ಭೂಕಂಪ ಮುನ್ಸೂಚನೆಗೆ ಕೃತಕ ಬುದ್ಧಿಮತ್ತೆ

ಪ್ರಾಕೃತಿಕ ವಿಪತ್ತುಗಳನ್ನು ಎದುರಿಸುವಲ್ಲಿ ಸಿದ್ಧರಾಗಲು ಹಾಗೂ ಸಾಕಷ್ಟು ಜೀವಗಳನ್ನು ಉಳಿಸಲು ಈ ಕೃತಕ ಬುದ್ಧಿಮತ್ತೆ ವ್ಯವಸ್ಥೆ ನೆರವಾಗುವ ಸಾಧ್ಯತೆ ಇದೆ.

ಭೂಕಂಪ ಸಂಭವಿಸುವ ಮೊದಲಿನ ಪ್ರಕ್ರಿಯೆಯಗಳ ಕುರಿತು ಕೇಂಬ್ರಿಜ್ ಹಾಗೂ ಬೋಸ್ಟನ್ ವಿಶ್ವವಿದ್ಯಾಲಯದ ಸಂಶೋಧಕರು ಅಧ್ಯಯನ ನಡೆಸಿದ್ದಾರೆ.

ನೈಜ ಭೂಕಂಪದಮಾದರಿಯಲ್ಲಿಯೇ ಪ್ರಯೋಗಾಲಯದಲ್ಲಿ ಪರಿಸ್ಥಿತಿ ಸೃಷ್ಟಿಸಲಾಗಿತ್ತು. ಈ ಕಂಪನದಿಂದ ಉಂಟಾದ ಧ್ವನಿ ತರಂಗಗಳ ಸಂಕೇತಗಳನ್ನು ಉಪಕರಣಗಳಿಂದ ವಿಶ್ಲೇಷಣೆ ನಡೆಸಲಾಗಿತ್ತು.

ಭೂಕಂಪ ಸಂಭವಿಸುವ ಮೊದಲಿಗೆ ನಿರ್ದಿಷ್ಟ ಮಾದರಿಯ ಧ್ವನಿತರಂಗಗಳು ಸೃಷ್ಟಿಯಾಗುತ್ತವೆ ಎನ್ನುವುದು ಈ ಪ್ರಯೋಗದಲ್ಲಿ ತಿಳಿದುಬಂದಿತು. ಈ ಧ್ವನಿತರಂಗಗಳ ಮಾದರಿಯಿಂದ ಭೂಕಂಪಕ್ಕೆ ಮೊದಲು ಎಷ್ಟು ಒತ್ತಡ ಸೃಷ್ಟಿಯಾಗುತ್ತದೆ ಎಂದು ನಿಖರವಾಗಿ ತಿಳಿಯಬಹುದು ಎಂದು ಸಂಶೋಧಕರು ಹೇಳಿದ್ದಾರೆ.

‘ಭೂಕಂಪ ಸಂಭವಿಸುವುದನ್ನು ಸಾಕಷ್ಟು ಮೊದಲೇ ಅರಿಯಲು, ಉಪಕರಣಗಳನ್ನು ಬಳಸಿಕೊಂಡು ಧ್ವನಿತರಂಗಗಳ ಸಂಕೇತಗಳನ್ನು ವಿಶ್ಲೇಷಿಸಿರುವುದು ಇದೇ ಮೊದಲು. ಇದರಿಂದ ಸಾಕಷ್ಟು ಮೊದಲೇ ಭೂಕಂಪದ ಎಚ್ಚರಿಕೆ ನೀಡ ಬಹುದು’ ಎಂದು ಕೇಂಬ್ರಿಜ್ ವಿಶ್ವವಿದ್ಯಾಲಯದ ಕಾಲಿನ್ ಹಂಫ್ರಿಸ್ ಹೇಳಿದ್ದಾರೆ. ಜಿಯೊಫಿಸಿಕಲ್ ರಿವ್ಯು ಲೆಟರ್ಸ್ ಜರ್ನಲ್‌ನಲ್ಲಿ ಈ ಅಧ್ಯಯನ ವರದಿಯು ಪ್ರಕಟ ಗೊಂಡಿದೆ.