ನವದೆಹಲಿ: ಮಾವೊವಾದಿಗಳು ವಿವಿಧ ಮೂಲಗಳಿಂದ ವಾರ್ಷಿಕ ಸುಮಾರು ರೂ140 ಕೋಟಿ ರೂಪಾಯಿಗಳನ್ನು ಸಂಗ್ರಹಿಸುತ್ತಿರುವುದಾಗಿ ನಕ್ಸಲ್ ಸಂಘಟನೆಗಳ ಆರ್ಥಿಕತೆ ಕುರಿತು ಸರ್ಕಾರ ನಡೆಸಿದ ಪ್ರಥಮ ಅಧ್ಯಯನ ವರದಿ ತಿಳಿಸಿದೆ.
ಈ ಹಣವನ್ನು ಹಂಗಾಮಿ ಕೋಠಿಯಲ್ಲಿ ಮತ್ತು ತಮ್ಮ ಬಗ್ಗೆ ಅನುಕಂಪ ಹೊಂದಿರುವವರ ಬಳಿ ಇಟ್ಟು, ಸಂಘಟನೆಯ ಕಾರ್ಯಚಟುವಟಿಕೆ ಮತ್ತು ಅಡುಗೆ-ಬೆಳಕು ಮತ್ತಿತರ ಕಾರ್ಯಗಳಿಗೆ ಬೇಕಾದ ಇಂಧನ ಸಂಗ್ರಹಕ್ಕೆ ತಗಲುವ ವೆಚ್ಚವನ್ನು ಮಾವೊವಾದಿಗಳು ನಿರಂತರವಾಗಿ ಲೆಕ್ಕಪರಿಶೋಧನೆಗೆ ಒಳಪಡಿಸುತ್ತಿರುವುದಾಗಿ ವರದಿ ಹೇಳಿದೆ.
ಒಂಬತ್ತು ನಕ್ಸಲ್ ಪೀಡಿತ ರಾಜ್ಯಗಳಲ್ಲಿ ಮಾವೊವಾದಿಗಳ ಸಂಪರ್ಕ ಹೊಂದಿರುವ ಹಲವರ ಬಗ್ಗೆ ಪ್ರಾಥಮಿಕ ಅಧ್ಯಯನ ನಡೆಸಿದಾಗ ಈ ಅಂಶ ಬೆಳಕಿಗೆ ಬಂದಿದೆ. ಸರ್ಕಾರದ ಅನೇಕ ಅಭಿವೃದ್ಧಿ ಯೋಜನೆಗಳಿಂದ ಹಣ ಕಡಿತ, ಮರಕಳ್ಳಸಾಗಾಣಿಕೆಗೆ ನೆರವಾಗುವುದು, ಗುತ್ತಿಗೆದಾರರು, ಅರಣ್ಯ ವಸ್ತುಗಳ ವ್ಯಾಪಾರಿಗಳು, ಗಣಿ ಉದ್ಯಮಿಗಳು, ಸರ್ಕಾರಿ ಅಧಿಕಾರಿಗಳು, ರಾಜಕಾರಣಿಗಳು ಮತ್ತಿತರಿಂದ ಹಫ್ತಾ ವಸೂಲಿ ಇತ್ಯಾದಿ ಮೂಲಗಳಿಂದ ಮಾವೊವಾದಿಗಳು ಹಣ ಪಡೆಯುತ್ತಿದ್ದಾರೆ.
