ಬೆಂಗಳೂರು (ಐಎಎನ್‌ಎಸ್): ಸಾಫ್ಟ್‌ವೇರ್ ರಫ್ತು ಸಂಸ್ಥೆ ವಿಪ್ರೊ ಲಿಮಿಟೆಡ್ ಅಧ್ಯಕ್ಷ ಅಜೀಂ ಪ್ರೇಮ್‌ಜಿ ಅವರು, ತಮ್ಮ ಬಳಿ ಇದ್ದ ವಿಪ್ರೊ ಸಮೂಹದ ರೂ. 12,300 ಕೋಟಿ ಮೊತ್ತದ ಶೇ 12ರಷ್ಟು ಷೇರುಗಳನ್ನು ತಮ್ಮದೇ ದತ್ತಿ ಸಂಸ್ಥೆಗೆ ವರ್ಗಾಯಿಸಿದ್ದಾರೆ.
ಈ ಷೇರುಗಳ ವರ್ಗಾವಣೆ ಮೂಲಕ, ವಿಪ್ರೊದಲ್ಲಿ `ಅಜೀಂ ಪ್ರೇಮ್‌ಜಿ ಫೌಂಡೇಷನ್ ಹೊಂದಿರುವ ಒಟ್ಟಾರೆ ಷೇರು ಪಾಲು ಶೇ 19.93ಕ್ಕೇರಿದೆ. 2010ರಲ್ಲಿ ಈ ದತ್ತಿ ಸಂಸ್ಥೆ ರಚನೆಯಾದಾಗ ವಿಪ್ರೊ ಸಮೂಹದ ಶೇ 7.93ರಷ್ಟು ಷೇರುಗಳನ್ನು ವರ್ಗಾ ಯಿಸಲಾಗಿತ್ತು.
`ಸುಸ್ಥಿರ ಸಮಾಜ ನಿರ್ಮಾಣ' ಆಶಯದೊಂದಿಗೆ 2001ರಲ್ಲಿ ರಚನೆಯಾದ `ಅಜೀಂ ಪ್ರೇಮ್‌ಜಿ ಪ್ರತಿಷ್ಠಾನ'ದ ಮೂಲಕ ಈ ದತ್ತಿ ನಿಧಿಯನ್ನು ವಿವಿಧ ಸಮಾಜ ಕಲ್ಯಾಣ ಕಾರ್ಯಕ್ರಮಗಳಿಗೆ ಬಳಸಿಕೊಳ್ಳಲಾಗುತ್ತಿದೆ.
ಪ್ರತಿಷ್ಠಾನವು ಪ್ರಮುಖವಾಗಿ ಕರ್ನಾಟಕ, ಆಂಧ್ರಪ್ರದೇಶ, ಮಧ್ಯಪ್ರದೇಶ, ಪುದುಚೇರಿ, ರಾಜಸ್ತಾನ, ಬಿಹಾರ, ಛತ್ತೀಸ್‌ಗಡ ಮತ್ತು ಉತ್ತರಾಖಂಡನಲ್ಲಿ ಅಲ್ಲಿನ ಸರ್ಕಾರಗಳ ಪಾಲುದಾರಿಕೆಯಲ್ಲಿ ಗ್ರಾಮೀಣ ಶಾಲೆಗಳಲ್ಲಿನ ಶಿಕ್ಷಣದ ಗುಣಮಟ್ಟ ಸುಧಾರಣೆಗೆ ಶ್ರಮಿಸುತ್ತಿದೆ. ಈ ಯೋಜನೆಯ ಭಾಗವಾಗಿ ಪ್ರತಿಷ್ಠಾನ ಬೆಂಗಳೂರಿನಲ್ಲಿ `ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯ'ವನ್ನೂ ಸ್ಥಾಪಿಸಿದೆ.
