ವಾಹನದ ಬಿಡಿ ಭಾಗಗಳು, ವಿದ್ಯುತ್ ಮತ್ತು ಸೂಕ್ಷ್ಮ ಯಂತ್ರಗಳು, ಕೊರೆಯುವ (ಬೋರಿಂಗ್) ಹಾಗೂ ಕತ್ತರಿಸುವ ಸೇರಿದಂತೆ ಕೆಲ ಯಂತ್ರಗಳ ಬಿಡಿ ಭಾಗಗಳಿಗಾಗಿ ಹುಡುಕುವ ಜನರಿಗೆ ಇಲ್ಲೊಂದು ಅವಕಾಶ ಲಭಿಸಿದೆ.
ತುಮಕೂರು ರಸ್ತೆ ನೈಸ್ ಕೂಡು ರಸ್ತೆ ಬಳಿಯ ಬೆಂಗಳೂರು ಅಂತರರಾಷ್ಟ್ರೀಯ ಪ್ರದರ್ಶನ ಕೇಂದ್ರ (ಬಿಐಇಸಿ)ದಲ್ಲಿ ಭಾರತೀಯ ಯಂತ್ರೋಪಕರಣ ಉತ್ಪಾದಕರ ಸಂಘ (ಐಎಂಟಿಇಎಕ್ಸ್) ಆಯೋಜಿಸಿರುವ 15ನೇ ಅಂತರರಾಷ್ಟ್ರೀಯ ಲೋಹ ಕತ್ತರಿಸುವ ಯಂತ್ರೋಪಕರಣ ಪ್ರದರ್ಶನ ಮೇಳದಲ್ಲಿ ಈ ವೈವಿಧ್ಯದ, ನೂತನ ಯಂತ್ರಗಳನ್ನು ನೋಡಬಹುದು.
ಇಲ್ಲಿ ಭಾರತ ಸೇರಿದಂತೆ 23 ದೇಶಗಳ ಕೈಗಾರಿಕೆಗಳ ಪ್ರದರ್ಶಕರು ಭಾಗವಹಿಸಿದ್ದಾರೆ. ಮುಖ್ಯವಾಗಿ ಆಸ್ಟ್ರೇಲಿಯ, ಚೀನ, ಡೆನ್ಮಾರ್ಕ್, ಜೆಕ್ ಗಣರಾಜ್ಯ, ಇಂಗ್ಲೆಂಡ್, ಫ್ರಾನ್ಸ್, ಜರ್ಮನಿ, ಇಟಲಿ, ಕೊರಿಯಾ ಮುಂತಾದ ದೇಶಗಳ ಕೈಗಾರಿಕಾ ಉತ್ಪನ್ನಗಳು ಗಮನ ಸೆಳೆಯುತ್ತಿವೆ.