ನವದೆಹಲಿ: ‘ರಕ್ತದಾನ ಕೇಂದ್ರ’ದ (ಬ್ಲಡ್ ಬ್ಯಾಂಕ್) ಹೆಸರನ್ನು ‘ರಕ್ತ ಕೇಂದ್ರ’ (ಬ್ಲಡ್ ಸೆಂಟರ್) ಎಂದು ಬದಲಾಯಿಸಲು ಕೇಂದ್ರ ಸರ್ಕಾರ ಚಿಂತನೆ ನಡೆಸಿದೆ.
ಔಷಧ ತಂತ್ರಜ್ಞಾನ ಸಲಹಾ ಮಂಡಳಿಯಿಂದ ಈ ಪ್ರಸ್ತಾವ ಅನುಮೋದನೆ ಪಡೆದಿದೆ.
ಯಾವುದೇ ಸಂಘ–ಸಂಸ್ಥೆಗಳ ಆವರಣದಲ್ಲಿರುವ ‘ರಕ್ತ ಕೇಂದ್ರ’ಗಳು ದಾನಿಗಳಿಂದ ಅಥವಾ ಇತರ ನೋಂದಾಯಿತ ರಕ್ತ ಕೇಂದ್ರಗಳಿಂದ ಸಂಗ್ರಹಿಸಿದ ರಕ್ತದ ಶೇಖರಣೆ, ಸಂಸ್ಕರಣೆ, ಹಂಚಿಕೆ, ರಕ್ತಕಣಗಳ ಶೇಖರಣೆ ಹಾಗೂ ಹಂಚಿಕೆ ಮಾಡಲು ಈ ಉದ್ದೇಶಿತ ಪ್ರಸ್ತಾವ ಅವಕಾಶ ನೀಡುತ್ತದೆ.
ರಕ್ತದಾನ ಮಾಡಲು ಕೇಂದ್ರ ಸರ್ಕಾರ 103 ನಿಯಮಗಳನ್ನು ನಿಗದಿಪಡಿಸಿದೆ. ರಕ್ತದಾನದ ಕನಿಷ್ಠ ಹಾಗೂ ಗರಿಷ್ಠ ವಯೋಮಿತಿಯಾದ 18 ವರ್ಷ ಮತ್ತು 65 ವರ್ಷದಲ್ಲಿ ಯಾವುದೇ ಬದಲಾವಣೆ ಇಲ್ಲ.
ಕೈದಿಗಳು, ರಕ್ತದ ಮೂಲಕ ಹರಡ ಬಹುದಾದ ರೋಗಗಳು ಇರುವಂತಹ ಪ್ರದೇಶಗಳ ನಿವಾಸಿಗಳು ಅಥವಾ ಅಲ್ಲಿಗೆ ಭೇಟಿ ನೀಡಿದವರು ರಕ್ತದಾನ ಮಾಡಲು ನಿರ್ಬಂಧ ಹೇರಲಾಗಿದೆ.
ಸಣ್ಣ ಶಸ್ತ್ರಚಿಕಿತ್ಸೆಗೆ ಒಳಗಾದವರು ಆರು ತಿಂಗಳು ಹಾಗೂ ಪ್ರಮುಖ ಶಸ್ತ್ರಚಿಕಿತ್ಸೆಗೆ ಒಳಗಾದವರು ಒಂದು ವರ್ಷ, ಮಲೇರಿಯಾಗೆ ತುತ್ತಾದವರು ಮೂರು ತಿಂಗಳು, ಡೆಂಗಿ ಮತ್ತು ಚಿಕೂನ್‌ಗುನ್ಯಾಗೆ ತುತ್ತಾದವರು ಆರು ತಿಂಗಳು, ಝಿಕಾ ಸೋಂಕಿಗೆ ಗುರಿಯಾದವರು ನಾಲ್ಕು ತಿಂಗಳು ರಕ್ತದಾನ ಮಾಡುವಂತಿಲ್ಲ ಎಂದು ಉಲ್ಲೇಖಿಸಲಾಗಿದೆ.
