ಗಿರಿದಿಹ್ (ಜಾರ್ಖಂಡ್): ಕೋಲ್ಕತ್ತದಲ್ಲಿದ್ದ ಮ್ಯಾನ್ಮಾರ್ನ ಕಾನ್ಸಲ್ ಜನರಲ್ ಪ್ವಿ ಸೊ (49) ಅವರು ಶುಕ್ರವಾರ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ. ಜೊತೆಯಲ್ಲಿದ್ದ ಅವರ ಪತ್ನಿ ಸೇರಿದಂತೆ ಮೂವರಿಗೆ ಗಾಯಗಳಾಗಿವೆ.
ಸೊ ಅವರಿದ್ದ ಕಾರು, ಬೈಕ್ಗೆ ಡಿಕ್ಕಿ ಹೊಡೆಯುವುದನ್ನು ತಪ್ಪಿಸುವ ಪ್ರಯತ್ನದಲ್ಲಿದ್ದಾಗ ಎದುರಿನಿಂದ ಬರುತ್ತಿದ್ದ ಲಾರಿಗೆ ಡಿಕ್ಕಿ ಹೊಡೆಯಿತು. ಆಗ ಸೊ ಸ್ಥಳದಲ್ಲೇ ಮೃತಪಟ್ಟರು ಎಂದು ಎಸ್ಪಿ ಅಖಿಲೇಶ್ ಬೆರಿಯಾರ್ ತಿಳಿಸಿದ್ದಾರೆ.
ಸೊ ಅವರ ಪತ್ನಿ ನವೊ, ಸಲಹೆಗಾರ ಟಿನ್ಗುಂಗ್ ಮತ್ತು ಚಾಲಕ ವಿಪಿನ್ ಸಿಂಗ್ ಅವರನ್ನು ರಾಂಚಿಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅವರೆಲ್ಲರೂ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಲಾರಿಯ ಚಾಲಕ ಮತ್ತು ಸಹಾಯಕನನ್ನು ಬಂಧಿಸಲಾಗಿದೆ.
ಸೊ ಅವರ ನಿಧನಕ್ಕೆ ಜಾರ್ಖಂಡ್ ಮುಖ್ಯಮಂತ್ರಿ ರಘುವರ ದಾಸ್ ಸಂತಾಪ ಸೂಚಿಸಿದ್ದಾರೆ. ಸೊ ಅವರು ಕಳೆದ ಡಿಸೆಂಬರ್ 6ರಂದು ಕೋಲ್ಕತ್ತದ ಕಾನ್ಸುಲ್ ಜನರಲ್ ಆಗಿ ನೇಮಕಗೊಂಡಿದ್ದರು.