ಬುಧವಾರ, ಮೇ 12, 2021
27 °C

ರಾಜಕೀಯ ಬೇಡ: ವಿಜ್ಞಾನಿಗಳ ಮಾತುಗಳಿಗೆ ಬೆಲೆ ಕೊಡಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಪಶ್ಚಿಮಘಟ್ಟಗಳ ಸೂಕ್ಷ್ಮ ಪರಿಸರ ಮತ್ತು ಜೀವವೈವಿಧ್ಯ ರಕ್ಷಣೆಗಾಗಿ ವಿಜ್ಞಾನಿ ಡಾ.ಕೆ. ಕಸ್ತೂರಿರಂಗನ್‌ ನೀಡಿರುವ ವರದಿ ಅನುಷ್ಠಾನಕ್ಕೆ ಕೇಂದ್ರ ಪರಿಸರ ಸಚಿವಾಲಯ ಹೊರಡಿಸಿದ್ದ ಕರಡು ಅಧಿಸೂಚನೆ, ಕರ್ನಾಟಕದ ಭಾರಿ ವಿರೋಧದಿಂದಾಗಿ ಮತ್ತೊಮ್ಮೆ ರದ್ದಾಗಿದೆ. ಇದರಿಂದಾಗಿ ಮೂರನೇ ಬಾರಿಗೆ ಹೊರಡಿಸಿದ್ದ ಕರಡು ಅಧಿಸೂಚನೆಯೂ ನನೆಗುದಿಗೆ ಬಿದ್ದಂತಾಗಿದೆ. ಕರ್ನಾಟಕ ಸೇರಿದಂತೆ ಗುಜರಾತ್‌, ಮಹಾರಾಷ್ಟ್ರ, ಗೋವಾ, ತಮಿಳುನಾಡು ಹಾಗೂ ಕೇರಳ ರಾಜ್ಯಗಳನ್ನು ಆವರಿಸಿರುವ ಪಶ್ಚಿಮಘಟ್ಟ, ಜೀವವೈವಿಧ್ಯಗಳ ವಿಶಿಷ್ಟ ತಾಣ. ಇಲ್ಲಿ 45 ಸಾವಿರ ಸಸ್ಯಪ್ರಭೇದ ಮತ್ತು ಜೀವ ಜಗತ್ತಿನ 91 ಸಾವಿರ ಪ್ರಾಣಿ, ಪಕ್ಷಿ, ಕೀಟ ಪ್ರಭೇದಗಳು ಆಶ್ರಯ ಪಡೆದಿವೆ. ಕರ್ನಾಟಕದಲ್ಲಿ 20,668 ಚದರ ಕಿ.ಮೀ.ನಷ್ಟು ವಿಸ್ತಾರದಲ್ಲಿ ಪಶ್ಚಿಮಘಟ್ಟ ಶ್ರೇಣಿಗಳು ವ್ಯಾಪಿಸಿಕೊಂಡಿವೆ. ಇಂತಹ ಅಪರೂಪದ ಘಟ್ಟವನ್ನು ಉಳಿಸಲು ಕಸ್ತೂರಿರಂಗನ್‌ ನೀಡಿರುವ ವರದಿಯನ್ನು ಜಾರಿ ಮಾಡಲು ಕೇಂದ್ರ ಸರ್ಕಾರ ಮಾಡುತ್ತಿರುವ ಪ್ರಯತ್ನಕ್ಕೆ ಕರ್ನಾಟಕ ಕೊಡಲಿ ಪೆಟ್ಟು ನೀಡುತ್ತಿರುವುದು