ಬಸ್‌ನಲ್ಲಿ ಕಲಾಯಾನ

 ಎಂಬತ್ತರ ದಶಕವದು. ಲಲಿತಕಲಾ ಅಕಾಡೆಮಿಯ ಮುಂಬಾಗಿಲಲ್ಲಿ ಬಸ್ಸೊಂದು ಬಂದು ನಿಂತಿತು. ರಾಜಸ್ತಾನದ ದೂರದೂರಿನಿಂದ ಉದ್ಯಾನನಗರಿಗೆ ಬಸ್ಸು ಬಂದದ್ದು ಕಲೆಯ ಪ್ರಚಾರಕ್ಕಾಗಿ. `ಜನರ ಬಳಿಗೆ ನಮ್ಮ ಕಲೆ~ ಎಂಬ ಅಭಿಯಾನವದು.

ಅದರಲ್ಲಿ ಗಣ್ಯ ಕಲಾವಿದರ ಕಲಾಕೃತಿಗಳನ್ನು ಒಪ್ಪ ಓರಣವಾಗಿ ಜೋಡಿಸಲಾಗಿತ್ತು. ಅವುಗಳನ್ನು ವೀಕ್ಷಿಸಲು ಅನುವಾಗುವಂತೆ ಬಸ್ ರೂಪುತಳೆದಿತ್ತು. ಬಸ್ ಹೊರಾಂಗಣ, ಒಳಾಂಗಣ ಸರ್ವಾಲಂಕೃತ ಭೂಷಿತ ಮದುವಣಗಿತ್ತಿಯಂತೆ ಕಾಣುತ್ತಿತ್ತು. ದೇಶದ ಪ್ರಮುಖ ನಗರಗಳಲ್ಲಿ ತನ್ನ ಪ್ರಭೆಯನ್ನು ಬೀರಲು ಸಜ್ಜಾಗಿ ನಿಂತಂತಿತ್ತು. 

 ಇದನ್ನು ಕಂಡ ಆಗಿನ ಲಲಿತ ಕಲಾ ಅಕಾಡೆಮಿ ಅಧ್ಯಕ್ಷ ಸೋಮಶೇಖರ ಸಾಲಿ ಅವರಿಗೆ ನಮ್ಮಲ್ಲೂ ಇಂಥದ್ದೊಂದು ಪ್ರಯತ್ನ ಏಕಾಗಬಾರದು. ನಮ್ಮ ನಾಡಿನ ಕಲೆಗಳನ್ನು ನಮ್ಮ ಜನರತ್ತ ಕೊಂಡೊಯ್ಯುವ ಪ್ರಯತ್ನಕ್ಕೆ  ಮುಂದಾಗಬೇಕು ಎಂಬ ಕನಸು ಮೂಡಿತು.

ಹಲವು ಬಾರಿ ಸರ್ಕಾರಕ್ಕೆ ಎಡತಾಕಿದ ನಂತರ ಕನಸಿನ ಯೋಜನೆ  ಸಾಕಾರಗೊಂಡಿತು (1985-86ರಲ್ಲಿ). ಜೀವರಾಜ ಆಳ್ವ ಸಂಸ್ಕೃತಿ ಸಚಿವರಾಗಿದ್ದ ಸಮಯದಲ್ಲಿ  `ಕರ್ನಾಟಕ ಸರ್ಕಾರ ಲಲಿತಕಲಾ ಅಕಾಡೆಮಿ ಸಂಚಾರಿ ಕಲಾ ಪ್ರದರ್ಶನ~ ಎಂಬ ಹೆಸರಿನಲ್ಲಿ ಬಸ್ಸೊಂದು ರಸ್ತೆಗಿಳಿಯಿತು.

ಅಷ್ಟು ಹೊತ್ತಿಗಾಗಲೇ ಸಂಚಾರಿ ಪುಸ್ತಕ ವಾಹನಗಳು ರಸ್ತೆಗಿಳಿದು ಸಾಹಿತ್ಯ ಒಂದಷ್ಟು ಜನರ ಮನೆ ಬಾಗಿಲನ್ನು ತಟ್ಟಿತ್ತು. ಅದೇ ಮಾದರಿಯಲ್ಲಿ ಸಂಚಾರಿ ಕಲಾ ಬಸ್ ತಯಾರಾಯಿತು. ಇದನ್ನು  ನೋಡುವ ಕಣ್ಣುಗಳು ದಿನೇದಿನೇ ಹೆಚ್ಚಾಗತೊಡಗಿದವು. ಅಷ್ಟೇ ಆದರದಿಂದ ಸ್ವಾಗತವಿತ್ತವು.

ಮಕ್ಕಳಿಗೆ ಕಲೆಯ ಬಗ್ಗೆ ಆಸಕ್ತಿ ಮೂಡಿಸಬೇಕೆಂಬ ಉದ್ದೇಶದಿಂದ ವಿವಿಧ ಶಾಲೆಗಳಿಗೆ ಭೇಟಿನೀಡುವ ಪರಿಪಾಠ ರೂಢಿಯಾಯಿತು. ಉದ್ಯಾನನಗರಿಯ ತುಂಬಾ ಕಲಾ ಸಂಚಾರ ಸುಗಮವಾಯಿತು.

1995ರಲ್ಲಿ `ಕರ್ನಾಟಕ ಚಿತ್ರಯಾತ್ರೆ~ ಸಂದರ್ಭದಲ್ಲಿ ನಾಡಿನಾದ್ಯಂತ ಅಡ್ಡಾಡಿ ತನ್ನ ಛಾಪು ಮೂಡಿಸಿತು.

ಆದರೆ ಆನಂತರ ಸಂಚಾರಿ ಬಸ್ ರಸ್ತೆಗಿಳಿಯಲಿಲ್ಲ. ನಿರ್ಲಕ್ಷ್ಯಕ್ಕೆ ಒಳಗಾಯಿತು.  12 ವರ್ಷಗಳ ವನವಾಸಕ್ಕೆ ಒಳಗಾದಂತೆ  ಮೂಲೆಗುಂಪಾಯಿತು. 

ಆದರೆ ಈಚೆಗೆ ಮತ್ತೆ ದೂಳು ಕೊಡವಿಕೊಂಡು, ಹೊಸ ಬಣ್ಣದೊಂದಿಗೆ ಮಿಂಚುತ್ತಿದೆ. ಬಸ್‌ಗೆ  ಕಾಯಕಲ್ಪ ದೊರೆತದ್ದು ಪ್ರಸ್ತುತ ಲಲಿತಕಲಾ ಅಕಾಡೆಮಿಯ ಅಧ್ಯಕ್ಷರಾಗಿರುವ ಚಿ. ಸು. ಕೃಷ್ಣಸೆಟ್ಟಿ ಅವರಿಂದ.