ನವದೆಹಲಿ(ಪಿಟಿಐ): ಸಾಲದ ಸುಳಿಗೆ ಸಿಲುಕಿ, ಸಿಬ್ಬಂದಿಗೆ ನಾಲ್ಕೈದು ತಿಂಗಳಿಂದ ವೇತನವನ್ನೇ ನೀಡಲಾಗದೆ ಪರಿತಪಿಸುತ್ತಿರುವ `ಕಿಂಗ್‌ಫಿಷರ್ ಏರ್‌ಲೈನ್ಸ್~, ಮುಖ್ಯ ಕಾರ್ಯನಿರ್ವಹಣಾಧಿಕಾರಿಗೆ ಮಾತ್ರ ವೇತನದಲ್ಲಿ ಭಾರಿ ಹೆಚ್ಚಳ ಮಾಡಿರುವ ಹಿನ್ನೆಲೆಯಲ್ಲಿ ನಷ್ಟದಲ್ಲಿರುವ ಕಂಪೆನಿಗಳ ಹಿರಿಯ ಅಧಿಕಾರಿಗಳ ಸಂಬಳದತ್ತ ಕೇಂದ್ರ ಸರ್ಕಾರದ ಕಣ್ಣು ನೆಟ್ಟಿದೆ.
ಇಂಥ ಕಂಪೆನಿಗಳಲ್ಲಿ `ಸಿಇಒ~ ಸೇರಿದಂತೆ ಹಿರಿಯ ಅಧಿಕಾರಿಗಳ ವೇತನ ಪರಿಷ್ಕರಣೆಗೆ ಅನುಸರಿಸುತ್ತಿರುವ ಕ್ರಮದ ಪರಿಶೀಲನೆಗೆಂದೇ ಸಮಿತಿಯೊಂದನ್ನು ರಚಿಸಿದೆ.`ಕೇಂದ್ರದ ಕಂಪೆನಿ ವ್ಯವಹಾರಗಳ ಸಚಿವಾಲಯ ಹೊಸದಾಗಿ ರಚಿಸಿದ ಸಮಿತಿ ಮೊದಲಿಗೆ ನಷ್ಟದಲ್ಲಿರುವ ಕಂಪೆನಿಗಳಲ್ಲಿ ಉನ್ನತ ಅಧಿಕಾರಿಗಳ ವೇತನ ಪರಿಶೀಲಿಸಲಿದೆ. ನಂತರ ಇತರೆ ಕಂಪೆನಿಗಳತ್ತಲೂ ನೋಟ ಹರಿಸಲಿದೆ~ ಎಂದು ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ಸುದ್ದಿಗಾರರಿಗೆ ಭಾನುವಾರ ತಿಳಿಸಿದರು.
