ಹಿಜ್ಬುಲ್‌ ಮುಖ್ಯಸ್ಥನ ಮಗನ ಬಂಧನ

ಬುಧವಾರ, ಜೂನ್ 19, 2019
23 °C
ಉಗ್ರಗಾಮಿ ಸಂಘಟನೆಗೆ ವಿದೇಶದಿಂದ ಹಣ ಸಂಗ್ರಹಿಸಿ ನೀಡಿದ ಆರೋಪ

ಹಿಜ್ಬುಲ್‌ ಮುಖ್ಯಸ್ಥನ ಮಗನ ಬಂಧನ

Published:
Updated:

ನವದೆಹಲಿ: ಹಿಜ್ಬುಲ್‌ ಮುಜಾಹಿದೀನ್‌ ಉಗ್ರಗಾಮಿ ಸಂಘಟನೆಯ ಮುಖ್ಯಸ್ಥ ಸಯ್ಯದ್‌ ಸಲಾಹುದ್ದೀನ್‌ನ ಮಗ ಸಯ್ಯದ್‌ ಶಾಹಿದ್‌ ಯೂಸುಫ್‌ನನ್ನು (42) ಭಯೋತ್ಪಾದನೆಗೆ ಹಣಕಾಸು ನೆರವು ನೀಡಿದ ಆರೋಪದಲ್ಲಿ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ಮಂಗಳವಾರ ಬಂಧಿಸಿದೆ. ಸಲಾಹುದ್ದೀನ್‌ ಜಾಗತಿಕ ಉಗ್ರ ಎಂದು ಈ ಜೂನ್‌ನಲ್ಲಿ ಅಮೆರಿಕ ಘೋಷಿಸಿದೆ.

ಸೌದಿ ಅರೇಬಿಯಾದಲ್ಲಿರುವ ಹಿಜ್ಬುಲ್‌ ಉಗ್ರ ಎಜಾಜ್‌ ಅಹ್ಮದ್‌ ಭಟ್‌ ಎಂಬಾತ ವರ್ಗಾಯಿಸಿದ ಹಣವನ್ನು ಹಿಜ್ಬುಲ್‌ ಮುಜಾಹಿದೀನ್‌ಗೆ ತಲುಪಿಸಿದ ಆರೋಪ ಶಾಹಿದ್‌ ಮೇಲಿದೆ. 2011ರಿಂದ 2014ರ ನಡುವೆ ಕನಿಷ್ಠ ನಾಲ್ಕು ಕಂತುಗಳಲ್ಲಿ ಹಣ ಪಾವತಿಯಾಗಿದೆ ಎಂದು ಮೂಲಗಳು ತಿಳಿಸಿವೆ.

ಕಾಶ್ಮೀರ ವಿವಾದಕ್ಕೆ ಸಂಬಂಧಿಸಿ ‘ಸುಸ್ಥಿರ ಸಂವಾದ’ ನಡೆಸಲು ಸಂಧಾನಕಾರರನ್ನು ನೇಮಿಸಿದ ಮರು ದಿನವೇ ಈ ಬಂಧನ ನಡೆದಿದೆ. ಭಯೋತ್ಪಾದನೆಗೆ ಹಣಕಾಸು ನೆರವು ನೀಡಿರುವ ಪ್ರಕರಣದ ತನಿಖೆಯಲ್ಲಿ ಮಧ್ಯಪ್ರವೇಶಿಸುವುದಿಲ್ಲ ಎಂದು ಕೇಂದ್ರ ಗೃಹ ಸಚಿವ ರಾಜನಾಥ್‌ ಸಿಂಗ್‌ ಅವರು ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ.

ಕೃಷಿ ವಿಜ್ಞಾನದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುವ ಶಾಹಿದ್‌, ಜಮ್ಮು ಮತ್ತು ಕಾಶ್ಮೀರ ಸರ್ಕಾರದ ಕೃಷಿ ಇಲಾಖೆಯ ಗ್ರಾಮ ಕೃಷಿ ವಿಸ್ತರಣಾ ಸಹಾಯಕನಾಗಿ ಕೆಲಸ ಮಾಡುತ್ತಿದ್ದಾನೆ. ಭಾರತದ ಹಲವರೊಂದಿಗೆ ಏಜಾಜ್‌ ಸಂಪರ್ಕ ಹೊಂದಿದ್ದು ಅದರಲ್ಲಿ ಶಾಹಿದ್‌ ಕೂಡ ಒಬ್ಬ ಎಂದು ಎನ್ಐಎ ತಿಳಿಸಿದೆ.

