ನವದೆಹಲಿ: ತಮ್ಮ ಹೋಟೆಲ್ ಯಾವ ದರ್ಜೆಯಲ್ಲಿ ಇದೆ ಎಂಬ ಮಾಹಿತಿ ಫಲಕವನ್ನು ಸ್ವಾಗತ ಪ್ರದೇಶದಲ್ಲಿ ಹಾಕುವುದು ಹಾಗೂ ತಮ್ಮ ಅಧಿಕೃತ ಅಂತರ್ಜಾಲ ತಾಣದಲ್ಲಿ ಪ್ರಕಟಿಸುವುದು ಎಲ್ಲ ಹೋಟೆಲ್‌ಗಳಿಗೆ ಇನ್ನುಮುಂದೆ ಕಡ್ಡಾಯವಾಗಲಿದೆ.
ಪ್ರವಾಸೋದ್ಯಮ ಸಚಿವಾಲಯ ಹೊರಡಿಸಿರುವ ಹೊಸ ಮಾರ್ಗಸೂಚಿಯಲ್ಲಿ ಈ ಅಂಶವಿದೆ.
ಹೋಟೆಲ್‌ಗಳು ಒದಗಿಸುವ ಸೌಲಭ್ಯಗಳ ಆಧಾರದಲ್ಲಿ ಐದು ದರ್ಜೆಗಳ‌ಲ್ಲಿ ವಿಂಗಡಿಸಿ, ಒಂದರಿಂದ ಐದರವರೆಗೆ ಸ್ಟಾರ್‌ಗಳನ್ನು ನೀಡಲಾಗುತ್ತದೆ.
‘ಹೋಟೆಲ್ ಉದ್ಯಮದಲ್ಲಿ ಪಾರದರ್ಶಕತೆ ತರಲು ಹಾಗೂ ಅವು ನೀಡುವ ಸೌಲಭ್ಯಗಳ ಕುರಿತು ಸರಳವಾಗಿ ಮಾಹಿತಿ ಸಿಗುವಂತಾಗಲು ಮಾರ್ಗಸೂಚಿಯಲ್ಲಿ ಈ ಅಂಶ ಹೇಳಲಾಗಿದೆ. ಈ ರೀತಿ ದರ್ಜೆಗಳನ್ನು ಪ್ರದರ್ಶಿಸುವುದರಿಂದ ತ್ವರಿತ ಸೇವೆ ನೀಡುವುದು ಸಾಧ್ಯ’ ಎಂದು ಸಚಿವಾಲಯ ತಿಳಿಸಿದೆ.
‘ಹೋಟೆಲ್‌ಗಳ ಆವರಣದಲ್ಲಿರುವ ಮದ್ಯದ ಅಂಗಡಿಗಳನ್ನು ಈ ನಿಯಮದ ಅಡಿ ಪರಿಗಣಿಸಲಾಗುವುದಿಲ್ಲ’ ಎಂದು ವಿವರಿಸಲಾಗಿದೆ. ಇದರ ಅನುಷ್ಠಾನಕ್ಕೆ 90 ದಿನಗಳ ಅವಧಿ ನೀಡಲಾಗಿದೆ.
