪ್ಟ್‌ ಇಲ್ಲ. ನನ್ನ ಮನೆಯಲ್ಲಿ ನಡೆದ ಕಥೆ ಇದಾಗಿರುವ ಕಾರಣ, ನಾನೇ ಮುಂದೆ ನಿಂತು ಇಂತಿಂಥ ರೀತಿಯಲ್ಲಿ ಅಭಿನಯಿಸಬೇಕು ಎಂದು ಸೂಚನೆ ಕೊಡುತ್ತ ಬಂದೆ’ ಎಂದರು. ‘ಹಿಂದೊಮ್ಮೆ ನನಗೆ ಡಾ. ರಾಜ್‌ ಆಶೀರ್ವಾದ ಮಾಡಿದ್ದರು. ಆ ಆಶೀರ್ವಾದದ ಕಾರಣದಿಂದಲೇ ನಾನು ಇಲ್ಲಿಯವರೆಗೆ ಬಂದು ನಿಂತಿದ್ದೇನೆ’ ಎಂದು ನೆನಪಿಸಿಕೊಂಡರು.

ಹಾಸ್ಯ ಬೆರೆತಿರುವ ಈ ಸಿನಿಮಾದಲ್ಲಿ ಒಂದು ಊರಿನ ಗೌಡ ಹಾಗೂ ಅವನ ಜೀವನದಲ್ಲಿ ನಡೆಯುವ ಸಂಗತಿಗಳು ಕಥೆಯ ರೂಪ ಪಡೆದಿವೆಯಂತೆ.

ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಎಸ್.ಎ. ಚಿನ್ನೇಗೌಡ ಅವರೂ ಕಾರ್ಯಕ್ರಮಕ್ಕೆ ಬಂದಿದ್ದರು. ‘ಈ ಸಿನಿಮಾದ ಹಾಡುಗಳು ಚೆನ್ನಾಗಿ ಮೂಡಿಬಂದಿವೆ. ಹಾಡುಗಳನ್ನು ಕೇಳಿ ಖುಷಿಯಾಯಿತು. ಚಿತ್ರದಲ್ಲಿ ಹೊಸ ಮುಖಗಳು ಇವೆ’ ಎಂದು ಮೆಚ್ಚುಗೆ ಸೂಚಿಸಿದರು. ‘ಮೊದಲು ತುಸು ಹೋಮ್‌ ವರ್ಕ್‌ ಮಾಡಿಕೊಳ್ಳಿ. ನಂತರ ಸಿನಿಮಾ ಮಾಡಿ. ಶೋಕಿ ಮಾಡಲು ಸಿನಿಮಾ ಮಾಡಬೇಡಿ’ ಎಂದು ಕಿವಿಮಾತು ಕೂಡ ಹೇಳಿದರು.

ಮಂಜು ಕವಿ ಈ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ. ಪ್ರೀತಿ, ನಿರಂಜನ್, ಸುಮಾ ದೇಶಪ್ರೇಮಿ ಮತ್ತಿತರರು ತಾರಾಗಣದಲ್ಲಿ ಇದ್ದಾರೆ. ‘ಬೆಂಕಿಯ ಬಲೆ’ ಶೀರ್ಷಿಕೆಗೆ ‘ಪ್ರೀತಿಯ ಕೊಲೆ’ ಎಂಬ ಅಡಿಶೀರ್ಷಿಕೆ ನೀಡಲಾಗಿದೆ.

ಬರಹ ಇಷ್ಟವಾಯಿತೆ?

  • 1

    Happy
  • 1

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !