ಶುಕ್ರವಾರ, ಫೆಬ್ರವರಿ 26, 2021
27 °C

‘ಮುಖ್ಯವಾಹಿನಿಯಲ್ಲಿ ಮಹಿಳೆಗೆ ಸ್ಥಾನವಿಲ್ಲ’

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

‘ಮುಖ್ಯವಾಹಿನಿಯಲ್ಲಿ ಮಹಿಳೆಗೆ ಸ್ಥಾನವಿಲ್ಲ’

ನವದೆಹಲಿ(ಪಿಟಿಐ): ಜಗತ್ತು ಎಷ್ಟೇ ಮುಂದುವರಿದಿದ್ದರೂ ಮಹಿಳೆಯ ಸ್ಥಿತಿಯಲ್ಲಿ ಗಮನಾರ್ಹ ಬದಲಾವಣೆ­ಯೇನೂ ಆಗಿಲ್ಲ. ಮುಖ್ಯವಾಹಿನಿಯಲ್ಲಿ ಅವಳಿಗೆ ಸ್ಥಾನವಿಲ್ಲ.  ಲಿಂಗ ಆಧಾರಿತ ದೌರ್ಜನ್ಯ ಇನ್ನೂ ವ್ಯಾಪಕವಾಗಿದೆ. ಅಲ್ಲದೇ ವರದಕ್ಷಿಣೆ ಮತ್ತು ಮದ್ಯ­ಪಾನದ ಸಮಸ್ಯೆಗಳನ್ನು ಅವರು ನಿರಂತರವಾಗಿ ಎದುರಿಸುತ್ತಿದ್ದಾರೆ.



ಇದು ಯಾವುದೋ ಮಹಿಳಾವಾದಿ ಭಾಷಣದ ಸಾಲುಗಳಲ್ಲ. ಬದಲಿಗೆ ಲಿಂಗ ಸಮಾನತೆ ಮತ್ತು ಮಹಿಳಾ ಸಬಲೀಕ­ರಣದ ಕುರಿತಾಗಿ ವಿಶ್ವಸಂಸ್ಥೆ, ಆಯೋಗ ಮಹಿಳೆಯರ ಅಭಿಪ್ರಾಯ ಸಂಗ್ರಹಿಸಿ ಬಿಡುಗಡೆ ಮಾಡಿದ ವರದಿ ಹೇಳುತ್ತಿರುವ ವಾಸ್ತವ.



ಮಿದುಳು ಮತ್ತು ಹೃದಯ: ಭಾರತೀಯ ಮಹಿಳೆಯ ಮಾತು’ ಎಂಬ  ಹೆಸರಿನ ಈ ಸಂಶೋಧನಾ ವರದಿಯನ್ನು ಆಂಧ್ರಪ್ರದೇಶ, ಕರ್ನಾಟಕ, ಮಧ್ಯಪ್ರದೇಶ, ಒಡಿಶಾ ಮತ್ತು ರಾಜಸ್ತಾನಗಳಿಂದ ಆಯ್ದ ಮಹಿಳಾ ಪ್ರತಿನಿಧಿಗಳನ್ನು ಸಂದರ್ಶಿಸಿ ಸಿದ್ಧಪಡಿಸಲಾಗಿದೆ.



‘ವ್ಯಾಪಕವಾಗಿ ಮತ್ತು ನಿರಂತರವಾಗಿ ಮಹಿಳೆ ಲಿಂಗ ಆಧಾರಿತ ದೌರ್ಜನ್ಯಕ್ಕೆ ಬಲಿಯಾಗುತ್ತಿದ್ದಾಳೆ. ಬಾಲ್ಯವಿವಾಹ, ಭ್ರೂಣಹತ್ಯೆಗಳು ಇನ್ನೂ ಸಹಜ ಸಂಗತಿ­ಯಾ­ಗಿಯೇ ಇದೆ. ಕಾನೂನುಗಳ ಮೂಲಕ ಅವುಗಳ ಪ್ರಮಾಣವನ್ನು ಕಡಿಮೆ­ಗೊಳಿಸಲು ಪ್ರಯತ್ನಿಸಿದ್ದರೂ ಕಾನೂನು ಬಾಹಿರವಾಗಿ ಲಿಂಗ ತಾರ­ತಮ್ಯ ಮಾಡಲಾಗುತ್ತಿದೆ’ ಎಂದು ಮಹಿಳೆ ಭಾವಿಸುತ್ತಾಳೆ ಎಂಬ ಸಂಗತಿಯನ್ನು ವರದಿ ಬಹಿರಂಗಪಡಿಸಿದೆ.



