ಮೈಸೂರು: ಮಂಗಳೂರಿನ ಆ್ಯಂಡ್ರಿಯಾ ಎಲ್.ಡಿಸೋಜಾ ಇಲ್ಲಿ ಮಂಗಳವಾರ ಕೊನೆಗೊಂಡ ರಾಜ್ಯ ಮಹಿಳಾ ಚೆಸ್ ಟೂರ್ನಿಯಲ್ಲಿ ಚಾಂಪಿಯನ್ ಆದರು.
ಮೈಸೂರು ಚೆಸ್ ಸೆಂಟರ್ ವತಿಯಿಂದ ನಡೆದ ಟೂರ್ನಿಯಲ್ಲಿ ಅವರು ಆರು ಪಾಯಿಂಟ್ ಪಡೆದು ಈ ಸಾಧನೆ ಮಾಡಿದರು. ಅಂತಿಮ ಸುತ್ತಿನಲ್ಲಿ ಅಗ್ರ ಶ್ರೇಯಾಂಕದ ಆಟಗಾರ್ತಿ ಬೆಳ್ತಂಗಡಿಯ ಇಶಾ ಶರ್ಮಾಗೆ ಆಘಾತ ನೀಡಿದರು.
ಐದೂವರೆ ಪಾಯಿಂಟ್ ಪಡೆದ ಇಶಾ ಮೊದಲ ರನ್ನರ್ ಅಪ್ ಪ್ರಶಸ್ತಿ ಪಡೆದರು. ಇಷ್ಟೇ ಪಾಯಿಂಟ್ ಗಳಿಸಿದ ಬೆಂಗಳೂರಿನ ಸಂಜನಾ ರಘುನಾಥ್ ದ್ವಿತೀಯ ರನ್ನರ್ ಅಪ್ ಪ್ರಶಸ್ತಿಗೆ ಭಾಜನರಾದರು. ಉಡುಪಿಯ ಮಹಿಮಾ ಶೆರಿಗಾರ್ (5ಪಾಯಿಂಟ್) ನಾಲ್ಕನೇ ಸ್ಥಾನ ಪಡೆದರು.