ನವದೆಹಲಿ; ಅಕ್ಟೋಬರ್–ನವೆಂಬರ್ನಲ್ಲಿ ಗೋವಾದಲ್ಲಿ ನಡೆದ ರಾಷ್ಟ್ರೀಯ ಕ್ರೀಡಾಕೂಟದ ಸಂದರ್ಭದಲ್ಲಿ ನಡೆಸಿದ ಪರೀಕ್ಷೆಗಳಲ್ಲಿ ವಿವಿಧ ಕ್ರೀಡೆಗಳ 20ಕ್ಕೂ ಹೆಚ್ಚು ಕ್ರೀಡಾಪಟುಗಳು ನಿಷೇಧಿತ ಉದ್ದೀಪನ ಮದ್ದು ಸೇವಿಸಿ ಸಿಕ್ಕಿಬಿದ್ದಿದ್ದಾರೆ.
ಅಕ್ಟೋಬರ್ 25 ರಿಂದ ನವೆಂಬರ್ 9 ರವರೆಗೆ ನಡೆದ ಈ ಕೂಟದಲ್ಲಿ ಭಾಗವಹಿಸಿದವರ ಮಾದರಿಗಳನ್ನು ಸಂಗ್ರಹಿಸಿದ ರಾಷ್ಟ್ರೀಯ ಉದ್ದೀಪನ ಮದ್ದು ಸೇವನೆ ತಡೆ ಏಜನ್ಸಿ (ನಾಡಾ) 20ಕ್ಕೂ ಹೆಚ್ಚು ಕ್ರೀಡಾಪಟುಗಳನ್ನು ತಾತ್ಕಾಲಿಕವಾಗಿ ಅಮಾನತುಗೊಳಿಸಿದೆ.
ಕ್ರೀಡಾಕೂಟದಲ್ಲಿ ಅನೇಕರು ಪದಕಗಳನ್ನು ಗೆದ್ದಿದ್ದಾರೆ. ಅದರಲ್ಲಿ ಕೆಲವು ಅಂತರರಾಷ್ಟ್ರೀಯ ಸ್ಪರ್ಧಿಗಳೂ ಇದ್ದರು. ಸಿಕ್ಕಿಬಿದ್ದಿರುವವರಲ್ಲಿ ಒಂಬತ್ತು ಅಥ್ಲೀಟುಗಳು ಹಾಗೂ ಏಳು ವೇಟ್ಲಿಫ್ಟರ್ಗಳು ಸೇರಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಏಳು ವೇಟ್ಲಿಫ್ಟರ್ಗಳ ಪೈಕಿ ಕಾಮನ್ವೆಲ್ತ್ ಚಾಂಪಿಯನ್ಷಿಪ್ನಲ್ಲಿ ಡಬಲ್ ಕಂಚಿನ ಪದಕ ವಿಜೇತೆ ವಂದನಾ ಗುಪ್ತಾ ಸಹ ಇದ್ದಾರೆ.
ಉತ್ತರ ಪ್ರದೇಶದ 29 ವರ್ಷದ ವಂದನಾ, ಗೋವಾದಲ್ಲಿ ನಡೆದ ಮಹಿಳೆಯರ 76 ಕೆ.ಜಿ ವಿಭಾಗದಲ್ಲಿ ಒಟ್ಟು 207 ಕೆ.ಜಿ ಭಾರ ಎತ್ತುವ ಮೂಲಕ ಚಿನ್ನ ಗೆದ್ದಿದ್ದರು.
ನವೆಂಬರ್ 3 ರಂದು ಸಂಗ್ರಹಿಸಿದ ಮೂತ್ರದ ಮಾದರಿಯಲ್ಲಿ ನಿಷೇಧಿತ ಉದ್ದೀಪನ ಮದ್ದು ಸೇವಿಸಿರುವುದು ಕಂಡುಬಂದ ನಂತರ ಸೈಕ್ಲಿಸ್ಟ್ ಅನಿತಾ ದೇವಿ ಅವರನ್ನು ನಾಡಾ ಡಿಸೆಂಬರ್ 6 ರಂದು ತಾತ್ಕಾಲಿಕವಾಗಿ ಅಮಾನತುಗೊಳಿಸಿದೆ.