ವಾಜಪೇಯಿ ಶ್ರದ್ಧಾಂಜಲಿ ರೂಪದ ಲೇಖನದಲ್ಲಿ ಮೋದಿ ಬಗ್ಗೆ ಹೇಳಿರುವುದು ಎಷ್ಟು ಸರಿ?

‘ಅಟಲ್‌ ಬಿಹಾರಿ: ಮುಖವೇ ಮುಖವಾಡವೇ?’ (ದೆಹಲಿ ನೋಟ, ಆ. 20) ಓದಿ ಅಚ್ಚರಿಯಾಯಿತು. ಪ್ರಧಾನಿ ಮೋದಿ ಬಗ್ಗೆ ನೇರವಾಗಿ ಬರೆದಿದ್ದರೆ ಅಂಥ ಅಚ್ಚರಿ ಆಗುತ್ತಿರಲಿಲ್ಲ. ಆದರೆ ವಾಜಪೇಯಿ ಅವರ ಶ್ರದ್ಧಾಂಜಲಿ ರೂಪದ ಲೇಖನದಲ್ಲಿ ಮೋದಿ ಹಾಗೂ ಮೋದಿ ಬಗ್ಗೆ ಮಾತ್ರ ಹೇಳಿರುವುದು ಎಷ್ಟು ಸರಿ?

ಗೋವಿಂದಾಚಾರ್ಯ ಅವರ ಮಾತನ್ನು ಸಹ ಲೇಖಕರು ತಪ್ಪಾಗಿ ವ್ಯಾಖ್ಯಾನ ಮಾಡಿದ್ದಾರೆ. ಲೇಖಕರು ಒಂದು ಮಾತನ್ನು ನೆನಪಿಟ್ಟುಕೊಳ್ಳಬೇಕು: ಈಗ ಕಾಲ ಬದಲಾಗಿದೆ. ಸ್ವತಂತ್ರವಾಗಿ ತಮ್ಮ ಆಲೋಚನೆಗಳನ್ನು ವ್ಯಕ್ತಪಡಿಸಲು ಇಂದು ಅನೇಕ ಮಾಧ್ಯಮಗಳಿವೆ. ಬೇರೆ ಬೇರೆ ಮೂಲಗಳಿಂದಲೂ ಜನರಿಗೆ ಮಾಹಿತಿ ದೊರೆಯುತ್ತದೆ. ಮೋದಿಗೆ ವೋಟು ಹಾಕಿರುವ ಎಲ್ಲರೂ ಅವರ ಎಲ್ಲಾ ನಿರ್ಧಾರಗಳನ್ನು ಒಪ್ಪುವುದಿಲ್ಲ. ಹಾಗೆಯೇ ಮೋದಿಯನ್ನು ವಿರೋಧಿಸುವವರು ಸಹ ಅವರ ಕೆಲವು ನಿರ್ಧಾರಗಳನ್ನು ಒಪ್ಪುತ್ತಾರೆ.

‘ರಾಜಧರ್ಮ’ ಹೇಳಿಕೆಯ ಬಗ್ಗೆ ಲೇಖಕರು ಬರೆದಿರುವ ಅಭಿಪ್ರಾಯವನ್ನೇ ನಾನೂ ತಳೆದಿದ್ದೆ. ಆದರೆ ವಾಜಪೇಯಿ ಅವರ ಪೂರ್ತಿ ಹೇಳಿಕೆಯ ವಿಡಿಯೊವನ್ನು ಅಂತರ್ಜಾಲದಲ್ಲಿ ನೋಡಿದ ಬಳಿಕ ನನ್ನ ಅಭಿಪ್ರಾಯ ಬದಲಾಗಿದೆ.

-ಡಾ. ವೆಂಕಟೇಶ ಪ್ರಸಾದ್, ಡೆಲ್‌ಫ್ಟ್‌, ನೆದರ್ಲೆಂಡ್ಸ್‌