‘ಸಾಹೊ’ ಹಿಂದಿ ಡಬ್ಬಿಂಗ್ ಹಕ್ಕು ₹120 ಕೋಟಿ?

ಚಿತ್ರ ಇನ್ನೂ ಚಿತ್ರೀಕರಣದ ಹಂತದಲ್ಲಿ ಇರುವಾಗಲೇ ಹಿಂದಿ ಡಬ್ಬಿಂಗ್ ಹಕ್ಕು ಖರೀದಿಗಾಗಿ ಹಲವು ಸಂಸ್ಥೆಗಳು ಸ್ಪರ್ಧೆಗೆ ಇಳಿದಿವೆ. ಹಣ ಎಷ್ಟಾದರೂ ಖರೀದಿಸಲೇಬೇಕು ಎಂದು ತುದಿಗಾಲಲ್ಲಿ ನಿಂತಿವೆ. ಹೀಗಾಗಿ ಯಾರೂ ಊಹಿಸಲಾಗದಷ್ಟು ಹಣವನ್ನು ಡಬ್ಬಿಂಗ್ ರೈಟ್ಸ್‌ ಮೂಲಕವೇ ಸಾಹೊ ನಿರ್ಮಾಪಕರಿಗೆ ಲಭಿಸಲಿದೆ ಎಂದು ಟಾಲಿವುಡ್‌ನ ಅಂಗಳದಲ್ಲಿ ಪಿಸುಮಾತುಗಳು ಹರಿದಾಡುತ್ತಿವೆ.

ಸುಮಾರು ₹120 ಕೋಟಿಗೆ ಸಾಹೊ ಹಿಂದಿ ಅವತರಣಿಕೆಯೆ ಹಕ್ಕುಗಳು ಮಾರಾಟ ಆಗಲಿವೆ ಎಂದು ಹೇಳಲಾಗುತ್ತಿದೆ. ಈಚೆಗಷ್ಟೇ ಬಾಲಿವುಡ್‌ನ ಖ್ಯಾತ ಚಲನಚಿತ್ರ ನಿರ್ಮಾಣ ಸಂಸ್ಥೆ ಯುವಿ ಕ್ರಿಯೇಷನ್ಸ್‌ ಈ ಬಗ್ಗೆ ಆಲೋಚಿಸುತ್ತಿದೆ ಎಂಬ ಮಾತುಗಳು ಕೇಳಿಬಂದಿವೆ. ತೆಲುಗು ಚಿತ್ರವೊಂದರ ಡಬ್ಬಿಂಗ್ ಹಕ್ಕುಗಳು ಈವರೆಗೆ ಇಷ್ಟೊಂದು ಪ್ರಮಾಣದಲ್ಲಿ ಮಾರಾಟವಾದ ಉದಾಹರಣೆಗಳು ಇಲ್ಲ. ಹೀಗಾಗಿ ತೆರಕಾಣುವ ಮುನ್ನವೇ ಸಾಹೊ ಹೊಸ ದಾಖಲೆ ಬರೆಯಲಿದೆ ಎಂದು ಹೇಳಲಾಗುತ್ತಿದೆ.

ಈಗಾಗಲೇ ಚಿತ್ರದ ಬಜೆಟ್‌ ₹150 ಕೋಟಿ ಮೀರಿದ್ದು, ಇನ್ನೂ ಹೆಚ್ಚಾಗುವ ಸಾಧ್ಯತೆ ಇದೆ. ಬಾಲಿವುಡ್‌ ಬೆಡಗಿ ಶ್ರದ್ಧಾಕಪೂರ್ ಚಿತ್ರದಲ್ಲಿ ಪ್ರಭಾಸ್‌ಗೆ ನಾಯಕಿಯಾಗಿದ್ದಾರೆ. ತೆರೆಕಾಣುವ ಮುನ್ನವೇ ಅಪಾರ ನಿರೀಕ್ಷೆ ಹುಟ್ಟು ಹಾಕಿರುವ ಈ ಚಿತ್ರ ಎಷ್ಟರ ಮಟ್ಟಿಗೆ ರಂಜಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

</p></p>