ನವದೆಹಲಿ (ಪಿಟಿಐ): ಮುಂದಿನ 5 ವರ್ಷಗಳಲ್ಲಿ ರಷ್ಯಾದ ಜೊತೆಗಿನ ವಾಣಿಜ್ಯ ಬಾಂಧವ್ಯವು ನಾಲ್ಕು ಪಟ್ಟುಗಳಷ್ಟು ಹೆಚ್ಚಾಗುವ ನಿರೀಕ್ಷೆ ಇದೆ ಎಂದು ಭಾರತ ಅಂದಾಜು ಮಾಡಿದೆ.
2015ರ ಹೊತ್ತಿಗೆ ರಷ್ಯಾದ ಜೊತೆ 20 ಶತಕೋಟಿ ಡಾಲರ್‌ಗಳಷ್ಟು (ಅಂದಾಜು 1,00,000 ಕೋಟಿಗಳಷ್ಟು ವಹಿವಾಟು ನಡೆಯಲಿದೆ ಎಂದು ವಾಣಿಜ್ಯ ಸಚಿವ ಆನಂದ ಶರ್ಮಾ ಸೋಮವಾರ ಇಲ್ಲಿ ಹೇಳಿದರು. ಭಾರತ - ರಷ್ಯಾ ವ್ಯಾಪಾರ ಮತ್ತು ಬಂಡವಾಳ ಹೂಡಿಕೆ ವೇದಿಕೆಯ ಸಮಾರಂಭದಲ್ಲಿ ಮಾತನಾಡುತ್ತಿದ್ದರು.
ಈ ಗುರಿ ಸಾಧಿಸಲು ಉಭಯ ದೇಶಗಳ ಸರ್ಕಾರಗಳು ಮತ್ತು ಉದ್ಯಮಿಗಳು ಸೂಕ್ತ ರೀತಿಯಲ್ಲಿ ಪ್ರಯತ್ನಿಸಬೇಕು. ಮಾಹಿತಿ ತಂತ್ರಜ್ಞಾನ, ದೂರಸಂಪರ್ಕ, ಮತ್ತಿತರ ರಂಗಗಳಲ್ಲಿ ಬಾಂಧವ್ಯ ವೃದ್ಧಿಗೆ ಅವಕಾಶಗಳು ಇವೆ ಎಂದು ಶರ್ಮಾ ನುಡಿದರು.
