ಯೋಚನೆಯಿಲ್ಲದ ಯೋಜನೆಗಳು

ಸಂಕಪ್ಪ ಒಂದು ಸಣ್ಣ ಗ್ರಾಮದ ಬಡ ಕಾರ್ಮಿಕ. ಆತನ ಹೆಂಡತಿಗೆ ತುರ್ತಾಗಿ ಒಂದು ಶಸ್ತ್ರಚಿಕಿತ್ಸೆ ಮಾಡಿಸಬೇಕಿದೆ. ಆತನ ಹತ್ತಿರ ಹಣವಿಲ್ಲ. ಸದ್ಯ ಇರುವ ಆಸ್ತಿ ಎಂದರೆ ಆ ಗ್ರಾಮದಲ್ಲಿನ ಸಣ್ಣ ಮನೆ. ಊರಿನ  ಸಾಹು­ಕಾರರು ಅಷ್ಟೋ ಇಷ್ಟೋ ಸಾಲ ಕೊಟ್ಟರು. ಸಂಬಂಧಿ­ಗಳೂ ಅಷ್ಟಿಷ್ಟು ಹಣ ಕೊಟ್ಟರು. ಆದರೆ, ಶಸ್ತ್ರಚಿಕಿತ್ಸೆಗೆ ಸುಮಾರು 40 ಸಾವಿರ ರೂಪಾಯಿ ಬೇಕಾಗಿತ್ತು. ಅಷ್ಟು ಹಣವನ್ನು ಸುಮ್ಮನೇ ಆ ಬಡವನಿಗೆ ಯಾರು ಕೊಡಬೇಕು?



ಮನೆಯ ಮೇಲೆ ಸಾಲ ತೆಗೆಯುವ ವಿಚಾರ ಮಾಡಿದ. ಅದಕ್ಕಾಗಿ ಗ್ರಾಮ ಪಂಚಾಯಿತಿಗೆ ತನ್ನ ಮನೆಯ ಉತಾರ (ಪಹಣಿ) ತರಲು ಹೋದ. ಆದರೆ ಆ ಉತಾರ ಮಾತ್ರ ಆತನಿಗೆ ಸಿಗಲಿಲ್ಲ. ಬೇಗ ಸಿಗುವ ಸಾಧ್ಯತೆಯೂ ಕಾಣಲಿಲ್ಲ. ಉತಾರ ಸಿಗದೇ ಆತನಿಗೆ ಸಾಲ ದೊರಕುವುದಿಲ್ಲ. ಸಾಲ­ವಿಲ್ಲದೇ ಆತನ ಹೆಂಡತಿ ಶಸ್ತ್ರಚಿಕಿತ್ಸೆಗೆ ಹಣವಿಲ್ಲ. ಹಣವಿಲ್ಲ ಎಂದರೆ ಅವಳಿಗೆ ಉಳಿವಿಲ್ಲ.



ಮತ್ತೊಂದು ಗ್ರಾಮದ ಕತೆ ಕೇಳಿ. ರವೀಂದ್ರ ಪಿಯುಸಿ ಓದುತ್ತಿರುವ ವಿದ್ಯಾರ್ಥಿ. ಅವನ ತಂದೆ  ಕಷ್ಟಪಟ್ಟು ಒಂದು ಸಣ್ಣ ಮನೆ ಕಟ್ಟಿದ್ದಾರೆ. ಈ ಹೊಸಮನೆಗೆ ವಿದ್ಯುತ್ ಪಡೆದು­ಕೊಳ್ಳಲು ಮನೆಯ ಉತಾರ ಬೇಕು. ಆದರೆ ಆ ಉತಾರ ಸಿಗುತ್ತಿಲ್ಲ. ಉತಾರ ಸಿಕ್ಕು ವಿದ್ಯುತ್ ಮನೆಗೆ ಬರುವವರೆಗೂ ಆ ವಿದ್ಯಾರ್ಥಿ ಮತ್ತೊಬ್ಬರ ಮನೆಯ ಬೆಳಕನ್ನು ಆಶ್ರಯಿಸಬೇಕು.



