ವಾಷಿಂಗ್ಟನ್ (ಪಿಟಿಐ): ಪಂಜಾಬ್‌ನಲ್ಲಿ 1990ರಲ್ಲಿ ನಡೆದ ಉಗ್ರರ ವಿರುದ್ಧದ ಕಾರ್ಯಾಚರಣೆಯಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆಯಾಗಿದ್ದು, ಅದರಲ್ಲಿ ಪ್ರಧಾನಿ ಮನಮೋಹನ್ ಸಿಂಗ್ ಸಹ ಭಾಗಿಯಾಗಿದ್ದರೆಂಬ ಆರೋಪದ ಮೇಲೆ ಅವರಿಗೆ ಅಮೆರಿಕ ನ್ಯಾಯಾಲಯವೊಂದು ಸಮನ್ಸ್ ಜಾರಿ ಮಾಡಿದೆ.
ಇಲ್ಲಿನ ಸಿಖ್ಖರ ಹಕ್ಕುಗಳ ಹೋರಾಟ ಸಂಘಟನೆಯೊಂದು ಅಮೆರಿಕ ಕೋರ್ಟ್‌ನಲ್ಲಿ ಪ್ರಕರಣ ದಾಖಲಿಸಿತ್ತು.
ಇದೇ ವೇಳೆ ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮಾ ಅವರೊಂದಿಗೆ ಮಾತುಕತೆ ನಡೆಸಲು ಅಮೆರಿಕಕ್ಕೆ ಆಗಮಿಸಿರುವ ಪ್ರಧಾನಿ ಸಿಂಗ್, ಬಿಗಿ ಭದ್ರತೆ ನಡುವೆ ಶ್ವೇತಭವನದಲ್ಲಿರುವು ದರಿಂದ ಅವರಿಗೆ ತಾವೇ ನೇರ ಸಮನ್ಸ್ ನೀಡಲು ಅನುಮತಿ ನೀಡಬೇಕೆಂದು ನ್ಯೂಯಾರ್ಕ್‌ನ ‘ನ್ಯಾಯಕ್ಕಾಗಿ ಸಿಖ್ಖರ ಹೋರಾಟ ಸಮಿತಿ’ಯು ಅಮೆರಿಕದ ನ್ಯಾಯಾಲಯದಲ್ಲಿ ವಿಶೇಷ ಅರ್ಜಿ ಸಲ್ಲಿಸಿದೆ.
ಆದರೆ ಮೂಲಗಳ ಪ್ರಕಾರ, ಪ್ರಧಾನಿ ಸಿಂಗ್ ಅವರಿಗೆ ಇರುವ ಬಿಗಿ ಭದ್ರತೆಯ ಮಧ್ಯೆ ತೆರಳಿ ಸಮನ್ಸ್ ನೀಡುವುದು ಅಸಾಧ್ಯ ಎಂದು ತಿಳಿದುಬಂದಿದೆ.
ಒಬಾಮಾ ಜತೆ ಪ್ರಧಾನಿ ಸಿಂಗ್ ಮಾತುಕತೆ ನಡೆಸುವ ಸಂದರ್ಭದಲ್ಲಿ ಶ್ವೇತಭವನದ ಮುಂದೆ ನ್ಯಾಯಕ್ಕಾಗಿ ಹೋರಾಟ ಮಾಡಲು ಸಿಖ್‌ ಸಂಘಟನೆ ನಿರ್ಧರಿಸಿದೆ.