ನಾಚಿಕೆಗೇಡು. ರಾಜ್ಯದ 33 ತಾಲ್ಲೂಕುಗಳ 1576 ಹಳ್ಳಿಗಳ ವ್ಯಾಪ್ತಿಯ ಕಾಡಿನಲ್ಲಿರುವ ಜೀವಜಗತ್ತನ್ನು ಸಂರಕ್ಷಿಸುವ ಉದ್ದೇಶದಿಂದ ಇವನ್ನು ಸೂಕ್ಷ್ಮ ಪರಿಸರ ಪ್ರದೇಶವೆಂದು ಘೋಷಿಸಬೇಕಾಗಿದೆ. ಇದು ಜಾರಿಯಾದರೆ ಈ ಪ್ರದೇಶದ ಜೀವವೈವಿಧ್ಯವನ್ನು ಸಂರಕ್ಷಿಸಲು ಗಣಿಗಾರಿಕೆ, ಭಾರಿ ಪ್ರಮಾಣದಲ್ಲಿ ವಸಾಹತು ಸ್ಥಾಪನೆ, ಕೆಂಪು ವರ್ಗದಲ್ಲಿ ಬರುವ ಕೈಗಾರಿಕೆ ತಲೆಎತ್ತದಂತೆ ನಿಷೇಧ ಹೇರಲಾಗುತ್ತದೆ.  ಆದರೆ ಇದರ ವ್ಯಾಪ್ತಿಯಲ್ಲಿ ಬರುವ ಹಳ್ಳಿಗಳನ್ನು ಎತ್ತಂಗಡಿ ಮಾಡುವ ಪ್ರಸ್ತಾವವೇನೂ ಇಲ್ಲ. ರಸ್ತೆ ನಿರ್ಮಿಸಲು ಅವಕಾಶವಿದೆ. ಪರಿಸರ ಪ್ರವಾಸೋದ್ಯಮಕ್ಕೂ ಅವಕಾಶವಿದೆ. ಹೀಗಿದ್ದೂ ಘಟ್ಟ ಪ್ರದೇಶದ ಕೆಲ ಜನಪ್ರತಿನಿಧಿಗಳು ವರದಿ ಅನುಷ್ಠಾನಕ್ಕೆ ವಿರೋಧ ಮಾಡುತ್ತಿದ್ದಾರೆ. ಇದಕ್ಕೆ ಮಣಿದ ರಾಜ್ಯ ಸರ್ಕಾರ ಸಾರಾಸಗಟಾಗಿ ವರದಿ ಅನುಷ್ಠಾನಕ್ಕೆ ವಿರೋಧ ವ್ಯಕ್ತಪಡಿಸಿದೆ. ಇದು ಸರಿಯಲ್ಲ. ಇತ್ತೀಚೆಗೆ ಕೇರಳ ಹಾಗೂ ಕೊಡಗು ಅನುಭವಿಸಿದ ಪ್ರವಾಹ ಪರಿಸ್ಥಿತಿ ನಮಗೆ ಪಾಠವಾಗಬೇಕು. ಪಶ್ಚಿಮಘಟ್ಟಗಳ ಕುರಿತಂತೆ ಮಾಧವ ಗಾಡ್ಗೀಳ್  ಹಾಗೂ ಕಸ್ತೂರಿ ರಂಗನ್ ವರದಿಗಳ ಬಗ್ಗೆ ಸರ್ಕಾರಗಳು ತೋರಿದ ನಿರ್ಲಕ್ಷ್ಯದ ಬಗ್ಗೆ ಈ ಸಂದರ್ಭದಲ್ಲಿ ನಡೆದ ಚರ್ಚೆಗಳನ್ನು ಜನಪ್ರತಿನಿಧಿಗಳು ಗಂಭೀರವಾಗಿ ಪರಿಗಣಿಸಬೇಕು.

