ವಾಷಿಂಗ್ಟನ್ (ಪಿಟಿಐ): ಭಾರತೀಯ ಮೂಲದ ಬಾಬಿ ಜಿಂದಾಲ್ ಅವರು ಲೂಸಿಯಾನದ ಗವರ್ನರ್ ಆಗಿ ಎರಡನೆಯ ಅವಧಿಗೆ ಆಯ್ಕೆ ಆಗಿದ್ದಾರೆ.
40ರ ಹರೆಯದ ಜಿಂದಾಲ್ ಅವರು 9 ಅಭ್ಯರ್ಥಿಗಳನ್ನು ಎದುರಿಸಬೇಕಾಗಿತ್ತು. ಒಟ್ಟಾರೆ ಶೇ 68ರಷ್ಟು ಮತಗಳನ್ನು ಪಡೆದಿರುವ ಜಿಂದಾಲ್ ಪಾಲಿಗೆ ವಿಜಯಲಕ್ಷ್ಮಿ ಮತ್ತೊಮ್ಮೆ ಒಲಿದಿದ್ದಾಳೆ.
2007ರಲ್ಲಿ ಮೊದಲ ಸಲ ಗವರ್ನರ್ ಆಯ್ಕೆಯ ಚುನಾವಣೆಗೆ ಕಣಕ್ಕಿಳಿದಾಗ ಶೇ 54ರಷ್ಟು ಮತಗಳನ್ನು ಪಡೆದಿದ್ದರು. ಆಗ ಅಮೆರಿಕದ ಅತಿ ಕಿರಿಯ ವಯಸ್ಸಿನ ಗವರ್ನರ್ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದರು.
ಡೆಮಾಕ್ರಟ್ ಪಕ್ಷದ ಟಾರಾ ಹೊಲಿಸ್ ಅವರಿಗೆ ಶೇ 18ರಷ್ಟು ಮತಗಳು ಸಿಕ್ಕಿವೆ. ಉಳಿದವರಿಗೆಲ್ಲ ಕೇವಲ ಒಂದಂಕಿಯಷ್ಟೇ ಮತಗಳು ಬಂದಿವೆ. ಜಿಂದಾಲ್ 2012ರ ಜನವರಿಯಲ್ಲಿ 4 ವರ್ಷಗಳ ಅವಧಿಗಾಗಿ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ.
