ಚಂಡೀಗಢ: ಭಾರತದ ಅಥ್ಲೀಟ್‌ ದಿಗ್ಗಜ ಮಿಲ್ಕಾ ಸಿಂಗ್ ಅವರ ಪತ್ನಿ, ಭಾರತೀಯ ಮಹಿಳಾ ವಾಲಿಬಾಲ್ ತಂಡದ ಮಾಜಿ ನಾಯಕಿ ನಿರ್ಮಲ್ ಕೌರ್ ಅವರು ಮೊಹಾಲಿ ಆಸ್ಪತ್ರೆಯಲ್ಲಿ ಕೊವಿಡ್ -19ಗೆ ಸಂಬಂಧಿಸಿದ ತೊಂದರೆಗಳಿಂದಾಗಿ ಭಾನುವಾರ ನಿಧನರಾಗಿದ್ದಾರೆ.
ಅವರಿಗೆ 85 ವರ್ಷವಾಗಿತ್ತು. ಪತಿ, ಒಬ್ಬ ಮಗ ಮತ್ತು ಮೂವರು ಪುತ್ರಿಯರನ್ನು ನಿರ್ಮಲ್ ಕೌರ್ ಅವರು ಅಗಲಿದ್ದಾರೆ.
‘ಕೋವಿಡ್‌ ವಿರುದ್ಧ ಸೆಣಸುತ್ತಿದ್ದ ನಿರ್ಮಲ್ ಇಂದು ಸಂಜೆ 4ರ ಸುಮಾರಿನಲ್ಲಿ ಇಹಲೋಕ ತ್ಯಜಿಸಿದರು ಎಂದು ತಿಳಿಸಲು ದುಃಖವಾಗಿದೆ,‘ ಎಂದು ಮಿಲ್ಕಾ ಕುಟುಂಬದ ಆಪ್ತರು ಹೇಳಿಕೆ ಬಿಡುಗಡೆ ಮಾಡಿದ್ದಾರೆ.
‘ಭಾನುವಾರ ಸಂಜೆ ನಡೆಸಿದ ಅವರ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳಲು ಮಿಲ್ಕಾ ಸಿಂಗ್ ಅವರಿಗೆ ಸಾಧ್ಯವಾಗಲಿಲ್ಲ ಎಂಬುದು ವಿಷಾದಕರ ಸಂಗತಿಯಾಗಿದೆ. ಮಿಲ್ಕಾ ಸಿಂಗ್ ಇನ್ನೂ ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ,‘ ಎಂದೂ ಕುಟುಂಬದ ಮೂಲಗಳು ಮಾಹಿತಿ ನೀಡಿವೆ.
