ಇಲಾಖೆಯಲ್ಲಿನ ಕಾಯ್ದೆ, ನಿಯಮಗಳ ಇತಿಹಾಸ ಕೆದಕುತ್ತಾ, ಬ್ರಿಟಿಷರ ಪೂರ್ವದಲ್ಲಿ ಇದ್ದ ಮದ್ಯ ವಹಿವಾಟಿನ ಬೆನ್ಹತ್ತಿ ಈ ಕೃತಿಯನ್ನು ರಾಜೀವ್‌ ಸಿದ್ಧಪಡಿಸಿದ್ದಾರೆ. ಒಟ್ಟು ಹನ್ನೊಂದು ಅಧ್ಯಾಯಗಳಲ್ಲಿ ಇಲ್ಲಿನ ಲೇಖನಗಳಿವೆ. ಸೋಮರಸದ ಹಿನ್ನೆಲೆ, ಪ್ರಾಚೀನ ಕಾಲದ ಮದ್ಯ ಉತ್ಪಾದಕ ಯಂತ್ರಗಳತ್ತ ಇಣುಕು ನೋಟ, ಶಿಲ್ಪಕಲೆಗಳಲ್ಲಿ ಮದ್ಯಪಾನದ ಕುರುಹುಗಳು, ಪ್ರಾಚೀನ ಸಾಹಿತ್ಯದಲ್ಲಿ ಮದ್ಯಪಾನದ ಘಟನಾವಳಿಗಳು, ಬ್ರಿಟಿಷ್‌ ಆಳ್ವಿಕೆಯಲ್ಲಿ ಮದ್ಯದ ವಹಿವಾಟುಗಳಲ್ಲಿ ಆದ ಮಾರ್ಪಾಡು- ಹೀಗೆ ಭಿನ್ನ ಆಯಾಮಗಳಲ್ಲಿ ಮದ್ಯದ ಪರಂಪರೆಯನ್ನು ಲೇಖಕರು ಇಲ್ಲಿ ವಿಶ್ಲೇಷಿಸಿದ್ದಾರೆ. ಚಿತ್ರಸಹಿತ ವಿವರಣೆ ಓದಿಗೆ ಪೂರಕವಾಗಿದೆ. ಬ್ರಿಟಿಷ್‌ ಸರ್ಕಾರದಿಂದ ಪ್ರಮುಖ ನಗರಗಳಲ್ಲಿ ಡಿಸ್ಟಿಲರಿಗಳ ಆರಂಭದ ಹೆಜ್ಜೆಗಳು, ದಕ್ಷಿಣ ಭಾರತದಲ್ಲಿ ಫ್ರಾನ್ಸಿಸ್‌ ಬುಕಾನನ್ ಪ್ರವಾಸ ಕೈಗೊಂಡ ಸಂದರ್ಭದಲ್ಲಿ ಸಂಗ್ರಹಿಸಿ ಮಾಹಿತಿಗಳನ್ನು ಲೇಖಕರು ವಿಸ್ತೃತವಾಗಿ ಇಲ್ಲಿ ವಿವರಿಸಿದ್ದಾರೆ.
