ಒಂಬತ್ತನೇ ತರಗತಿಯ ಹುಡುಗಿಯೊಬ್ಬಳು ತನ್ನ ವಿಜ್ಞಾನ ಪಠ್ಯಪುಸ್ತಕದ 12 ಪುಟಗಳು ಇಲ್ಲವೇ ಇಲ್ಲ. ಏನು ಮಾಡುವುದು ಎಂದು ಗೋಳಾಡುತ್ತಿದ್ದಳು. ‘ಅದನ್ನು (ಉಚಿತವಾಗಿ) ಪೂರೈಕೆ ಮಾಡಿದ ನಿನ್ನ ಶಾಲಾ ಶಿಕ್ಷಕರಿಗೆ ಕೇಳು’ ಎಂದು ಹೇಳಿದೆ. ಶಿಕ್ಷಕರು ‘ಆ ಪುಟಗಳನ್ನು ಜೆರಾಕ್ಸ ಮಾಡಿಸಿಕೊಂಡು ಬಿಡು’ ಎಂದು ಸೂಚಿಸಿದರಂತೆ (ಜೆರಾಕ್ಸ ಪ್ರತಿಯಲ್ಲಿ ಚಿತ್ರಗಳು ಬಣ್ಣದ್ದಾಗಿರುವುದಿಲ್ಲ).
ಅವಳದು ಅನುದಾನಿತ ಶಾಲೆಯಾದ್ದರಿಂದ ಪಠ್ಯಪುಸ್ತಕ ಉಚಿತವಾಗಿ ಪೂರೈಕೆಯಾಗಿದೆ. ಆದರೆ ಅನುದಾನರಹಿತ ಶಾಲೆಯ ವಿದ್ಯಾರ್ಥಿಗೆ ಹೀಗಾದರೆ, ಹಣ ಕೊಟ್ಟು ಪಠ್ಯಪುಸ್ತಕ ಕೊಂಡಿರುವುದರಿಂದ ‘ಗ್ರಾಹಕ ಹಿತರಕ್ಷಣಾ ಕಾಯ್ದೆ’ ಅನ್ವಯ ದೂರು ಸಲ್ಲಿಸಬಹುದಾಗಿದೆ. ಉಚಿತವಾಗಿ ಇಲಾಖೆಯಿಂದ ಒಬ್ಬ ವಿದ್ಯಾರ್ಥಿಗೆ ಪೂರೈಕೆಯಾದ ಪಠ್ಯ ಪುಸ್ತಕವಾದರೂ ದೋಷಪೂರಿತವಾಗಿದ್ದರೆ ಅದನ್ನು ಸರಿಪಡಿಸುವ ವ್ಯವಸ್ಥೆ ಇಲ್ಲದಿದ್ದರೆ ಅನ್ಯಾಯವಾಗುತ್ತದೆ.
ಠ್ಯಪುಸ್ತಕ ಕಳೆದುಹೋದರೆ ಅಥವಾ ಹಾಳಾದರೆ ಬೇರೆ ಪಠ್ಯಪುಸ್ತಕ ಕೊಳ್ಳಲು ಈಗ ಭಾರೀ ಪರದಾಟ ಆಗುತ್ತದೆ. ಬ್ಯಾಂಕಿನಲ್ಲಿ ಅಥವಾ ಖಜಾನೆಯಲ್ಲಿ ಕ್ಷೇತ್ರ ಶಿಕ್ಷಣಾಧಿಕಾರಿಯವರ ಖಾತೆಗೆ ಆ ಪುಸ್ತಕದ ಮುಖಬೆಲೆಯ ಹಣ ತುಂಬಿ, ಕೌಂಟರ್ ಫಾಯಿಲ್ ಅನ್ನು ತಂದು ತೋರಿಸಿದರೆ, ಬಿ.ಇ.ಒ. ಕಚೇರಿಯಲ್ಲಿ ಪುಸ್ತಕ (ಅದು ಅಲ್ಲಿದ್ದರೆ) ಪಡೆಯಬಹುದಾಗಿದೆ. ಗ್ರಾಮೀಣ ಭಾಗದ ವಿದ್ಯಾರ್ಥಿಗಳ ಪಠ್ಯಪುಸ್ತಕ ಹೀಗೇನಾದರೂ ಆದರೆ ದೇವರೇ ಅವರನ್ನು ಕಾಪಾಡಬೇಕು!
30–40 ಪುಸ್ತಕದ ಅಂಗಡಿಗಳು ನಡೆಸುವಷ್ಟು ವಹಿವಾಟು ಬಿ.ಇ.ಒ. ಕಚೇರಿಗಳು ನಡೆಸುತ್ತಿವೆ. ಪ್ರತ್ಯೇಕ ಸಿಬ್ಬಂದಿ ಇಲ್ಲ. ಶಿಕ್ಷಕರೇ ಪುಸ್ತಕ ವಿತರಣಕಾರರೂ ಹಾಗೂ ಮಾರಾಟಗಾರರೂ ಆಗಿದ್ದಾರೆ.