ಕರಾಚಿ (ಪಿಟಿಐ): ಹದಿನೈದು ವರ್ಷದ ಬಾಲಕಿ ಅರೂಬ್ ಶಾ ಅವರನ್ನು ಪಾಕಿಸ್ತಾನದ ಏಕದಿನ ಮತ್ತು ಟ್ವೆಂಟಿ–20 ಮಹಿಳಾ ತಂಡಗಳಲ್ಲಿ ಸ್ಥಾನ ಗಳಿಸಿದ್ದಾರೆ.
ಮಲೇಷ್ಯಾದಲ್ಲಿ ನಡೆಯಲಿರುವ ಇಂಗ್ಲೆಂಡ್ ವಿರುದ್ಧದ ಸರಣಿಯಲ್ಲಿ ತಂಡವು ಆಡಲಿದೆ. ಬುಧವಾರ ನಡೆದ ಆಯ್ಕೆ ಸಮಿತಿ ಸಭೆಯಲ್ಲಿ ತಂಡವನ್ನು ಪ್ರಕಟಿಸಲಾಯಿತು. ಲೆಗ್‌ಸ್ಪಿನ್ನರ್ ಅರೂಬ್ ಅದರಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ.
‘ಬಾಂಗ್ಲಾದೇಶ ವಿರುದ್ಧ ನಡೆದಿದ್ದ ಸರಣಿಯಲ್ಲಿ ಅರೂಬ್ ಉತ್ತಮವಾಗಿ ಆಡಿದ್ದರು. ಭರವಸೆಯ ಪ್ರತಿಭೆಯಾಗಿರುವ ಬಾಲಕಿಗೆ ಅವಕಾಶ ನೀಡಲಾಗಿದೆ’ ಎಂದು ಆಯ್ಕೆ ಸಮಿತಿ ಮುಖ್ಯಸ್ಥರಾದ ಉರೂಜ್ ಮುಮ್ತಾಜ್ ಹೇಳಿದ್ದಾರೆ.
ಈಚೆಗೆ ಲಾಹೋರ್‌ನಲ್ಲಿ ಬಾಂಗ್ಲಾ ವಿರುದ್ಧ ನಡೆದಿದ್ದ ಏಕದಿನ ಪಂದ್ಯದಲ್ಲಿ ಅರೂಬ್ ಅವರು (37ಕ್ಕೆ2) ಉತ್ತಮವಾಗಿ ಬೌಲಿಂಗ್ ಮಾಡಿದ್ದರು.
ಇಂಗ್ಲೆಂಡ್ ಮಹಿಳಾ ತಂಡವು ಪಾಕಿಸ್ತಾನಕ್ಕೆ ಬಂದು ಸರಣಿ ಆಡಲು ನಿರಾಕರಿಸಿತ್ತು. ಆದ್ದರಿಂದ ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯು ಮಲೇಷ್ಯಾದಲ್ಲಿ ಟೂರ್ನಿಯನ್ನು ಆಯೋಜಿಸುತ್ತಿದೆ.
