ಗಾಜಾ: ಇಸ್ರೇಲ್‌ನ 14 ಯೋಧರ ಸಾವು

ಈ ಮೂಲಕ ಇಸ್ರೇಲ್ ಸೇನೆಯ ತೀವ್ರ ದಾಳಿಯಿಂದ ಕಂಗೆಟ್ಟಿರುವ ಹೊರತಾಗಿಯೂ, ಹಮಾಸ್ ಬಂಡುಕೋರರು ಪ್ರತಿರೋಧ ವ್ಯಕ್ತಪಡಿಸಿದಂತಾಗಿದೆ. 

ಯೋಧರು ಇದ್ದ ವಾಹನದ ಮೇಲೆ ನಡೆದ ಕ್ಷಿಪಣಿ ದಾಳಿಯಲ್ಲಿ ನಾಲ್ವರು ಯೋಧರು ಸಾವನ್ನಪ್ಪಿದ್ದಾರೆ. ಉಳಿದ 10 ಯೋಧರು ಪ್ರತ್ಯೇಕ ದಾಳಿಗಳಲ್ಲಿ ಹುತಾತ್ಮರಾಗಿದ್ದಾರೆ. ಈ ಮೂಲಕ ಇಸ್ರೇಲ್–ಹಮಾಸ್ ಬಂಡುಕೋರರ ನಡುವಿನ ಯುದ್ಧದಲ್ಲಿ ಈವರೆಗೆ 153 ಸೈನಿಕರು ಮೃತಪಟ್ಟಿದ್ದಾರೆ ಎಂದು ಇಸ್ರೇಲ್ ಸೇನೆಯ ರೇಡಿಯೊ ತಿಳಿಸಿದೆ. 

ಗಾಜಾದ ಎರಡನೇ ಅತಿದೊಡ್ಡ ನಗರವಾಗಿರುವ ಖಾನ್ ಯೂನಿಸ್‌ ಪ್ರದೇಶದಲ್ಲಿ ಹಮಾಸ್ ನಾಯಕರು ಅಡಗಿದ್ದಾರೆ ಎಂಬ ಕಾರಣಕ್ಕೆ ಗಾಜಾದ ದಕ್ಷಿಣ ಮತ್ತು ಉತ್ತರ ಭಾಗದಲ್ಲಿ ದಾಳಿ ಮುಂದುವರಿಸಲಾಗಿದೆ ಎಂದು ಇಸ್ರೇಲ್ ಸೇನೆಯ ವಕ್ತಾರ ತಿಳಿಸಿದ್ದಾರೆ. 

ಈ ನಡುವೆ, ಭಾನುವಾರ ಸಚಿವ ಸಂಪುಟದ ಸಭೆ ನಡೆಸಿದ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು, ‘ಈ ಯುದ್ಧಕ್ಕೆ ನಾವು ಹೆಚ್ಚು ಬೆಲೆ ತೆರುವಂತಾಗಿದೆ. ಆದರೆ, ಯುದ್ಧ ಮುಂದುವರಿಸುವುದನ್ನು ಹೊರತುಪಡಿಸಿ, ಬೇರೆ ಆಯ್ಕೆಗಳಿಲ್ಲ. ನಾವು ಗೆಲ್ಲುವವರೆಗೆ, ನಮ್ಮ ಗುರಿ ಮುಟ್ಟುವವರೆಗೆ ನಮ್ಮೆಲ್ಲ ಶಕ್ತಿಗಳನ್ನು ವಿನಿಯೋಗಿಸಿ, ಯುದ್ಧವನ್ನು ಮುಂದುವರಿಸುತ್ತೇವೆ’ ಎಂದು ಹೇಳಿದ್ದಾರೆ.