ಮಾನವ ಸಂಪನ್ಮೂಲದಿಂದ ಉದ್ಯಮದ ಯಶಸ್ಸು

ಬೆಳಗಾವಿ: `ಮಾನವ ಸಂಪನ್ಮೂಲ ನಿರ್ವಹಣೆಗೆ ಕೈಗಾರಿಕೆಗಳು ಹೆಚ್ಚಿನ ಒತ್ತು ನೀಡುತ್ತಿವೆ. ಮಾನವ ಸಂಪನ್ಮೂಲ ನಿರ್ವಹಣೆ ಹೇಗೆ ಎಂಬುದನ್ನು ಇಂದಿನ ವಿದ್ಯಾರ್ಥಿಗಳಿಗೆ ತಿಳಿಸಿಕೊಡಬೇಕಾದ ಅವಶ್ಯಕತೆ ಇದೆ~ ಎಂದು ಫಿಯೆಟ್ ಇಂಡಿಯಾ ಆಟೋಮೊಬೈಲ್ ಸಂಸ್ಥೆಯ ಅಧ್ಯಕ್ಷ, ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ರಾಜೀವ್ ಕಪೂರ ಅಭಿಪ್ರಾಯಪಟ್ಟರು.

ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯ ಹಾಗೂ ಬಿಇ ಟ್ರಸ್ಟ್‌ನ ಗ್ಲೋಬಲ್ ಬಿಸಿನೆಸ್ ಸ್ಕೂಲ್ ವತಿಯಿಂದ ಹಮ್ಮಿಕೊಂಡಿರುವ ಮಾನವ ಸಂಪನ್ಮೂಲ ಸಮ್ಮೇಳನದಲ್ಲಿ ಶುಕ್ರವಾರ ಅವರು ಮಾತನಾಡಿದರು.
`ಕೈಗಾರಿಕೆಗಳ ಯಶಸ್ಸು ಮಾನವ ಸಂಪನ್ಮೂಲವನ್ನು ಅವಲಂಬಿಸಿದೆ ಎಂಬುದನ್ನು ಕೈಗಾರಿಕೆಗಳು ಅರಿತುಕೊಂಡಿವೆ. ಉತ್ತಮ ಮಾನವ ಸಂಪನ್ಮೂಲವಿದ್ದರೆ ಕೈಗಾರಿಕೆಗಳಿಗೆ ಯಶಸ್ಸು ತನ್ನಿಂದ ತಾನೇ ಲಭಿಸುತ್ತದೆ~ ಎಂದು  ಹೇಳಿದರು.

`ಮೊದಲು ಗ್ರಾಹಕರು, ನಂತರ ಕಾರ್ಮಿಕರು ಎನ್ನುವ ಪರಿಸ್ಥಿತಿ ಬದಲಾಗಿದ್ದು, ಕಾರ್ಮಿಕರು ಮೊದಲು, ಗ್ರಾಹಕರು ನಂತರ ಎನ್ನುವಂತಾಗಿದೆ. ಹತ್ತು ವರ್ಷದ ಹಿಂದೆ ಮಾನವ ಸಂಪನ್ಮೂಲ ವಿಭಾಗಗಳೇ ಇರಲಿಲ್ಲ. ಕಾಲಾಂತರದಲ್ಲಿ ಮಾನವ ಸಂಪನ್ಮೂಲ ವಿಭಾಗಗಳು ಪ್ರಾರಂಭಗೊಂಡಿವೆ~ ಎಂದರು.

`ಕಾರ್ಮಿಕರಿಗೆ  ಹಾಗೂ ಅವರ ಕುಟುಂಬಕ್ಕೆ ಅಗತ್ಯವಿರುವ ಸೌಲಭ್ಯಗಳನ್ನು ಕಲ್ಪಿಸಿಕೊಟ್ಟರೆ ಕಾರ್ಮಿಕರೂ ಸ್ವಯಂ ಸ್ಫೂರ್ತಿಯಿಂದ ಕೆಲಸ ಮಾಡುತ್ತಾರೆ. ಪರಿಣಾಮ ಸಂಸ್ಥೆಯ ಬೆಳವಣಿಗೆಯೂ ಆಗುತ್ತದೆ~ ಎಂದು ಅವರು ಹೇಳಿದರು.