ಲಿಂಗ ಸಮಾನತೆಗೆ ಸಂಬಂಧಿಸಿದಂತೆ ಪುರುಷ ಪ್ರಧಾನ ಸಮಾಜದಲ್ಲಿ  ಮಹಿಳೆ­ಯರನ್ನು ಇಂದಿಗೂ ತುಚ್ಛಮಟ್ಟದ­ಲ್ಲಿಯೇ ಕಾಣಲಾಗುತ್ತಿದೆ. ಸಾಂಪ್ರದಾ­ಯಿಕ ಕೆಲಸಗಳನ್ನು ಅವರ ಮೇಲೆ ಹೇರಲಾಗುತ್ತದೆ ಎಂದು ಸೋಮವಾರ ಬಿಡುಗಡೆ ಮಾಡಿದ ವರದಿಯಲ್ಲಿ ಹೇಳಲಾಗಿದೆ.



ಮಹಿಳೆ ಮುಖ್ಯವಾಹಿನಿಗೆ ಬರದೇ ಇರಲು ಪ್ರಮುಖ ಕಾರಣ ಅನಕ್ಷರತೆ. ಇದರಿಂದ ಅವರು ತಮ್ಮ ಮೂಲಭೂತ ಸೌಕರ್ಯಗಳನ್ನು ದೊರಕಿಸಿಕೊಳ್ಳಲು ಕಷ್ಟವಾಗುತ್ತದೆ. ಔದ್ಯೋಗಿಕ ಅವಕಾಶಗಳೂ ಕಡಿಮೆ­ಯಾ­ಗುತ್ತವೆ. ಇದರಿಂದ ಅವಳು ಆರ್ಥಿಕವಾಗಿಯೂ ಶೋಷಿತಳಾ­ಗು­ತ್ತಾಳೆ ಎಂದು ಹೇಳಿದೆ.



ಗ್ರಾಮಪಂಚಾಯಿತಿಗಳಂತಹ ಸ್ಥಳೀಯ ಸಂಸ್ಥೆಗಳಲ್ಲಿ ಮಹಿಳೆಗೆ ಪ್ರಾಧಾ­ನ್ಯ ಇದೆ. ಆದರೆ ಸಂಸತ್ತಿನಲ್ಲಿ ಕೇವಲ ಶೇ 10 ರಷ್ಟು ಮಾತ್ರ ಮಹಿಳೆಯರು ಇದ್ದಾರೆ. ಚುನಾವಣೆ­ಯಂತಹ ನೀತಿ ರೂಪಕ ಮತ್ತು ನಿರ್ಧಾರಕ ಪ್ರಕ್ರಿಯೆ­ಗಳಲ್ಲಿ ಮಹಿಳೆ ಹೆಚ್ಚಿನ ಪ್ರಮಾಣದಲ್ಲಿ ಪಾಲ್ಗೊಳ್ಳುವಂತಾಗಬೇಕು. ಮುಂಬ­ರುವ ಚುನಾವಣಾ ದೃಷ್ಟಿಯಿಂದ ಇದು ಅತ್ಯಂತ ಮಹತ್ವದ್ದಾಗಿದೆ ಎಂದು ಈ ವರದಿ ಸಲಹೆ ಮಾಡಿದೆ.



ಆರೋಗ್ಯ ರಕ್ಷಣೆ: ಆರೋಗ್ಯದ ವಿಷಯಕ್ಕೆ ಬಂದರೆ ಆಯ್ದ ಕೆಲವೇ ಭಾಗಗಳನ್ನು ಹೊರತುಪಡಿಸಿ ಗ್ರಾಮೀಣ ವಿಭಾಗದ ಉಳಿದೆಡೆ ಎಚ್‌ಐವಿ ಮತ್ತು ಏಡ್ಸ್‌ ಬಗ್ಗೆ ಅರಿವಿನ ಮಟ್ಟ ತುಂಬ ಕಡಿಮೆಯಿದೆ. ಋತುಸ್ರಾವದ ಕಾಲದಲ್ಲಿ ಮತ್ತು ಗರ್ಭಿಣಿ­ಯಾದಾಗ ಅವರು ಮುಖ್ಯ­ವಾಗಿ ನೈರ್ಮಲ್ಯದ ಕೊರತೆ ಮತ್ತು ನೀರಿನ ಸಮಸ್ಯೆಯನ್ನು ಎದುರಿಸುತ್ತಾರೆ. ಅಲ್ಲದೇ ಶೌಚಾಲಯಗಳ ಕೊರತೆಯೂ ಇದೆ ಎಂದು ವರದಿ ಹೇಳಿದೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.