ಕವಿತೆಗಳಿಗಾಗಿ ಇಲ್ಲಿ ಸಂಪರ್ಕಿಸಿ

ಸಂತೆಯಂಥಾ ಜಗವಿದು
ಕಳ್ಳರೇ ಪ್ರತಿಷ್ಠಾಪಿಸಿ
ಕೈಚಳಕ- ಕರಾಮತ್ತುಗಳ ದಿಖಾಯಿಸುತ್ತಿದ್ದಾರೆ;

ಕವಿತೆ ಅಲ್ಲಿ ಮೂಲೆಗುಂಪು!
ಹರಿವ ನೀರೂ ಜೀವಗಳ- ಹೆಣಗಳ ಜೊತೆ ಜೊತೆಗೊಯ್ಯುತಿದೆ;
ಹೂ ಮುಳ್ಳಿನಂತೆ
ಗಡಿಗಳ ದಾಟದ ಮನುಜ ಅಖಂಡತೆಯ ಮನೆಪಾಠ ಮಾಡಿ
ಮನೆಗೆ ಕಾಂಪೌಂಡ್ ಕಟ್ಟಿ
ಕನ್ನಡಕ ಧರಿಸಿದ್ದಾನೆ...
ಕವಿತೆ ಹಗ್ಗ ಹುಡುಕುತ್ತಿದೆ!
ನಗು ಅಳು ಹಣ ಅಹಂಕಾರ
ಗುರು- ಗುರಿ
ಕಡಲ ಹಡಗುಗಳು ದಡಕಾಗಿ ಚಡಪಡಿಸುತಿವೆ;
ಕವಿತೆ ದೂರದ ಮಾತು!
ತೀರಾ ಅನಿವಾರ್ಯವಾದಲ್ಲಿ

ಕವಿತೆಗಾಗಿ ಇಲ್ಲಿ ಸಂಪರ್ಕಿಸಿ;
ಮನುಷ್ಯರಲ್ಲಿ ಹೊರತುಪಡಿಸಿ!