ಸಮಸ್ಯೆ ಇವೆರಡೇ ಅಲ್ಲ. ಈಗ ಗ್ರಾಮ ಪಂಚಾ­ಯಿತಿಯಲ್ಲಿ ಆಸ್ತಿ ಉತಾರಗಳು ಸಿಗದಿರುವ ಪರಿಣಾಮ ರಾಜ್ಯದ ಉದ್ದಗಲಕ್ಕೂ ನೂರಾರು ಸಮಸ್ಯೆಗಳನ್ನು ಜನತೆಗೆ ತಂದೊಡ್ಡಿವೆ. ಜನರು ಸಾಲ ಪಡೆಯಲು, ನಿವೇಶನ, ಮನೆ ಮಾರಾಟ ಸೇರಿದಂತೆ ಇನ್ನಿತರ ಕೆಲಸಗಳಿಗೆ ಅವಶ್ಯವಾಗಿ ಈ ಉತಾರ ಬೇಕೇಬೇಕು. ಈ ಉತಾರವನ್ನು ಗ್ರಾಮ ಪಂಚಾಯಿತಿಯಲ್ಲಿ ಅಭಿವೃದ್ಧಿ ಅಧಿಕಾರಿಗಳು, ಬರವಣಿಗೆ ಮೂಲಕ ನೀಡುತ್ತಿದ್ದರು. ಆದರೆ ಸರ್ಕಾರ ಈ ವ್ಯವಸ್ಥೆಯನ್ನು ಬದಲಿಸಿ ಆನ್‌ಲೈನ್ ಮೂಲಕ ನೀಡುವ ವ್ಯವಸ್ಥೆಯನ್ನು ಹುಟ್ಟು­ಹಾಕಿದೆ. ಹೊಸ ವ್ಯವಸ್ಥೆ ಇಡೀ ರಾಜ್ಯದ ತುಂಬೆಲ್ಲ ಸಮಸ್ಯೆ ತಂದಿದೆ.



ಒಂದೇ ಆಸ್ತಿ ಅಥವಾ ನಿವೇಶನ ಬೇರೆ ಬೇರೆಯವರ ಹೆಸರಿನಲ್ಲಿ ಮಾರಾಟವಾಗುವುದು, ಅನ್ಯಾಯವಾಗಿ ಮತ್ತೊಬ್ಬರ ಆಸ್ತಿಯನ್ನು ತಮ್ಮ ಹೆಸರಿಗೆ  ನೋಂದಾಯಿಸಿಕೊಳ್ಳುವುದು, ಹೀಗೆ ನಿವೇಶನ ಹಾಗೂ ಮನೆಗಳ ದಾಖಲಾತಿಗಳಲ್ಲಿ ನಡೆಯುವ  ಅಕ್ರಮಗಳನ್ನು ತಡೆಗಟ್ಟುವ ಸಲು­ವಾಗಿ ಸರ್ಕಾರ ‘ಇ-–ಸ್ವತ್ತು’ ಎಂಬ ತಂತ್ರಾಂಶ­ವನ್ನು ಜಾರಿಗೆ ತಂದಿದೆ.



ಇ-–ಸ್ವತ್ತು ತಂತ್ರಾಂಶದ ಪ್ರಕಾರ, ಮನೆಯ ಜೊತೆಗೆ ಮನೆಯ ಮಾಲೀಕನ ಭಾವಚಿತ್ರವನ್ನು ಜಿಪಿಎಸ್ ಕ್ಯಾಮೆರಾದಲ್ಲಿ ಸೆರೆಹಿಡಿಯ­ಲಾಗು­ತ್ತದೆ. ಇದರಿಂದ ಈ ಜಿಪಿಎಸ್ ಕ್ಯಾಮೆರಾದಲ್ಲಿ ಮನೆಯ ಸ್ಥಳ, ಅಕ್ಷಾಂಶ ರೇಖಾಂಶ ಸೇರಿದಂತೆ ಚೆಕ್‌ಬಂದಿಯ ಸಂಪೂರ್ಣ ಮಾಹಿತಿ ಲಭ್ಯವಾಗು­ತ್ತದೆ. ನಂತರ ಈ ಮಾಹಿತಿಯನ್ನು ಗಣಕೀಕರಿಸ ಲಾಗುತ್ತದೆ. ಹೀಗೆ ಕಂದಾಯ ಇಲಾಖೆ ನೀಡಿದ ದಾಖಲಾತಿಯನ್ನು ಗ್ರಾಮ ಪಂಚಾಯಿತಿ ಆನ್‌ಲೈನ್ ಮುಖಾಂತರ ಸಾರ್ವಜನಿಕರಿಗೆ ಉತಾರ ನೀಡುತ್ತದೆ.



ಸರ್ಕಾರದ ಈ ಯೋಜನೆ  ಒಳ್ಳೆಯದೇ. ಆದರೆ, ಇ-–ಸ್ವತ್ತು ತಂತ್ರಾಂಶದ ಕಾರ್ಯ ಸಂಪೂರ್ಣಗೊಂಡು ಇನ್ನೇನು ಆನ್‌ಲೈನ್ ಮುಖಾಂತರವೇ ನಾವು ಉತಾರ ಕೊಡಬಹುದು ಎಂದಾಗಲಷ್ಟೇ ಈಗಿದ್ದ ಕೈಬರಹದ ಉತಾರ ಕೊಡುವುದನ್ನು ನಿಲ್ಲಿಸಬಹುದಿತ್ತಲ್ಲವೇ? ಈಗ ಹೀಗೆ ಕೊಡುವ ಉತಾರಗಳನ್ನು ನಿಲ್ಲಿಸಿರುವು­ದರಿಂದ ಜನತೆ ಸಾಕಷ್ಟು ತೊಂದರೆಗಳನ್ನು ಅನುಭವಿಸುತ್ತಿದ್ದಾರೆ.



ಸರ್ಕಾರ ಯಾವುದೇ ಯೋಜನೆಯನ್ನು ರೂಪಿಸಿದರೂ, ಅದು ಕಾರ್ಯರೂಪಕ್ಕೆ ಬರು­ವುದಕ್ಕೆ ಮುನ್ನವೇ ಅದರ ಸಾಧಕಬಾಧಕಗಳನ್ನು ಅರಿಯಬೇಕು, ಯೋಜನೆಯ ಯಶಸ್ಸಿಗೆ ಏನೇನು ಬೇಕು ಎಂಬುದನ್ನೆಲ್ಲ ಅರಿತಿರಬೇಕು.



ಸರ್ಕಾರ­ವೇನೋ ಒಳ್ಳೊಳ್ಳೆಯ ಯೋಜನೆಗಳನ್ನು ಹಮ್ಮಿ­ಕೊಳ್ಳು­ತ್ತದೆ. ಆದರೆ ಪ್ರತಿಯೊಂದು ಯೋಜನೆ­ಯಲ್ಲಿಯೂ ಅದು ಎಡವುವುದು ಇಲ್ಲಿಯೇ.  ಸರ್ಕಾರ ಮಾಡುವ ಕೆಲಸ ನೋಡಿ– ಸಾಕಷ್ಟು ದುಡ್ಡು ವಿನಿಯೋಗಿಸಿ ಒಳ್ಳೆಯ ಯೋಜನೆಯನ್ನು ಕೈಗೆತ್ತಿಕೊಳ್ಳುತ್ತದೆ.



ಆದರೆ ಆ ಯೋಜನೆಯನ್ನು  ಕಾರ್ಯರೂಪಕ್ಕೆ ತರಲು ಅಗತ್ಯವಾದ ಸಿಬ್ಬಂದಿ­ಯನ್ನೇ ನೇಮಿಸಿಕೊಳ್ಳುವುದಿಲ್ಲ. ಹೋಗಲಿ, ಎಲ್ಲವೂ ಸರಿಯಾಗಿದೆ ಎಂದಮೇಲಾದರೂ ಯೋಜನೆಯನ್ನು ಜಾರಿಗೊಳಿಸಬೇಕು. ಆದೂ ಇಲ್ಲ.



ಯೋಜನೆಯನ್ನು ಹಾಕಿಕೊಂಡಿದ್ದಾಗಿದೆ, ಅದು  ಯಶಸ್ಸುಗೊಳ್ಳಲಿ ಬಿಡಲಿ ಊದುವ ಶಂಖ ಊದಿಬಿಟ್ಟರಾಯಿತು ಎಂಬ ಧೋರಣೆ. ಮತ್ತೊಂದು ವಿಚಾರವೆಂದರೆ, ಸರ್ಕಾರ ರೂಪಿ­ಸುವ ಯೋಜನೆಗಳು ಕಾರ್ಯಸಾಧ್ಯ ಮಟ್ಟ­ದಲ್ಲಿರ­ಬೇಕು. ಮತ್ತು ಹೊಸ ಯೋಜನೆಯ ಕೆಲಸಗಳಿಗೆ  ತಕ್ಕಂತೆ ತರಬೇತಿ ಅತೀ ಅವಶ್ಯ.



ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ­ಗಳಿಗೆ, ಗ್ರಾಮೀಣ ಜನರಿಗೆ ಉತಾರ ಕೈಬರಹದ ಮೂಲಕ ಕೊಡಲಾಗುವುದಿಲ್ಲ. ಹೀಗೆ ಕೈಬರಹದ ಮುಖಾಂತರ ಉತಾರ ಕೊಡುವುದನ್ನು ಸರ್ಕಾರ ರದ್ದುಪಡಿಸಿದೆ ಎಂದು ತಿಳಿಸಿಹೇಳುವುದೇ



ಒಂದು ದೊಡ್ಡ ಕೆಲಸವಾಗಿದೆ. ಎಷ್ಟು ಹೇಳಿದರೂ ಸಮಸ್ಯೆಯನ್ನು ಅರಿತುಕೊಂಡು ಮುಂದಿನ ಕ್ರಮಕ್ಕೆ ವಿದ್ಯಾವಂತ ಜನತೆ ಕೂಡ ತಯಾರಾಗುತ್ತಿಲ್ಲ.



