ಸಣ್ಣ ಉದ್ದಿಮೆಗೆ ನೆರವು: ಸಿಐಐ ಯತ್ನ

ಚಂಡೀಗಢ(ಪಿಟಿಐ): ದೇಶದಲ್ಲಿನ ಸಣ್ಣ, ಅತಿಸಣ್ಣ ಹಾಗೂ ಮಧ್ಯಮ ಪ್ರಮಾಣದ ಉದ್ದಿಮೆಗಳು(ಎಂಎಸ್‌ಎಂಇ) ಸದ್ಯ ಎದುರಿಸುತ್ತಿರುವ ಸಮಸ್ಯೆಗಳತ್ತ ಗಂಭೀರವಾಗಿ ಗಮನ ಹರಿಸಿರುವ `ಭಾರತೀಯ ಕೈಗಾರಿಕಾ ಒಕ್ಕೂಟ~(ಸಿಐಐ), ಮೊದಲಿಗೆ ಬ್ಯಾಂಕ್‌ಗಳು ಮತ್ತು ಹಣಕಾಸು ಸಂಸ್ಥೆಗಳ ಮೂಲಕ `ಎಂಎಸ್‌ಎಂಇ~ಗಳಿಗೆ ಆರ್ಥಿಕ ನೆರವು ದೊರೆಯುವಂತೆ ಮಾಡಲು ಯತ್ನಿಸುತ್ತಿದೆ.



ಇಲ್ಲಿ ಸೋಮವಾರ ಸಣ್ಣ, ಅತಿ ಸಣ್ಣ ಮತ್ತು ಮಧ್ಯಮ ಪ್ರಮಾಣದ ಉದ್ದಿಮೆದಾರರನ್ನುದ್ದೇಶಿಸಿ ಮಾತನಾಡಿದ ಸಿಐಐ ಅಧ್ಯಕ್ಷ ಆರ್.ನಾರಾಯಣನ್, ಈ ಸಣ್ಣ ಉದ್ದಿಮೆ ಕ್ಷೇತ್ರಕ್ಕೆ ಬಹಳ ಅಗತ್ಯವಾದ ಹಣಕಾಸಿನ ನೆರವು ದೊರಕಿಸಿಕೊಡುವ ಸಂಬಂಧ ಬ್ಯಾಂಕ್ ಮತ್ತು ಹಣಕಾಸು ಸಂಸ್ಥೆಗಳ ಜತೆ ಮಾತುಕತೆ ನಡೆಸಲಾಗುತ್ತಿದೆ ಎಂದರು.



ದೊಡ್ಡ ಕಂಪೆನಿಗಳೂ `ಎಂಎಸ್‌ಎಂಇ~ಗಳಿಗೆ ತಮ್ಮದೇ ಆದ ರೀತಿಯಲ್ಲಿ ನೆರವಾಗಬಹುದು. ಹಣಕಾಸಿನ ನೆರವು ಮತ್ತು ತಂತ್ರಜ್ಞಾನ ಸಹಕಾರ ಒದಗಿಸಬಹುದು ಎಂದು ಗಮನ ಸೆಳೆದರು.