ಭೂತಾಯೇ ಸ್ವೀಕರಿಸು ನಮ್ಮನಮಸ್ಕಾರ!

ಭೂತಾಯಿ ಒಲಿದರೇ ಬಂಗಾರ ಬೆಳೆಯುವ ರೈತ, ಭೂತಾಯಿಗೆ ಪೂಜೆ ಸಲ್ಲಿಸುವ ಗ್ರಾಮೀಣ ಜನತೆಯ ಪರಿಪಾಠ ಈಗಲೂ ಮುಂದುವರೆದಿದೆ ಎನ್ನುತ್ತಾರೆ ಢೋಮನಾಳದ ಶಿವಪ್ಪ ನುಗ್ಲಿ. ಭೂತಾಯಿಗೆ ಈ ರೀತಿ ನಮನ ಸಲ್ಲಿಸಿದ ನಂತರ ತಂದ ಭಕ್ಷಗಳನ್ನು ಎಲ್ಲರೂ ಸಾಮೂಹಿಕವಾಗಿ ಕುಳಿತು ಊಟ ಮಾಡುವ ಸಂಭ್ರಮ ಹೆಚ್ಚಾಗಿತ್ತು. ಕೃಷಿ ಜಮೀನು ಇಲ್ಲದವರು ಆಲಮಟ್ಟಿಯ ವಿವಿಧ ಉದ್ಯಾನಗಳಿಗೆ ಬುತ್ತಿ ಕಟ್ಟಿಕೊಂಡು ಊಟಕ್ಕೆ ಬಂದಿರುವ ದೃಶ್ಯವೂ ಸಾಮಾನ್ಯವಾಗಿತ್ತು.

ಚರಗದ ಸವಿ: ‘ಚರಗಕ್ಕಾಗಿಯೇ ವಿಶೇಷವಾಗಿ ಸಿದ್ಧ ಪಡಿಸಿದ ಸಜ್ಜೆ ರೊಟ್ಟಿ, ಶೇಂಗಾ ಹೋಳಿಗೆ, ಹೂರ­ಣದ ಹೋಳಿಗೆ, ಬದನೆಕಾಯಿ ಪಲ್ಯೆ, ಮೊಸರು, ತುಪ್ಪ, ಹಿಂಡಿ, ಕಡಬು, ಕಾಳಿನ ಪಲ್ಯೆ, ಪುಂಡಿ ಪಲ್ಯೆ, ಹೊಲದಲ್ಲಿಯೇ ಸಿಗುವ ಹಾತರಕಿ ಹಾಗೂ ಮೆಂತ್ಯೆ ಪಲ್ಯೆ .......ಜವಾರಿ ಭಕ್ಷದ ಪಟ್ಟಿ ಹಾಗೆ ಬೆಳೆಯುತ್ತಲೇ ಸಾಗುತ್ತದೆ. ಅವನ್ನೆಲ್ಲಾ ಭೂತಾಯಿಗೆ ಅರ್ಪಿಸಿದ ನಂತರ ಸಾಮೂಹಿಕ ಭೋಜನ ಮಾಡುವ ಸಂಭ್ರಮವೇ ಸಂಭ್ರಮ’ ಎನ್ನುತ್ತಾರೆ ಕಟಗೂರ ಗ್ರಾಮದ ಮಹಾಂತೇಶ ಹೊಸಗೌಡರ.

‘ಹೊಲದಲ್ಲಿ ಬೆಳೆದ ಕಡಲೆ (ಸುಲಗಾಯಿ), ಬಾರಿಕಾಯಿ, ಸವತಿಕಾಯಿ ಮೊದಲಾದವು­ಗಳನ್ನು ಹರಿದು ತಿನ್ನುವ ಮಕ್ಕಳ ಸಂಭ್ರಮಕ್ಕೆ ಪಾರವೇ ಇಲ್ಲ’ ಎನುತ್ತಾರೆ ರಮೇಶ ರೊಟ್ಟಿ.  ನಂತರ ಸಂಜೆ ಎಲ್ಲ ಬಂಡಿಗಳು ಸಾಲಾಗಿ ಹಳ್ಳಿಗಳಲ್ಲಿ ಬರುತ್ತಿದ್ದ ದೃಶ್ಯ. ಎತ್ತಿನ ಕೊರಳಿಗೆ ಕಟ್ಟಿದ ಗಂಟೆಗಳ ನಿನಾದ, ಬಂಡಿಗಳನ್ನು ಹುರುಪಿನಿಂದ ಓಡಿಸುವ ರೈತನ ಪರಿ ನೋಡುವುದೇ ಒಂದು ಸಂಭ್ರಮ.