ಶಾಹಿದ್‌ನನ್ನು ನಾಲ್ಕು ಬಾರಿ ತನಿಖೆಗೆ ಒಳಪಡಿಸಲಾಗಿತ್ತು. ಎನ್‌ಐಎ ಮುಂದೆ ಮಂಗಳವಾರ ಮತ್ತೆ ಹಾಜರಾಗುವಂತೆ ಸೂಚಿಸಲಾಗಿತ್ತು. ಮಂಗಳವಾರ ಎನ್‌ಐಎ ಮುಂದೆ ಹಾಜರಾದ ಆತನನ್ನು ಬಂಧಿಸಲಾಗಿದೆ. ಉಗ್ರರಿಗೆ ಹಣಕಾಸು ನೆರವಿನ ಈ ಪ್ರಕರಣ 2011ರಲ್ಲಿ ದಾಖಲಾಗಿದೆ. ಹವಾಲಾ ಮೂಲಕ ದೆಹಲಿ ಮಾರ್ಗವಾಗಿ ಕಾಶ್ಮೀರಕ್ಕೆ ಹಣ ರವಾನೆಯಾಗುತ್ತಿದೆ. ಕಾಶ್ಮೀರದಲ್ಲಿ ಪ್ರತ್ಯೇಕತಾವಾದಿ ಚಟುವಟಿಕೆ ನಡೆಸಲು ಪಾಕಿಸ್ತಾನ ಈ ಹಣ ಪೂರೈಸುತ್ತಿದೆ ಎಂದು ಎನ್‌ಐಎ 2011ರಲ್ಲಿ ಆರೋಪಿಸಿತ್ತು.

ದೆಹಲಿ ಪೊಲೀಸರು ಆರಂಭಿಸಿದ್ದ ತನಿಖೆಯನ್ನು ಬಳಿಕ ಎನ್‌ಐಎ ಕೈಗೆತ್ತಿಕೊಂಡಿತ್ತು. ಪ್ರತ್ಯೇಕತಾವಾದಿ ಸಂಘಟನೆ ಹುರಿಯತ್‌ ಕಾನ್ಫರೆನ್ಸ್‌ನ ಮುಖ್ಯಸ್ಥ ಸಯ್ಯದ್‌ ಅಲಿ ಷಾ ಗಿಲಾನಿಯ ನಿಕಟವರ್ತಿ ಗುಲಾಂ ಮೊಹಮ್ಮದ್‌ ಭಟ್‌ ಸೇರಿ ನಾಲ್ವರನ್ನು ಈಗಾಗಲೇ ಎನ್‌ಐಎ ಬಂಧಿಸಿದೆ. ಮೊಹಮ್ಮದ್‌ ಮಕ್ಬೂಲ್‌ ಪಂಡಿತ್‌ ಮತ್ತು ಎಜಾಜ್‌ ಅಹ್ಮದ್‌ ಭಟ್‌ ಎಂಬ ಇಬ್ಬರು ಆರೋಪಿಗಳು ತಲೆಮರೆಸಿಕೊಂಡಿದ್ದಾರೆ. ಅವರ ವಿರುದ್ಧ ರೆಡ್‌ ಕಾರ್ನರ್‌ ನೋಟಿಸ್‌ ಹೊರಡಿಸಲಾಗಿದೆ.

2008ರಿಂದ ಜನವರಿ 2011ರವರೆಗೆ ಹಿಜ್ಬುಲ್‌ ಉಗ್ರರಿಗೆ ಪಾಕಿಸ್ತಾನದಿಂದ ಕನಿಷ್ಠ ₹6.5 ಕೋಟಿ ನೀಡಲಾಗಿದೆ ಎಂದು ಎನ್ಐಎ ಹೇಳಿದೆ.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry