ಕುಪ್ಪಳಿಯಲ್ಲಿ ಮಕ್ಕಳ ರಾಜ್ಯಮಟ್ಟದ ರಂಗ ತರಬೇತಿ ಶಿಬಿರ

ಶಿವಮೊಗ್ಗ: ಸಾಗರದ ಸ್ಪಂದನ ಸಂಸ್ಥೆ, ರಾಷ್ಟ್ರಕವಿ ಕುವೆಂಪು ಪ್ರತಿಷ್ಠಾನದ ಸಹಯೋಗದಲ್ಲಿ ಮೇ 10ರಿಂದ 19ರ ವರೆಗೆ ಕುಪ್ಪಳಿಯಲ್ಲಿ ಮಕ್ಕಳ ರಾಜ್ಯಮಟ್ಟದ ರಂಗತರಬೇತಿ ಬೇಸಗೆ ಶಿಬಿರ ಆಯೋಜಿಸಿದೆ ಎಂದು ರೈತ ಮುಖಂಡ ಕಡಿದಾಳು ಶಾಮಣ್ಣ ತಿಳಿಸಿದರು.

ಶಿಬಿರದಲ್ಲಿ 10ರಿಂದ 14 ವರ್ಷದ 50 ಮಕ್ಕಳು ಭಾಗವಹಿಸಬಹುದು. ಶಿಬಿರದಲ್ಲಿ ಮಕ್ಕಳಿಗೆ ರಂಗದ ಆಯಾಮಗಳ ಬಗ್ಗೆ ತರಬೇತಿ ನೀಡಲಾಗುವುದು ಎಂದು ಬುಧವಾರ ಸುದ್ದಿಗೋಷ್ಠಿಯಲ್ಲಿ ಅವರು ಮಾಹಿತಿ ನೀಡಿದರು.

ಸ್ಪಂದನ ಸಂಸ್ಥೆಯ ಪ್ರತಿಭಾ ರಾಘವೇಂದ್ರ ಮಾತನಾಡಿ, ಹೊಸ ತಂತ್ರಜ್ಞಾನಗಳು ಮಕ್ಕಳ ಸೂಕ್ಷ್ಮ ಸಂವೇದನೆಗಳನ್ನು ಕುಬ್ಜಗೊಳಿಸಿವೆ. ರಂಗತರಬೇತಿ ಶಿಬಿರದ ಮೂಲಕ ಮಕ್ಕಳ ಕನಸುಗಳಿಗೆ ರೆಕ್ಕೆ ಕಟ್ಟುವ ಪ್ರಯತ್ನ ಮಾಡಲಾಗುವುದು. ಕುವೆಂಪು ಅವರ ಕೃತಿಗಳನ್ನು ಆಧರಿಸಿ ರಂಗ ತರಬೇತಿ ನೀಡಲಾಗುವುದು ಎಂದು ಹೇಳಿದರು.