ಹಂಪಿಯಲ್ಲಿ ಕಳೆದ ನಾಲ್ಕು ದಿನಗಳಿಂದ ಹಸಿದಿದ್ದ ಮಂಗಗಳಿಗೆ ವಿವಿಧ ಸಂಘಗಳ ಸದಸ್ಯರು ಸೇರಿ ಆಹಾರ ನೀಡುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ. ಹಾಗಿದ್ದರೆ ಮಂಗಗಳೇಕೆ ನಾಲ್ಕು ದಿನಗಳಿಂದ ಉಪವಾಸದಿಂದ ಇದ್ದವು ಎಂಬುದು ಇಲ್ಲಿ ಗಮನಿಸಬೇಕಾದ ಅಂಶ. ಏಕೆಂದರೆ, ಹಂಪಿಗೆ ಬರುವ ಪ್ರವಾಸಿಗರು ನೀಡುವ ಆಹಾರವನ್ನೇ ಇವು ಸಂಪೂರ್ಣವಾಗಿ ಅವಲಂಬಿಸಿ, ಸ್ವಂತಕ್ಕೆ ಆಹಾರ ಸಂಪಾದನೆ ಮಾಡುವ ಕೌಶಲವನ್ನೇ ಮರೆತಿವೆ. ಪ್ರವಾಸಿಗರ ಸಂಖ್ಯೆಯ ಮೇಲೆ ಮಂಗಗಳ ಆಹಾರದ ಲಭ್ಯತೆಯ ಪ್ರಮಾಣ ನಿಂತಿದೆ. ಯಾವಾಗ ಪ್ರವಾಸಿಗರ ಸಂಖ್ಯೆ ಇಳಿಮುಖಗೊಳ್ಳುವುದೋ ಆಗ ಮಂಗಗಳಿಗೆ ಆಹಾರದ ಸಮಸ್ಯೆ ಎದುರಾಗುತ್ತದೆ.
