ಅಫ್ರಿದಿಗೆ ನಾಯಕತ್ವ: ಗೊಂದಲದಲ್ಲಿ ಪಿಸಿಬಿ

ಪ್ರಸಕ್ತ ನಾಯಕ ಶಾಹಿದ್ ಅಫ್ರಿದಿಗೆ ಈ ಜವಾಬ್ದಾರಿ ನೀಡಬೇಕೇ? ಅಥವಾ ಮಿಸ್ಬಾ ಉಲ್ ಹಕ್ ಅವರನ್ನು ನಾಯಕನಾಗಿ ನೇಮಿಸಬೇಕೆ ಎಂಬುದರ ಕುರಿತು ಬಿಸಿ ಚರ್ಚೆ ನಡೆಯುತ್ತಿದೆ.

ನ್ಯೂಜಿಲೆಂಡ್ ವಿರುದ್ಧದ ಟ್ವೆಂಟಿ-20 ಸರಣಿಯ ಬಳಿಕ ತಂಡದ ಕೆಲವು ಆಟಗಾರರು ಮತ್ತು ಅಧಿಕಾರಿಗಳು ಅಫ್ರಿದಿ ವರ್ತನೆಯ ಬಗ್ಗೆ ಪಿಸಿಬಿಗೆ ದೂರು ನೀಡಿದ್ದಾರೆ ಎಂದು ಮಂಡಳಿಯ ಮೂಲಗಳು ತಿಳಿಸಿವೆ.

‘ಅಫ್ರಿದಿ ಬಗ್ಗೆ ಕೆಲವೊಂದು ದೂರುಗಳು ಬಂದಿವೆ. ಈ ಕಾರಣ ಅವರನ್ನು ನಾಯಕರಾಗಿ ಮುಂದುವರಿಸಬೇಕೆ ಎಂಬುದರ ಕುರಿತು ಪಿಸಿಬಿಯಲ್ಲಿ ಗಂಭೀರ ಚರ್ಚೆ ನಡೆಯುತ್ತಿದೆ’ ಎಂದು ಮೂಲಗಳು ಹೇಳಿವೆ. ಅಫ್ರಿದಿಗೆ ನಾಯಕತ್ವ ನೀಡಬೇಕೆ ಎಂಬುದರ ಬಗ್ಗೆ ಮಂಡಳಿ ಮತ್ತು ತಂಡದ ಆಡಳಿತದಲ್ಲಿ ಭಿನ್ನಾಭಿಪ್ರಾಯ ಇದೆ.

ಪಿಸಿಬಿ ಅಫ್ರಿದಿ ಮೇಲಿನ ವಿಶ್ವಾಸ ಕಳೆದುಕೊಳ್ಳಲು ಕೆಲವೊಂದು ಕಾರಣಗಳಿವೆ ಎಂಬುದನ್ನು ಮೂಲಗಳು ಬಹಿರಂಗಪಡಿಸಿವೆ. ಸಹ ಆಟಗಾರರು ಅಫ್ರಿದಿ ವಿರುದ್ಧ ದೂರು ನೀಡಿರುವುದು ಪ್ರಮುಖ ಕಾರಣ ಎನ್ನಲಾಗಿದೆ. ಮಾತ್ರವಲ್ಲ ಈ ಆಲ್‌ರೌಂಡರ್ ಮಾಧ್ಯಮಗಳ ಜೊತೆ ನಿಕಟ ಸಂಪರ್ಕ ಇರಿಸಿಕೊಂಡಿರುವುದು ಕೂಡಾ ಪಿಸಿಬಿಗೆ ಇಷ್ಟವಿಲ್ಲ.
ದಕ್ಷಿಣ ಆಫ್ರಿಕಾ ವಿರುದ್ಧ ಯುಎಇನಲ್ಲಿ ನಡೆದ ಏಕದಿನ ಸರಣಿಯ ಬಳಿಕವೂ ಕೆಲವು ಆಟಗಾರರು ನಾಯಕನ ವಿರುದ್ಧ ಕೋಚ್ ಹಾಗೂ ತಂಡದ ಮ್ಯಾನೇಜರ್‌ಗೆ ದೂರು ನೀಡಿದ್ದರು ಎಂದು ಮೂಲ ತಿಳಿಸಿದೆ.