ನವದೆಹಲಿ (ಪಿಟಿಐ): ಮೊಬೈಲ್ ನಂಬರ್ ಪೋರ್ಟಬಿಲಿಟಿ (ಎಂಎನ್‌ಪಿ) ಸೌಲಭ್ಯ ಬಳಸಿ `ಲೂಪ್ ಟೆಲಿಕಾಂ ನೆಟ್‌ವರ್ಕ್~ನಿಂದ ಏರ್‌ಟೆಲ್, ವೊಡಾಫೋನ್, ಐಡಿಯಾ, ರಿಲಯನ್ಸ್ , ಏರ್‌ಸೆಲ್, ಟಿಟಿಎಸ್‌ಎಲ್ ಸಂಸ್ಥೆಗಳಿಗೆ ಸೇವೆ ಬದಲಿಸಿಕೊಂಡಿರುವ ಗ್ರಾಹಕರ ಮೊಬೈಲ್ ಸಂಖ್ಯೆಗಳನ್ನು ಮುಂದಿನ 48 ಗಂಟೆಗಳೊಳಗೆ ಸ್ಥಗಿತಗೊಳಿಸುವಂತೆ ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಸೇವಾ ಸಂಸ್ಥೆಗಳಿಗೆ ಸೂಚನೆ ನೀಡಿದೆ.
ತನ್ನ ಸೇವಾ ಜಾಲದಿಂದ 5,923 ಗ್ರಾಹಕರು ಅಕ್ರಮವಾಗಿ `ಎಂಎನ್‌ಪಿ~ ಮೂಲಕ ಬೇರೆ ಸೇವಾ ಸಂಸ್ಥೆಗಳಿಗೆ ಸೇವೆ ಬದಲಿಸಿಕೊಂಡಿದ್ದಾರೆ ಎನ್ನುವ ಗಂಭೀರ ಆರೋಪ ಕೇಳಿಬರುತ್ತಿದೆ. ಈ ಕುರಿತು ತನಿಖೆ ನಡೆಸುವಂತೆ ಲೂಪ್ ಟೆಲಿಕಾಂ ನೆಟ್‌ವರ್ಕ್, ದೂರಸಂಪರ್ಕ ಪ್ರಾಧಿಕಾರಕ್ಕೆ ದೂರು ಸಲ್ಲಿಸಿತ್ತು. ಈ ಹಿನ್ನೆಲೆಯಲ್ಲಿ `ಟ್ರಾಯ್~ ಈ ಕ್ರಮ ಕೈಗೊಂಡಿದೆ.
