ಸಂಪಾದಕೀಯ | ಗೆಹಲೋತ್ ನಡೆ ಅಭಿನಂದನೀಯ; ರಾಜ್ಯಪಾಲ ರವಿ ವರ್ತನೆ ಖಂಡನೀಯ

ತಮ್ಮ ನೀತಿಗಳನ್ನು, ಸಾಮಾಜಿಕ ಮತ್ತು ರಾಜಕೀಯ ನಿಲುವುಗಳನ್ನು ರಾಜ್ಯಪಾಲರ ಭಾಷಣದ ಮೂಲಕ ಹೇಳುವ ಅಧಿಕಾರವು ರಾಜ್ಯ ಸರ್ಕಾರಗಳಿಗೆ ಇದೆ. ಕೇಂದ್ರ ಸರ್ಕಾರದ ನೀತಿಗಳು ಹಾಗೂ ಕಾರ್ಯಗಳು ತನಗೆ ಒಪ್ಪಿಗೆ ಆಗದಿದ್ದರೆ ಅವುಗಳನ್ನು ಟೀಕಿಸುವ ಅಧಿಕಾರ ಕೂಡ ರಾಜ್ಯ ಸರ್ಕಾರಗಳಿಗೆ ಇದ್ದೇ ಇದೆ. ವಾಸ್ತವದಲ್ಲಿ ಆ ಭಾಷಣವು ರಾಜ್ಯ ಸರ್ಕಾರದ್ದು. ಆದರೆ, ಸರ್ಕಾರದ ಮುಖ್ಯಸ್ಥ ರಾಜ್ಯಪಾಲ ಆಗಿರುವ ಕಾರಣ, ಆ ಭಾಷಣವನ್ನು ರಾಜ್ಯಪಾಲರು ಮಾಡುತ್ತಾರೆ. ರಾಜ್ಯಪಾಲ ಥಾವರಚಂದ್ ಗೆಹಲೋತ್ ಅವರು ಭಾಷಣದಲ್ಲಿ ಸ್ಥಾಪಿತ ನಿಯಮಗಳನ್ನು ತುಸುವೂ ತಪ್ಪದೆ ಇದ್ದುದರ ಕಾರಣಕ್ಕಾಗಿ, ಅವರಿಗೆ ಅಭಿನಂದನೆಗಳು ಸಲ್ಲಬೇಕು. ರಾಜ್ಯಗಳ ರಾಜ್ಯ‍ಪಾಲರು, ರಾಷ್ಟ್ರಪತಿಯವರ ಪ್ರತಿನಿಧಿ ಆಗಿರುತ್ತಾರೆಯೇ ವಿನಾ ಅವರು ಕೇಂದ್ರ ಸರ್ಕಾರದ ರಾಜಕೀಯ ಪ್ರತಿನಿಧಿ ಆಗಿರುವುದಿಲ್ಲ.

ರಾಜ್ಯ ಸರ್ಕಾರವು ರಾಜಕೀಯ ಸಂಗತಿಗಳನ್ನು ಮಾತನಾಡಬಹುದು, ರಾಜಕೀಯ ನೆಲೆಯಲ್ಲಿ ಕ್ರಮಗಳನ್ನು ಕೈಗೊಳ್ಳಬಹುದು. ಆದರೆ ರಾಜ್ಯಪಾಲರು ರಾಜಕೀಯದಲ್ಲಿ ಭಾಗಿಯಾಗಬಾರದು. ಇಂದು ಯಾವುದಾದರೂ ರಾಜ್ಯದ ರಾಜ್ಯಪಾಲರು ಸರಿಯಾಗಿ ನಡೆದುಕೊಂಡರೆ ಅದು ಉಲ್ಲೇಖಿಸಲು ಅಥವಾ ಶ್ಲಾಘಿಸಲು ಅರ್ಹವಾಗಿ ಪರಿಣಮಿಸಿರುವುದು ಕಾಲದ ವ್ಯಂಗ್ಯ. ತಮಿಳುನಾಡಿನ ರಾಜ್ಯಪಾಲರು ಹಾಗೂ ಕೇರಳದ ರಾಜ್ಯಪಾಲ ಆರಿಫ್ ಮೊಹಮ್ಮದ್ ಖಾನ್ ಅವರು ತಮ್ಮ ಭಾಷಣದ ವಿಚಾರವಾಗಿ ತಕ್ಕುದಲ್ಲದ ರೀತಿಯಲ್ಲಿ ನಡೆದುಕೊಂಡರು. ಹೀಗಾಗಿಯೇ, ಕರ್ನಾಟಕದ ರಾಜ್ಯಪಾಲರ ನಡೆಯು ಪ್ರತ್ಯೇಕವಾಗಿ ನಿಲ್ಲುತ್ತದೆ.

