ಕೌಂಟಿ ಕ್ರಿಕೆಟ್‌: ಪೂಜಾರ ದ್ವಿಶತಕದ ಸೊಬಗು

ಸಸೆಕ್ಸ್‌ ಪರ ಪದಾರ್ಪಣೆ ಮಾಡಿದ ಮೊದಲ ಪಂದ್ಯದಲ್ಲೇ ಡರ್ಬಿಶೈರ್ ಎದುರಿನ ಪಂದ್ಯದ ಎರಡನೇ ಇನಿಂಗ್ಸ್‌ನಲ್ಲಿ 387 ಎಸೆತಗಳನ್ನು ಎದುರಿಸಿದ ಅವರು ಔಟಾಗದೆ 201 ರನ್ ಗಳಿಸಿದರು. 23 ಬಾರಿ ಚೆಂಡನ್ನು ಬೌಂಡರಿ ಗೆರೆ ದಾಟಿಸಿದರು.ನಾಯಕ ಟಾಮ್ ಹೇನ್ಸ್ ಹಾಗೂ ಪೂಜಾರ ಮೂರನೇ ವಿಕೆಟ್‌ ಜೊತೆಯಾಟದಲ್ಲಿ 351 ರನ್‌ ಗಳಿಸಿದರು.

ಮೊದಲ ಇನಿಂಗ್ಸ್‌ನಲ್ಲಿ ಪೂಜಾರ 15 ಎಸೆತಗಳನ್ನು ಎದುರಿಸಿ ಕೇವಲ ಆರು ರನ್ ಗಳಿಸಿದ್ದರು.

ಭಾನುವಾರ ಈ ಪಂದ್ಯವು ಡ್ರಾನಲ್ಲಿ ಅಂತ್ಯವಾಯಿತು.

ದಕ್ಷಿಣ ಆಫ್ರಿಕಾದಲ್ಲಿ ನಡೆದ ಸರಣಿಯ ಬಳಿಕ ಭಾರತ ತಂಡದಿಂದ ಪೂಜಾರ ಅವರನ್ನು ಕೈಬಿಡಲಾಗಿತ್ತು. ಭಾರತದಲ್ಲಿ ನಡೆದ ಶ್ರೀಲಂಕಾ ಎದುರಿನ ಸರಣಿಯ ಬಳಿಕ ಅಜಿಂಕ್ಯ ರಹಾನೆ ಅವರನ್ನೂ ತಂಡಕ್ಕೆ ಪರಿಗಣಿಸಿರಲಿಲ್ಲ.

ಸಂಕ್ಷಿಪ್ತ ಸ್ಕೋರು: ಮೊದಲ ಇನಿಂಗ್ಸ್: ಡರ್ಬಿಶೈರ್‌ 133 ಓವರ್‌ಗಳಲ್ಲಿ 8ಕ್ಕೆ 505 ಡಿಕ್ಲೇರ್‌. ಸಸೆಕ್ಸ್: 56.3 ಓವರ್‌ಗಳಲ್ಲಿ 174. ಎರಡನೇ ಇನಿಂಗ್ಸ್: ಸಸೆಕ್ಸ್ (ಫಾಲೋ ಆನ್‌) 176.1 ಓವರ್‌ಗಳಲ್ಲಿ 513 (ಟಾಮ್ ಹೇನ್ಸ್ 243, ಚೇತೇಶ್ವರ್ ಪೂಜಾರ ಔಟಾಗದೆ 201; ಸ್ಯಾಮ್ ಕೊನರ್ಸ್ 67ಕ್ಕೆ 3). ಫಲಿತಾಂಶ: ಪಂದ್ಯ ಡ್ರಾ.