ಕ್ವಾಲಾಲಂಪುರ (ಪಿಟಿಐ): ಇಂಡೋನೇಷ್ಯಾದಲ್ಲಿ ಮುಸ್ಲಿಂ ಯುವತಿಯರಿಗಾಗಿ ಏರ್ಪಡಿಸಲಾಗಿದ್ದ ಸೌಂದರ್ಯ ಸ್ಪರ್ಧೆಯಲ್ಲಿ 21 ವರ್ಷದ ನೈಜೀರಿಯಾ ಯುವತಿ ವಿಜೇತಳಾಗಿದ್ದಾಳೆ.
ಜಕಾರ್ತದಲ್ಲಿ ಬುಧವಾರ ನಡೆದ ವರ್ಣರಂಜಿತ ಸಮಾರಂಭದಲ್ಲಿ ನೈಜೀರಿಯಾದ ಒಬಾಬಿಯಿ ಐಷಾ ಅಜಿಬೊಲಾ ಎಂಬಾಕೆ ‘ವಿಶ್ವ ಮುಸ್ಲಿಂ ಸುಂದರಿ 2013’ ಪಟ್ಟ ಗಳಿಸಿದಳು. ತಮ್ಮ ಹೆಸರು ಪ್ರಕಟಿಸಿದ ಕೂಡಲೇ ಒಬಾಬಿಯ ಅಳುತ್ತಲೇ ಕುರಾನಿನ ಸಾಲುಗಳನ್ನು ಪಠಿಸಿದರು.
ಈ ಸುಂದರಿ 2,200 ಡಾಲರ್‌ ( ರೂ.1.22ಲಕ್ಷ ) ಬಹುಮಾನ ಗೆದ್ದಿದ್ದು, ಮೆಕ್ಕಾ ಮತ್ತು ಭಾರತಕ್ಕೆ ಪ್ರವಾಸ ಆಯೋಜಿಸಲಾಗಿದೆ. ಆನ್‌ಲೈನ್‌ ಮೂಲಕ ಅರ್ಜಿ ಸಲ್ಲಿಸಿದ್ದ 500 ಜನರಲ್ಲಿ 20 ಮಂದಿಯನ್ನು ಅಂತಿಮ ಸುತ್ತಿಗೆ ಆಯ್ಕೆ ಮಾಡಲಾಗಿತ್ತು. ಅಂತಿಮ ಸುತ್ತಿಗೆ ಆಯ್ಕೆಯಾಗಿದ್ದ 20 ಸುಂದರಿಯರು ಮುಸ್ಲಿಂ ಫ್ಯಾಷನ್‌ ಹಾಗೂ ಧಾರ್ಮಿಕ ಮೌಲ್ಯಗಳನ್ನು ಪ್ರತಿಪಾದಿಸಿದರು.
ಈ ಸುಂದರಿಯರಿಗೆ ಆಧ್ಯಾತ್ಮಿಕ ತರಬೇತಿಯನ್ನು ಸಹ ನೀಡಲಾಗಿದ್ದು, ಸುರ್ಯೋದಯಕ್ಕಿಂತ ಮೊದಲು ಸಾಮೂಹಿಕ ನಮಾಜು ಮಾಡುವ, ಕುರಾನ್‌ ಅಧ್ಯಯನ ಮಾಡುವ ಕಾರ್ಯಕ್ರಮವೂ ಇತ್ತು.
ಇಂಡೋನೇಷ್ಯಾದಲ್ಲಿ ನಡೆಯಲಿರುವ ‘ವಿಶ್ವ ಸುಂದರಿ’ ಸ್ಪರ್ಧೆಗೆ ಮುಸ್ಲಿಂ ಸಂಘಟನೆಗಳು ಪ್ರತಿರೋಧ ವ್ಯಕ್ತಪಡಿಸುತ್ತಿರುವ ಸಂದರ್ಭದಲ್ಲೇ ಈ ಸ್ಪರ್ಧೆ ನಡೆದಿದೆ.