ಈ ಉತಾರ ಕುರಿತಂತೆ ಗ್ರಾಮ ಪಂಚಾಯಿತಿಗೆ  ಸಾರ್ವಜನಿಕರಿಂದ ಬಂದ ಅರ್ಜಿಗಳನ್ನು ಸೇರಿಸಿ ಕಂದಾಯ ಇಲಾಖೆಗೆ ವಿಲೇವಾರಿ ಮಾಡಿ ಅಧಿ­ಕೃತ ದಾಖಲೆ ಮಾಹಿತಿ ನೀಡುವಂತೆ ಕಂದಾಯ ಇಲಾಖೆಗೆ ಸಾಕಷ್ಟು ಸಲ ಮನವಿ ಮಾಡಿ­ಕೊಂಡರೂ ಇಲಾಖೆ ಕಣ್ಣುಮುಚ್ಚಿ ಕುಳಿತು­ಕೊಂಡಿದೆ. ಗ್ರಾಮಾಂತರ ಪ್ರದೇಶದಲ್ಲಿನ ಈ ಸಮಸ್ಯೆಗಳನ್ನು ಕಂದಾಯ ಇಲಾಖೆಯವರೆಗೆ ತಲುಪಿಸದೇ ಇದ್ದಲ್ಲಿ ಇಲಾಖೆ ಇನ್ನೂ ದಿನಗಳನ್ನು ದೂಡುತ್ತಲೇ ಹೋಗುತ್ತದೆ. ಅದಕ್ಕಾಗಿ ಗ್ರಾಮೀಣ ಜನತೆ ಎಚ್ಚೆತ್ತುಕೊಳ್ಳಬೇಕು. ಜಾಗೃತ­ಗೊಂಡು ಕಂದಾಯ ಇಲಾಖೆಗೆ ಬಿಸಿ ತಟ್ಟುವಂತೆ ಮಾಡಬೇಕು.



ಈ ಕ್ರಮದಿಂದ ಒಂದು ಕಡೆಯಲ್ಲಿ ಗ್ರಾಮ ಪಂಚಾಯಿತಿಗೆ ಬರುವ ಆದಾಯ ಹೋಯಿತು. ಮತ್ತೊಂದೆಡೆ ಜನರಿಗೆ ಬೇಕಾದ ಉತಾರ ಸಿಗುತ್ತಿಲ್ಲ.  ಅಷ್ಟೇ ಅಲ್ಲ, ಗ್ರಾಮೀಣ ಭಾಗಗಳಲ್ಲಿ ಆಸ್ತಿ ಮಾರಾಟ ಮತ್ತು ಖರೀದಿ ಸ್ಥಗಿತಗೊಂಡಿದ್ದ­ರಿಂದ ನೋಂದಣಿ ಇಲಾಖೆಗೆ ಕೂಡ ಕೋಟ್ಯಂತರ ರೂಪಾಯಿ ನಷ್ಟವಾಗಿದೆ.



ಒಟ್ಟಿನಲ್ಲಿ ಗ್ರಾಮ ಪಂಚಾಯಿತಿಗಳಲ್ಲಿ ಆಸ್ತಿ ದಾಖಲಾತಿಯನ್ನು ಕಂಪ್ಯೂಟರ್‌ಗೆ ಅಪ್‌ಲೋಡ್ ಮಾಡಲಾಗದೇ ಈ ಹಿಂದೆ ಕೊಡುತ್ತಿದ್ದ ಕೈಬರಹದ ಉತಾರಗಳನ್ನು ರದ್ದುಪಡಿಸಿ ಸರ್ಕಾರ   ಆದೇಶ ಹೊರಡಿಸಿದ್ದು ಮೂರ್ಖತನದ ಕೆಲಸ. ಇದರಿಂದ ಜನತೆಗೆ ಸಾಕಷ್ಟು ತೊಂದರೆಯಾಗಿದೆ. ಈ ತೊಂದರೆಗಳನ್ನು ನೀಗಿಸಲು ಸರ್ಕಾರ, ಸಂಬಂಧಿಸಿದ ಇಲಾಖೆಗಳು  ಮುಂದಾಗಬೇಕಿದೆ.