 ಘಟ್ಟ ಪ್ರದೇಶದಲ್ಲಿ ನಿಯಂತ್ರಣವೇ ಇಲ್ಲದ ಅಭಿವೃದ್ಧಿಗೆ ರಾಜ್ಯ ಈಗಾಗಲೇ ಬೆಲೆ ತೆತ್ತಿದೆ. ಭಾರಿ ಮಳೆಯಿಂದ ಕೊಡಗು, ದಕ್ಷಿಣ ಕನ್ನಡ, ಚಿಕ್ಕಮಗಳೂರಿನ ಕೆಲ ಭಾಗಗಳಲ್ಲಿ  ಉಂಟಾದ ಭೂಕುಸಿತದಿಂದ ವ್ಯಾಪಕವಾದ ಹಾನಿಯಾಗಿದೆ. ಜನ ನೆಲೆತಪ್ಪಿದ್ದಾರೆ. ಕಾಫಿ ತೋಟ, ಕಾಡು, ರಸ್ತೆಗಳಿಗೆ ಹಾನಿಯಾಗಿದೆ. ‘ವರದಿ ಜಾರಿ ಮಾಡಿ’ ಎಂದು ಮಡಿಕೇರಿಗೆ ಭೇಟಿ ನೀಡಿದ್ದ  ಕೇಂದ್ರ ರಕ್ಷಣಾ ಸಚಿವರ ಬಳಿ ಸಾರ್ವಜನಿಕರೇ ಒತ್ತಾಯಿಸಿದರೂ, ಕೊಡಗಿನ ಶಾಸಕರು ವಿರೋಧ ವ್ಯಕ್ತಪಡಿಸಿದ್ದಾರೆ ಎಂದು ವರದಿಯಾಗಿದೆ. ಈ ವಿಚಾರದಲ್ಲಿ ಜನಪ್ರತಿನಿಧಿಗಳಿಗೆ ವರದಿಯ ಬಗ್ಗೆ ತಿಳಿವಳಿಕೆ ಕೊರತೆಯಿದೆ ಇಲ್ಲವೇ ದುರುದ್ದೇಶದಿಂದ ವರದಿ ಜಾರಿಗೆ ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ ಎನ್ನುವ ಅನುಮಾನ ಮೂಡುತ್ತದೆ. ಈ ಹಿಂದೆ ಪಶ್ಚಿಮಘಟ್ಟಗಳಿಗೆ ಯುನೆಸ್ಕೊ ಮಾನ್ಯತೆ ನೀಡುವ ಸಂದರ್ಭದಲ್ಲೂ ಜನಪ್ರತಿನಿಧಿಗಳಿಂದಲೇ ವಿರೋಧ ಬಂದಿತ್ತು. ವರದಿಯಲ್ಲಿ ನಿಜಕ್ಕೂ ಏನಿದೆ ಎಂಬುದೂ ಹೆಚ್ಚಿನವರಿಗೆ ಸರಿಯಾಗಿ ತಿಳಿದಂತಿಲ್ಲ.ಈ ಬಗ್ಗೆ ಸೂಕ್ತ ಚರ್ಚೆಗಳಾಗುವುದು ಅವಶ್ಯ. ಗ್ರಾಮ ಮಟ್ಟದಲ್ಲಿ  ತಜ್ಞರ ಜೊತೆಗೆ ಚರ್ಚೆಗಳನ್ನು ಏರ್ಪಡಿಸುವುದು ಅವಶ್ಯ.  ಪರಿಸರ ಮತ್ತು ಅಪರೂಪದ ಜೀವಜಗತ್ತಿನ ಉಳಿವಿಗೆ ವಿಜ್ಞಾನಿಗಳು ಅಧ್ಯಯನ ನಡೆಸಿ ನೀಡಿದ ವರದಿಗೆ ಸರ್ಕಾರ ಬೆಲೆ ನೀಡಲಿ. ಇಲ್ಲವಾದರೆ  ನೈಸರ್ಗಿಕ ವಿಕೋಪಗಳನ್ನು ಮತ್ತೆ ಮತ್ತೆ ಎದುರಿಸುವ ಸ್ಥಿತಿ ಸೃಷ್ಟಿಯಾಗುತ್ತದೆ ಎಂಬ ಎಚ್ಚರ ನಮಗಿರಬೇಕು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು