ಎಚ್‌.ಆರ್‌.ಲೀಲಾವತಿ ಬರೆದ ಕವಿತೆ: ಕನಸು ಮೊಟ್ಟೆ ಇಡುವುದಿಲ್ಲ

ಎದೆತುಂಬ ಬೆಚ್ಚನೆಯ
ಸಾವಿರದ ಪ್ರೇಮದುಸಿರ
ಮಲ್ಲಿಗೆಯ ಕಂಪು
ಅಕಾಲದಲ್ಲೂ

ನಿಜದ ನಡತೆಯ ನಂಬಿ
ಮುಡಿಗೆ ಏರಿಸುವ ವೇಳೆ
ಕೈ ಬರಿದು ಮುಡಿ ಬರಿದು
ಹಾರಿಹೋಗಿತ್ತು ಚಿಟ್ಟೆ

ಆಟಗಳ ಬೇಟಕ್ಕೆ
ಬಲಿಯಾದ ಮುಗ್ಧತೆ
ಉಸಿರುಸಿರು ಬೆರೆವಾಗ
ಎದ್ದ ಅಪರಿಚಿತ ಗೋಡೆ

ನೆನಪಿನಂಗಳ ತುಂಬ
ಅಗ್ನಿ ಜ್ವಾಲೆಯ ಕುಣಿತ
ಶೃತಿ ಇರದ ರಾಗಗಳು
ಬಿಕ್ಕುತಿಹ ಭಾವಗಳು

ಪಾಳುಬಿದ್ದ ಹೃದಯ
ಬರಡು ಬಂಜರು ಭೂಮಿ
ಕನಸು ಮೊಟ್ಟೆ ಇಡುವುದಿಲ್ಲ
ಚಿಟ್ಟೆ ಹಾರುವುದಿಲ್ಲ.