₹1.36 ಕೋಟಿ ಆಸ್ತಿ ಪತ್ತೆ

ಕಲಬುರ್ಗಿ: ಯಾದಗಿರಿ ಜಿಲ್ಲೆ ಶಹಾಪುರದ ಕೃಷ್ಣಾ ಜಲ ನಿಗಮದಲ್ಲಿ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ ಆಗಿ ಸೇವೆ ಸಲ್ಲಿಸುತ್ತಿರುವ ಶ್ರೀಮಂತ ಧನ್ನಿ ಅವರಿಗೆ ಸೇರಿದ ಕಲಬುರ್ಗಿಯ ಮನೆ ಹಾಗೂ ಶಹಾಪುರದ ದೋರನಹಳ್ಳಿಯ ಕಚೇರಿ ಮೇಲೆ ಶುಕ್ರವಾರ ಲೋಕಾಯುಕ್ತ ಅಧಿಕಾರಿಗಳು ಏಕಕಾಲಕ್ಕೆ ದಾಳಿ ಮಾಡಿದರು.



ಯಾದಗಿರಿ ಲೋಕಾಯುಕ್ತ ಎಸ್‌ಪಿ ಹನುಮೇಶ ನೇತೃತ್ವದ ತಂಡ ಕಲಬುರ್ಗಿಯ ಶಕ್ತಿನಗರದಲ್ಲಿರುವ ಮನೆಯ ಮೇಲೆ ದಾಳಿ ಮಾಡಿ ಮಹತ್ವದ ದಾಖಲೆಗಳ ಪರಿಶೀಲನೆ ನಡೆಸಿತು.‘₹ 1 ಕೋಟಿ ಮೌಲ್ಯದ ಮನೆ, ಬ್ಯಾಂಕ್ ಖಾತೆಗಳು, ₹ 41 ಸಾವಿರ ನಗದು, 260 ಗ್ರಾಂ ಚಿನ್ನಾಭರಣ, ಒಂದು ಕಾರು ಹಾಗೂ ಒಂದು ಬೈಕ್ ಸೇರಿದಂತೆ ₹ 1.36 ಕೋಟಿ ಮೌಲ್ಯದ ಅಕ್ರಮ ಆಸ್ತಿ ಪತ್ತೆಯಾಗಿದೆ’ ಎಂದು ಲೋಕಾಯುಕ್ತ ಎಸ್‌ಪಿ ಹನುಮೇಶ ‘ಪ್ರಜಾವಾಣಿ’ಗೆ ತಿಳಿಸಿದರು.