ಜ. 15ಕ್ಕೆ ‘ಮಾಂಜ್ರಾ’ ಚಲನಚಿತ್ರ ಬಿಡುಗಡೆ

ದಾವಣಗೆರೆ: ಬೆಳಗಾವಿ ಜಿಲ್ಲೆಯ ಹಳ್ಳಿಯೊಂದರಲ್ಲಿ ನಡೆದ ನೈಜ ಘಟನೆ ಆಧಾರಿತ ‘ಮಾಂಜ್ರಾ’ ಚಲನಚಿತ್ರ ಜ. 15ರಂದು ಬಿಡುಗಡೆಯಾಗಲಿದೆ.

‘ಶ್ರೀ ದುರ್ಗಾ ಪರಮೇಶ್ವರಿ ಸಿನಿ ಪ್ರೊಡಕ್ಷನ್ಸ್‌ ಬ್ಯಾನರ್ ಅಡಿಯಲ್ಲಿ ₹ 8 ಲಕ್ಷ ವೆಚ್ಚದಲ್ಲಿ ನಿರ್ಮಾಣವಾಗಿರುವ ಈ ಚಿತ್ರದ ಟ್ರೈಲರ್ ಈಗಾಗಲೇ ಬಿಡುಗಡೆಯಾಗಿದೆ. ಅಪೂರ್ವ, ನಿತ್ಯಾ, ರಂಜನ್ ಪಣಗುತ್ತಿ ಅಭಿನಯಿಸಿರುವ ಈ ಚಿತ್ರದಲ್ಲಿ ಕನ್ನಡದ ಜೊತಗೆ ಮರಾಠಿ ಭಾಷೆಯನ್ನೂ ಅಲ್ಲಲ್ಲಿ ಬಳಸಲಾಗಿದೆ’ ಎಂದು ಚಿತ್ರದ ನಿರ್ದೇಶಕ ಮುತ್ತುರಾಜ ರೆಡ್ಡಿ ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

ಸಾಂಸ್ಕೃತಿಕ ಕಾರ್ಯಕ್ರಮ: ಈ ಚಿತ್ರದ ಪ್ರಚಾರಾರ್ಥ ರಾಜ್ಯದಾದ್ಯಂತ ‘ಮಾಂಜ್ರಾ ರಾಕ್‌ಸ್ಟಾರ್’ ಹೆಸರಿನಲ್ಲಿ ಡಿ. 6ರಂದು ಚಿಂದೋಡಿ ಲೀಲಾ ಕಲಾಕ್ಷೇತ್ರದಲ್ಲಿ ನೃತ್ಯ, ಹಾಡುಗಾರಿಕೆ, ಏಕಪಾತ್ರಾಭಿನಯ ಹಾಗೂ ಮಿಮಿಕ್ರಿ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ಮುತ್ತುರಾಜ ರೆಡ್ಡಿ ತಿಳಿಸಿದರು.

‘ದಾವಣಗೆರೆ ಸೇರಿ 5 ಜಿಲ್ಲೆಗಳಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಯಲಿದ್ದು, ವಿಜೇತರಿಗೆ ಪ್ರಥಮ ಬಹುಮಾನವಾಗಿ ₹ 2 ಲಕ್ಷ, ದ್ವಿತೀಯ ಬಹುಮಾನ ₹ 1 ಲಕ್ಷ ಹಾಗೂ ತೃತೀಯ ಬಹುಮಾನವಾಗಿ ₹ 50 ಸಾವಿರ ನೀಡಲಾಗುವುದು. ಕಾರ್ಯಕ್ರಮಕ್ಕೆ ₹ 200 ಪ್ರವೇಶ ದರವಿದ್ದು, ಸ್ಪರ್ಧಿಗಳಿಗೆ ಎರಡು ಮಾಂಜ್ರಾ ಸಿನಿಮಾಗಳ ಟಿಕೆಟ್‌ಗಳನ್ನು ಉಚಿತವಾಗಿ ನೀಡಲಾಗುವುದು’ ಎಂದು ಹೇಳಿದರು.

ಮಾಹಿತಿಗೆ ಮೊ: 9110495858 ಸಂಪರ್ಕಿಸಬಹುದು.

ಚಿತ್ರದ ನಾಯಕ ರಂಜಿತ್‌ಸಿಂಗ್, ಬಾಲನಟಿ ನಮನಾ, ಗೀತಾ ಹಾಗೂ ಮಾರುತಿ ಪತ್ರಿಕಾಗೋಷ್ಠಿಯಲ್ಲಿ ಇದ್ದರು.