* ನಿಮ್ಮ ಆಟದಲ್ಲಿ ಯಾವೆಲ್ಲಾ ಸುಧಾರಣೆಗಳಾಗಬೇಕು ಅಂತ ಭಾವಿಸುತ್ತೀರಿ?
ದೀರ್ಘ ರ್ಯಾಲಿ ಮತ್ತು ನೆಟ್ನ ಸಮೀಪದಲ್ಲಿ ಷಟಲ್ ಡ್ರಾಪ್ ಮಾಡುವ ಕಲೆ ಕರಗತ ಮಾಡಿಕೊಂಡಿದ್ದೇನೆ. ಆದರೆ ಒತ್ತಡವನ್ನು ಮೀರಿ ನಿಲ್ಲುವ ಕೌಶಲ ಸಿದ್ಧಿಸಿಕೊಳ್ಳಬೇಕು. ಆ ನಿಟ್ಟಿನಲ್ಲಿ ಪ್ರಯತ್ನ ಮುಂದುವರಿಸಿದ್ದೇನೆ.
* ನಿಮ್ಮ ಮುಂದಿರುವ ಸವಾಲುಗಳೇನು?
ಕ್ರೀಡಾಪಟುಗಳು ಸಾಧನೆಯ ಶಿಖರಕ್ಕೇರುವಲ್ಲಿ ಫಿಟ್ನೆಸ್ ಪ್ರಮುಖ ಪಾತ್ರ ವಹಿಸುತ್ತದೆ. ಹೀಗಾಗಿ ಫಿಟ್ನೆಸ್ ಕಾಪಾಡಿ ಕೊಳ್ಳುವುದೇ ದೊಡ್ಡ ಸವಾಲಾಗಿ ಪರಿಣಮಿಸಿದೆ.
* ಪಿಬಿಎಲ್ನಿಂದ ಕಲಿತಿದ್ದೇನು?
ಪ್ರೀಮಿಯರ್ ಲೀಗ್ ಶುರುವಾದ ಬಳಿಕ ಭಾರತದ ಬ್ಯಾಡ್ಮಿಂಟನ್ ಲೋಕದಲ್ಲಿ ಹೊಸ ಕ್ರಾಂತಿ ಉಂಟಾಗಿರುವುದು ಗೊತ್ತೇ ಇದೆ. ಈ ಲೀಗ್ ನನ್ನಂತಹ ಅನೇಕ ಪ್ರತಿಭೆಗಳು ಪ್ರವರ್ಧಮಾನಕ್ಕೆ ಬರಲು ವೇದಿಕೆಯಾಗಿದೆ.
ಅಂತರರಾಷ್ಟ್ರೀಯ ಟೂರ್ನಿಗಳಲ್ಲಿ ಎತ್ತರದ ಸಾಧನೆ ಮಾಡಿರುವ ಕ್ರೀಡಾಪಟುಗಳು ಲೀಗ್ನಲ್ಲಿ ಆಡುತ್ತಾರೆ. ನನ್ನ ವಾರಿಗೆಯವರಾದ ಕೆಂಟೊ ಮೊಮೊಟ ಮತ್ತು ವಿಕ್ಟರ್ ಆ್ಯಕ್ಸಲ್ಸನ್ ಅವರು ಸಾಧನೆಯ ಹಾದಿಯಲ್ಲಿ ಬಹಳ ಮುಂದೆ ಸಾಗಿದ್ದಾರೆ.
ಅವರಲ್ಲಿರುವ ಅರ್ಪಣಾ ಭಾವ, ಆಟದ ಬಗೆಗೆ ಹೊಂದಿರುವ ಬದ್ಧತೆಯನ್ನು ಬಹಳ ಹತ್ತಿರದಿಂದ ನೋಡುವ ಅವಕಾಶ ಲೀಗ್ನಿಂದ ಸಿಕ್ಕಿದೆ. ವಿದೇಶಿ ಆಟಗಾರರು ಪಂದ್ಯಕ್ಕೆ ಸಜ್ಜಾಗುವ ಬಗೆ, ಎದುರಾಳಿಗಳನ್ನು ಹಣಿಯಲು ಹೆಣೆಯುವ ತಂತ್ರ ಹೀಗೆ ಅನೇಕ ವಿಷಯಗಳನ್ನು ಕಲಿಯಲೂ ನೆರವಾಗಿದೆ.
* ಪ್ರಸ್ತುತ ವಿಶ್ವ ಕ್ರಮಾಂಕ ಪಟ್ಟಿಯಲ್ಲಿ 27ನೇ ಸ್ಥಾನದಲ್ಲಿದ್ದೀರಿ. ರ್ಯಾಂಕಿಂಗ್ ಹೆಚ್ಚಿಸಿಕೊಳ್ಳುವ ನಿಟ್ಟಿನಲ್ಲಿ ನಿಮ್ಮ ಮುಂದಿರುವ ಸವಾಲುಗಳೇನು?
2015ರ ಆರಂಭದಲ್ಲಿ 262ನೇ ಸ್ಥಾನದಲ್ಲಿದ್ದೆ. ಆ ನಂತರ ಸ್ಥಿರ ಸಾಮರ್ಥ್ಯ ತೋರುತ್ತಾ ಬಂದಿದ್ದೇನೆ. ಹೀಗಾಗಿ ರ್ಯಾಂಕಿಂಗ್ನಲ್ಲಿ ಪ್ರಗತಿಯಾಗಿದೆ. ಮುಂಬರುವ ಟೂರ್ನಿಗಳಲ್ಲೂ ಗುಣಮಟ್ಟದ ಆಟ ಆಡುವತ್ತ ಚಿತ್ತ ಹರಿಸಬೇಕು.
*ಸದಾ ನೆನಪಿನಲ್ಲಿ ಉಳಿಯುವಂತಹ ಗೆಲುವು?
ಹಾಂಕಾಂಗ್ ಓಪನ್ ಟೂರ್ನಿಯ ಸೆಮಿಫೈನಲ್ನಲ್ಲಿ ಡೆನ್ಮಾರ್ಕ್ನ ಜಾನ್ ಒ ಜೊರ್ಗೆನ್ಸನ್ ಅವರನ್ನು ನೇರ ಗೇಮ್ಗಳಿಂದ ಸೋಲಿಸಿದ್ದೆ. ಆ ಗೆಲುವು ಸದಾ ನೆನಪಿನಲ್ಲಿ ಉಳಿಯುವಂತಹದ್ದು.
*ನಿಮ್ಮ ಪ್ರಕಾರ ಅತ್ಯಂತ ಬಲಿಷ್ಠ ಎದುರಾಳಿ ಯಾರು?
ನಿರ್ದಿಷ್ಟವಾಗಿ ಒಬ್ಬರ ಹೆಸರನ್ನು ಉಲ್ಲೇಖಿಸುವುದು ಕಷ್ಟ. ಬ್ಯಾಡ್ಮಿಂಟನ್ ಆಡುವ ಎಲ್ಲಾ ದೇಶಗಳ ಆಟಗಾರರೂ ಬಲಿಷ್ಠರೇ ಆಗಿದ್ದಾರೆ.