ಪುಟ್ಟಿಯ ಪ್ರಶ್ನೆ

ಬಾನಲಿ ಮೂಡುವ ಕಾಮನ ಬಿಲ್ಲಿಗೆ ಬಣ್ಣವ ಬಳಿದವರಾರಮ್ಮ ತೇಲುವ ಮೋಡದ ಕಾಲಿಗೆ ವೇಗವ ಕಲಿಸಿದ ಗುರುವು ಯಾರಮ್ಮ

ಸೂರ್ಯನು ಮಾಡಿದ ತಪ್ಪೇನಮ್ಮ ಉರಿಯುವ ಕೆಂಡ ಮೈಯೊಳಗೆ ಚಂದ್ರನು ಅಂತಹ ಜಾಣನು ಏನು ತಿಳಿ ಬೆಳದಿಂಗಳು ಅವನೊಳಗೆ

ಹೂವಿನ ದಳದಲಿ ಚಂದವನಿಟ್ಟು ಕಣ್ಮನ ತಣಿಸಿದ ನೋಡಮ್ಮ ಸಂಜೆಗೆ ಅಂದವ ಹಿಂದಕೆ ಪಡೆದು ಬಾಡಿಸಲೇಕೆ ಹೇಳಮ್ಮ

. ಹಣ್ಣಿನ ಮೈಯಲಿ ಗಾಯವೆ ಇಲ್ಲ ರುಚಿ ಒಳಗೆ ಹೋದುದು ಹೇಗಮ್ಮ ಎಲೆಗಳ ಹಸಿರನು ಒಣಗಿದ ಮೇಲೆ ಹಿಂದಕೆ ಪಡೆಯುವುದಾರಮ್ಮ

ಹಕ್ಕಿಯ ಕೊರಳಲಿ ಇನಿದನಿ ಉಂಟು ಹುಲಿ ಸಿಂಹಗಳಿಗೆ ಏಕಿಲ್ಲ ಕುದುರೆ ಜಿಂಕೆಗಳೋಡುವ ಹಾಗೆ ಆನೆಗೆ ಏಕೆ ಆಗೊಲ್ಲ

ಹರಿಯುವ ಹೊಳೆಯ ನೀರಿಗೆ ಸಕ್ಕರೆ ಬೆರೆಸಿದ ಅವನು ಶ್ರೀಮಂತ ಸಾಗರ ನೀರಲಿ ಉಪ್ಪೇ ತುಂಬಿದೆ ಕಾರಣ ಹೇಳುವ ಏನಂತ

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.