ಕೇರಳ ಹಾಗೂ ತಮಿಳುನಾಡಿನ ರಾಜ್ಯಪಾಲರು ತಮಗೆ ನೀಡಿದ್ದ ಭಾಷಣದಲ್ಲಿನ ಕೆಲವು ವಾಕ್ಯಗಳನ್ನು ಮಾತ್ರ ಓದಿದರು. ವಿಧಾನಸಭೆಯಲ್ಲಿ ತಮ್ಮ ಉಪಸ್ಥಿತಿಯನ್ನು ಒಂದು ಪ್ರಹಸನದ ಮಟ್ಟಕ್ಕೆ ಇಳಿಸಿದರು. ಭಾಷಣದಲ್ಲಿ ತಪ್ಪುದಾರಿಗೆ ಎಳೆಯುವ ಅಂಶಗಳು ಇದ್ದವು ಎಂದು ರವಿ ಹೇಳಿದ್ದಾರೆ. ಅವುಗಳನ್ನು ಓದುವುದು ಸಂವಿಧಾನವನ್ನು ನಗೆಪಾಟಲಿಗೆ ಈಡುಮಾಡಿದಂತೆ ಆಗುತ್ತಿತ್ತು ಎಂದು ಕೂಡ ಅವರು ಹೇಳಿದ್ದಾರೆ. ರವಿ ಅವರು ರಾಷ್ಟ್ರಗೀತೆ ನುಡಿಸುವ ಮೊದಲೇ ಸದನದಿಂದ ಹೊರನಡೆದರು ಎಂದು ವರದಿಯಾಗಿದೆ. ಕಳೆದ ವರ್ಷ ಕೂಡ ರವಿ ಅವರು ತಮ್ಮ ಭಾಷಣವನ್ನು ಸರಿಯಾದ ಕ್ರಮದಲ್ಲಿ ಮಾಡಿರಲಿಲ್ಲ. ಅಲ್ಲದೆ, ಭಾಷಣದಲ್ಲಿ ತಮ್ಮದೇ ಮಾತುಗಳನ್ನು ಸೇರಿಸಲು ಯತ್ನಿಸಿದ್ದರು.

ಕಳೆದ ವರ್ಷದಂತೆಯೇ, ತಮಿಳುನಾಡಿನ ಡಿಎಂಕೆ ನೇತೃತ್ವದ ಸರ್ಕಾರವು ಕೇಂದ್ರದ ನೀತಿಗಳನ್ನು ಹಾಗೂ ಕ್ರಮಗಳನ್ನು ಈ ವರ್ಷವೂ ಟೀಕಿಸಿದೆ. ಟೀಕೆ ಇರುವ ಸಾಲುಗಳನ್ನು ರಾಜ್ಯಪಾಲರು ಓದಬೇಕಿತ್ತು. ಆದರೆ ಆ ಸಾಲುಗಳನ್ನು ಓದಲು ರಾಜ್ಯಪಾಲರು ನಿರಾಕರಿಸಿರುವುದು ಸಂವಿಧಾನವನ್ನು ನಗೆಪಾಟಲು ಮಾಡಿದ್ದಕ್ಕೆ ಸಮ. ರಾಜ್ಯಪಾಲರು ನಡೆದುಕೊಂಡ ಬಗೆಯು ಅಲ್ಲಿನ ವಿಧಾನಸಭೆಗೆ ಅಗೌರವ ತೋರಿಸಿದಂತೆ ಇದೆ. ಭಾಷಣದ ಬಗ್ಗೆ ಟೀಕೆಗಳನ್ನು ಮಾಡಲು ರಾಜ್ಯಪಾಲರಿಗೆ ಅಧಿಕಾರ ಇಲ್ಲ. ಆ ಅಧಿಕಾರ ಇರುವುದು ವಿರೋಧ ಪಕ್ಷಗಳಿಗೆ ಹಾಗೂ ಜನರಿಗೆ.