ಕಾಣೆಯಾದವರಿಗೆ ಶೋಧ: ಮೃತರ ಸಂಖ್ಯೆ 7ಕ್ಕೆ ಏರಿಕೆ

 ಗಿಗ್ಲಿಯೊ ದ್ವೀಪ (ಇಟಲಿ): ಬಂಡೆಗೆ ಅಪ್ಪಳಿಸಿದ `ಕೋಸ್ಟಾ ಕಾನ್‌ಕಾರ್ಡಿಯಾ~ ಹಡಗು ದುರಂತದಲ್ಲಿ ನಾಪತ್ತೆಯಾಗಿರುವವರ ಶೋಧ ಕಾರ್ಯದಲ್ಲಿ ನಿರತವಾಗಿರುವ ರಕ್ಷಣಾ ಸಿಬ್ಬಂದಿ, ಮಂಗಳವಾರ ಸ್ಫೋಟಕ ಬಳಸಿ ಈ ವೈಭವೋಪೇತ ಹಡಗಿನ ಅವಶೇಷಗಳಲ್ಲಿ ತೂತು ಕೊರೆದರು.



ಈ ಸಂದರ್ಭದಲ್ಲಿ ಒಂದು ಮೃತದೇಹ ಪತ್ತೆಯಾಗಿದ್ದು, ಇದರಿಂದ ದುರಂತದಲ್ಲಿ ಸಾವಿ ಗೀಡಾದವರ ಸಂಖ್ಯೆ 7ಕ್ಕೆ ಏರಿದೆ.



ಈ ನಡುವೆ, ದುರಂತಕ್ಕೆ ಪ್ರಮುಖ ಕಾರಣ ಎನ್ನಲಾದ ಕ್ಯಾಪ್ಟನ್ ಫ್ರಾನ್ಸಿಸ್ಕೊ ಶೆಟ್ಟಿನೊ ಅವರನ್ನು ತೀವ್ರ ವಿಚಾರಣೆಗೆ ಗುರಿಪಡಿಸಲಾಗಿದೆ.



`ಕಾಣೆಯಾದವರಿಗಾಗಿ ಹುಡುಕಾಟವನ್ನು ತೀವ್ರಗೊಳಿಸಲಾಗಿದ್ದು, ಇವರೆಲ್ಲ ಬದುಕುಳಿದಿರುವ ಸಾಧ್ಯತೆ ಕಡಿಮೆ~ ಎಂದು ಕಡಲು ಕಾವಲು ಪಡೆಯ ಮುಖ್ಯಸ್ಥರಾದ ಮಾರ್ಕೊ ಬ್ರುಸ್ಕೊ ಅವರು ತಿಳಿಸಿದ್ದಾರೆ.



`ಹಡಗಿನೊಳಗಿನ ಪರಿಸ್ಥಿತಿ ತುಂಬಾ ಹದಗೆಟ್ಟಿರುವುದರಿಂದ ರಕ್ಷಣಾ ಕಾರ್ಯಾಚರಣೆಗೆ ತೀವ್ರ ಅಡ್ಡಿ ಉಂಟಾಗಿದೆ~ ಎಂದು ಅವರು ಹೇಳಿದ್ದಾರೆ.



12 ಮಂದಿ ಜರ್ಮನ್ ಪ್ರಜೆಗಳು, ಇಟಲಿಯ 6, ಫ್ರಾನ್ಸ್‌ನ ನಾಲ್ವರು, ಇಬ್ಬರು ಅಮೆರಿಕನ್ನರು, ಹಂಗೇರಿ, ಭಾರತ ಮತ್ತು ಪೆರುವಿನ ತಲಾ ಒಬ್ಬ ಪ್ರಜೆ ಕಾಣೆಯಾದವರಲ್ಲಿ ಸೇರಿದ್ದಾರೆ.