ಎಎಫ್‌ಸಿ ಫುಟ್‌ಬಾಲ್: ಭಾರತಕ್ಕೆ ನಿರಾಸೆ

ಮಸ್ಕತ್ (ಪಿಟಿಐ): ಭಾರತ ತಂಡದವರು ಇಲ್ಲಿ ನಡೆಯುತ್ತಿರುವ 22 ವರ್ಷ ವಯಸ್ಸಿನೊಳಗಿನವರ ಎಎಫ್‌ಸಿ ಫುಟ್‌ಬಾಲ್ ಚಾಂಪಿಯನ್‌ಷಿಪ್‌ನಿಂದ ಹೊರಬಿದ್ದಿದ್ದಾರೆ.



ಸುಲ್ತಾನ್ ಕಾಬೂಸ್ ಕ್ರೀಡಾ ಸಮುಚ್ಛಯದಲ್ಲಿ ಗೆಲ್ಲಲೇಬೇಕಾಗಿದ್ದ ಪಂದ್ಯದಲ್ಲಿ ಭಾರತ ತಂಡದವರು 0-4 ಗೋಲುಗಳಿಂದ ಆತಿಥೇಯ ಓಮನ್ ವಿರುದ್ಧ ಸೋಲು ಕಂಡರು. ಈ ಕಾರಣ ಅಂತಿಮ ಸುತ್ತಿಗೆ ಅರ್ಹತೆ ಪಡೆಯಲು ವಿಫಲರಾದರು. ಮುಂದಿನ ವರ್ಷ ನಡೆಯಲಿರುವ ಏಷ್ಯಾಕಪ್‌ನಲ್ಲಿ ಸ್ಥಾನ ಪಡೆಯುವ ಅವಕಾಶವನ್ನೂ ಕಳೆದುಕೊಂಡರು.



ಭಾರತ ತಂಡದವರು ಐದು ಪಂದ್ಯಗಳಿಂದ ಕೇವಲ ಏಳು ಪಾಯಿಂಟ್ ಕಲೆಹಾಕಿದರು. ಇಷ್ಟೇ ಪಂದ್ಯಗಳಿಂದ ಓಮನ್ 10 ಪಾಯಿಂಟ್ಸ್ ಗಳಿಸಿದೆ.



ಈ ಪಂದ್ಯದಲ್ಲಿ ವಿಜಯಿ ತಂಡದ ಹಮೂದ್ ಸಲೇಹ್ (54ನೇ ನಿಮಿಷ), ಫಾಯೇದ್ ಇಬ್ರಾಹಿಂ (67ನೇ ನಿ.), ಸಲೇಹ್ ಹಬೀದ್ (75ನೇ ನಿ.) ಹಾಗೂ ಮುಬಾರಕ್ ಹುಮೇದ್ (89ನೇ ನಿ.) ಗೋಲು ಗಳಿಸಿದರು.

ಮೊದಲಾರ್ಧದಲ್ಲಿ ಯಾವುದೇ ಗೋಲು ಬರಲಿಲ್ಲ. ಈ ಅವಧಿಯಲ್ಲಿ ಭಾರತವೇ ಮೇಲುಗೈ ಸಾಧಿಸಿತ್ತು. ಆದರೆ ಎರಡನೇ ಅವಧಿಯಲ್ಲಿ ಓಮನ್ ಅಮೋಘ ಆಟದ ಮೂಲಕ ನಾಲ್ಕು ಗೋಲು ಗಳಿಸಿ ಮುಂದಿನ ಹಂತ ಪ್ರವೇಶಿಸಿತು.